الواحد الصحيح .......

" الكمال لله وحده " طب ليه فى حاجة اسمها الواحد الصحيح اللى كلنا لما كنا صغيرين اتعلمنا العد ان واحد .. اتنين ... تلاتة ,, وهكذا يبقى اكيد فى حاجة اسمها واحد صحيح بمعنى ان اكيد فى حاجة كاملة فى الحياة ، ممكن ماتكنش كاملة طول الوقت لكن برضه ده مش معناه انها مش كاملة خالص ..

حب للتصوير علمنى ان فى حاجة اسمها صورة كاملة هايلة مش ناقصها حاجة وفى نفس الوقت علمنى ان كتير فى صور بنشوفها نقول عليها مش ناقصها حاجة لكن لما تتحكم ويبقى كل اللى بيشوفها ناس محترفة يروحو مطلعين فيها الف حاجة وحاجة ناقصة وتتفاجىء انك ماكنتش شايف ولا حاجة من اللى قالولك عيلها بس لما قالولك ولاقيت نفسك اتعلمت حاجة جديدة تكتشف انك لسة ماخلصتش وان لسة فى حاجات تتعمل عشان الصورة تبقى كاملة وحلوة فى نظر اكبر قدر من الناس اللى حواليك ، لانك فى الحقيقة بدور على كاملاك انت احساسك انك واحد صحيح ...

" احمد ذكى " الفنانم العظيم اللى بعشقه عشق خاص وكان حلمى انى اصوره بس القدر ، مرة قال انه مابيحسش انه واحد صحيح الا لما يعمل المكياج والنور ينور والكاميرا تدور والمخرج يقول " اكشن " ساعتها بس بيعرف هو ميين

الكلام ده حقيقى مية فى المية انا كتير مابحسش انى واحد صحيح الا لما البس دور لما احس انى بعمل حاجة ليها لازمة او فايدة طول عمرى ودى يمكن مشكلة فية حاجة بايظة ولازم تتصلح انا بعيش دور وباكون انا لما اكون مش انا باكون انا لما باكون اخت او صديقة او حبيبة او بنت كويسة او طالبة فى الجامعة وراها حاجات تعملها او متطوعة فى مشروع او بساعد دكتور فى شغله ،، بس اكتر وقت بحس فيه انى انا انا من غير ادوار من غير ماكون بمثل حياة حد ، لما بقف حاضنة الكاميرا بتاعتى او ماسكة قلم وبكتب رأى او وجهة نظر هنا بيظهر الواحد الصحيح اللى بتمناه اللى بحسه " انا " عليا اللى اعرفها وبحبها اللى من غير قيود حرة بلقط اللقطة اللى تعجبنى اللى تملى عينى وقلبى واحساسى مع ان اكتر حاجة مش بعرف صح مية فى المية ويادوب لسة بعد فيها اول ارقامى هى التصوير والكتابة انا مش احسن حد فى الحياة بيكتب وناقصنى كتييييييييييييييييييييير ومش احس مصور بين خمس مصوريين وناقصنى لسة مشوار طاويييييييييييييييل بس ده اللى بحبه ده اللى بفهمه ده اللى بحسه ده اللى مؤمنة بيه ده اللى عايزة اكون عليه ,,, ده كمالى اللى بسعاله ، ساعات اصحاب يشوفنى اجدع صاحبة ، او حبيب يشوفنى احسن بنت قابلها ، ولما ا8عمل كوباية شاى حلوة لابوية ولا اعمل عشوة هايلة لامى او اجيب حاجة حلوة ومعاها كان البيبسى لاخويا ومراته ساعتها بحس انى حاجة مهمة للناس دى وبتكون لحظة حلوة لما تسمع كلمة حلوة وبافتكر انى اللى ماحصلتش انا الهايلة انا الجميلة لمجرد انى عملت حاجة لاتذكر !!!!!!!!!!!!!! لاء مش ده انا مش ده الواحد الصحيح بتاعى

انا زى ماحب اكونها عليا اللى بتحب التصوير وبتحاول تعمل حاجاة ، عليا اللى لما بتيجى فى دماغها وجهة نظر او رأى بتحب تعبر عنه وتشاركه مع الناس اللى حواليها لانه فى الغالب بيقى رأى عايزة تشاركهم فيه لعل وعسى تقدر تساعد بيه حد مش واخد باله او تلقط لقطة للسحاب الابيض عشان الناس تشوفها وتشوف جمال ونقاء السحاب فى يوم ممطر زى انهاردة كدة ...

عشان كدة فى حاجة اسمها واحد صحيح " كامل " انت ممكن تكون كامل لنفسك باحساسك بالحاجة اللى بتحسسك بوجودك كيانك انت مين بتعمل ايه امتى بتحس انك انت ؟ وايه اللى بيحسسك انك انت ؟ اى كان مش لازم شغل مش لازم هواية ممكن حد يحس انه كامل لانه بيحب فلان او يحس انه كامل لانه بيربى حيوان ضعيف او واحد بتحس بكيانها لما تقف تطبخ اكلة حلوة اى كان اللحظة اى كان الموقف اى كان اللى بنعمله اى كان بنعمله لواحدنا او واحنا معانا حد .. نقدر نوصل لنفسنا ، نقدر نفهم نفسنا ، مناطق قوتنا وضعفنا ، هو ده الواحد الصحيح اللى انا اقصده " انت مين " ايه اللى بيحسسك بذاتك وكيانك مش مجرد صفات فى شخصيتنا ، مش مجرد تصرفات بنعملها ، لان اكيد صفاتنا ناقصة حتة ، واكيد تصرفتنا مرتبطة بصافتنا دى بس انا مؤمنة اننا فينا من كل حاجة حتة وبما ان " الكمال لله وحده " واحنا مخلوقين من روح الله يبقى كلنا فينا من الكامل يعنى فينا كل صفاته بس مش كاملة عشان الكمال ليه هو وشاطرتنا بقى نعمل من الحتت الناقصة دى صورة كاملة ...