" حط الدبلة وحط الساعة ،،حط سجايره والولاعة"
وبعدها حضن جيتاره وبدأ يعزف اول نغمة ..اول نغمة طلعت كلها شكوى من الوحدة والزحمة والطريق الطويل اللى ماشيه لوحده من غير رفيق يونس عليه وحدته ويهون عليه مشواره الطويل وينورلو ضلمة الطريق الكحل ...
تانى نغمة طلعت صرخة غضب من الدنيا غضب من الدوشة من الظلم والقسوة والدنيا القاسية والغدارة اللى ماتديش صاحب الحق حقه واللى بتعلى الواطى والعالى تجيبوه سابع ارض...
تالت نغمة طلعت نغمة حزينة وكلها الم ووجع من فراق الصحاب والمحبوب والاهل والخلان ،مع كل ضربة وتر كأنه بيعزف على اوتار قلبه الحزين البأس اللى مش فاهم وبعدين لفين واخداه الدنيا ورايحة بيه فين الحياة .....
رابع نغمة طلعت نغمة هادية فيها تأمل فيها فكرة فيها جملة بتقول شوية هدوء عشان هنبدا من جديد ، ياريت نركز شوية عشان احنا محتاج للهدوء وللتأمل يمكن نقدر نوصل لحاجة او لفكرة تفتحلنا طاقة نور او تكشف لنا عن حقيقة معينة....
خامس نغمة جت سريعة مرحة كلها شقاوة وضحك وهيبرة مع الصحاب جرى وطنطيط ، رحلة صيد ، وركوب خيل فى الفجرية، وشد شيشة على قهوة الكربة وكوباية سحلب دافية فى عز البرد مع حمص شام على كوبرى قصر النيل ،بولة كوتشينة عند عبده مع جيمة بلاى ستيشن...
سادس نغمة بتقول وبصوت عالى جدا جدا جدا انا حاااااااااااااااااااااااااااابيييييييييييييييييييييييييييييييييييييييت،،كلمة حب طالعة من جوه القلب ، ريحت القلب بعد طول عذاب ، رست القلب بعد البهدلة وعدم الاستقرار...
سابع نغمة جت بتقول للى غايب ارجع صدقنى مافيش أحن من قسوتها ولا اجمل من قبحها ولا احلى من مرها ولا اهدى من دوشتها ،، دى بلدك وفى حضنها ضامة الغريب مابالك ابنها!!!!!!!!!
وخلص اللحن وحضن جيتاره وبصله وقاله طلعت عينى بالحانك بس مين يسمع لحنك غير حزنك ومين شجعك غير اوتارك ، ومين يحيك غير انغامك ،، اما اللى هيقدرك هو جمهورك " الجنون" !!!!!!!!
ليست هناك تعليقات:
إرسال تعليق