مش زى الافلام ...

"واتارى الدنيا مش حلوة كلها مش زى الافلام اللى هو بيحب يخوشها "

مع الاسف مع الآلم زمان انا كنت من الناس اللى بيقولولهم ايه ده انتى ازاى مابتتفرجيش على افلام امريكانى افلام عربى ايه انتى متخلفة ولا ايه دى افلام هبلة جدا وساذجة والكلام ده كولو .. فا كنت بقلهوم اصلها كلها ضرب واكشن ودم وحاجات مقرفة كدة " عشان ده اللى كان بابا غاويه وماما كانت دايما تتخنق من الافلام دى فاكبرت بكره اصلا الافلام بتاعت ولاد الفرنجة من كتر الخناقات اللى شوفتها وانا صغيرة ،،فلاقيت صحباتى الجمال بيقولوللى يابتنى لاء دة فى افلام جميلة قوى ورومانسية وبتاع وانا كان اخرى فى الرومانسى" نهر الحب " واعااااااااااااااااااااااااايط كل مرة فى نفس المشاهد اياها وخلاص .. وكان الواحد عايش امر واقع وبتفرج على افلامنا المصرية العادية وبحبها جدا وبتفرج على الافلام الواقعية اللى شبه مجتمعنا فيها ناس شباهنا مشاكلهم زيينا ،، ناس مش لاقية تتجوز او مشاكل اكل وشرب وحتى الرومانسية عندنا شبه مش موجودة عشان المجتمع اصلا تعبان ومشاكله كتييييييييييييييييير ولما كنا بنيجى نعمل افلام رومانسية كانت عادة بتطلع كوميدي يعنى حتى الحب عندنا بنتريق عليه ،، وكان الواحد خلاص ساسستم حياته على ان الرومانسية الجميلة والحب والالوان مش موجودة هنا او نادرة عشان ماحدش يزعل او مش بتحصل كتير زى القصص الرومانسية الحالمة ،، ياما بقى بتبقى رومانسية بس برضه شباهنا اللى انا اكتشفته هنا ان احنا عندنا الرومانسية او الحب عادة بيتعمل بطريقة مختلفة يعنى لو بتحب واحدة وانت على قد حالك تخلع من اولها عشان ماتظلمهاش معاك ، او هى تتجوز اول واحد جاهز لمجرد انها هتعيش احسن ، او الاب عشان يحب عياله يبقى لازم يجبلهم الاكل والشرب والمدارس الكويسة ، والام اللى بتحب ولادها يبقى تأكلهم طول الوقت تغسلهم هدومهم تنضفلهم البيت وتكويلهم القمصان ،، والاخوات عشان يحبو بعض يبقى يخدمو بعض يجيبو لبعض كبايات المية يعشو بعض ،، يعنى الحب عندنا والرومانسية مرتبطة باكل العيش وانك تعيش الناس اللى حواليك عيشة افضل خلاص.. وكل افلامنا مليانة كدة وأدينا وانا اتعودت عليها وفهمتها والافلام دى شكلت الوعى بتاعى وادراكى لمجتمعى اللى انا عايشة فيه خصوصا انى بشوف كل الافلام تقريبا فاتربيت عينى على انها تشوف الواقع واتربى ادراكى وتفكيرى على الحلم بتغير الواقع ده او محاولة انى اصلح عيوبه او يكونلى جزء فيه او حتى خلتنى اعرف ايه اللى ممكن احبه منه وايه لاء مش هعمله ابدا ايه الصح وايه الغلط ايه اللى ينفع نعيشه وايه اللى لازم نغيره بقى ...

ولما ابتديت اسمع نصايح الصديقات فى سن المراهقة الجميل وفتحت عينى على mbc4 , onetv,mbc maxابتادينا نشوف افلام تانية خالص وعن مجتمع تانى رومانسى جميل الحب والبيت اللى بجنينه والكلب والمراجيح للولاد وكل ولد له قضته وبوسة الصبح قبل مايروح شغله ، ولا حتى بوسة تحت المطر ولا التلج ، ولا ننزل نفطر مع بعض قبل مانروح الشغل ، نحب بعض زى ماحنا ماحدش يحاول يغير التانى ، حتى لوسبنا بعض ادينا اصحاب وبنتعامل كويس مع بعض ، لما بنقول جواز يبقى مش هنسيب بعض ابدا ، الحب لابعد حد هحترم شغلك واساعدك تكبرى ، وانا معاك واحنا سوا على الحلوة والمرة رومانسية كدة وحب ومافيش مشاكل والدنيا بيضة وبمبى ومافيش احلى من كدة ..

الافلام دى طبعا جميلة وحلوة وبتدى امل فى الحياة وبرضه الحياة اكيد فيها لحظات حلوة كتير مش كلها معاناة ونكد واكتأب وبؤس وبجد باستمتع بيها جدا وبتفرق معايا فى حاجات ساعات معينة ، بس المشكلة بقى ان الافلام دى ساعات كتير بتفرق فى شخصية الناس اللى بتتفرج عليها بتخليهم يحلمو لدرجة ان رجليهم بتترفع من على الارض اصلا وينسو الدنيا الحقيقية فيها ايه او بتشكل وعيهم بطريقة تخليهم يبعدو قوى عن تفكير ووعى الناس اللى حواليهم فتغير تفكيرهم ويحسو انهم بعيد عن الناس اللى حواليهم وتخليهم يستنو تحقيق الحلم وفى الاول وفى الاخر يايحصل يالاء بس فى ناس بتضيع عمرها على امل انهم يلاقو نفسهم بطل من ابطال الافلام دى وساعتها بنتصدم بالواقع بتاعنا اللى هو مش بنفس الجمال بتاع الصورة دى بس اكيد هو فى حاجات تانية جميلة برضه .... "اجمل حلم اللى تبقى رجلك ثابتة بقوة على الارض بس راساك واصلة لساااااااااااااااااااااابع سما تقدر تلمس النجوم بس لما تلسعك تعرف ترجع الارض بسهولة"

انا بحب السيما والافلام وعملت فى كتيييييييييييييييييييييير وبوظتلى دماغى وشخصيتى وحياتى كلها بس هنعمل ايه ادينا بنتفرج يمكن تضرب والواحد يلاقى نفسه بطل لفيلم من دول ويعيش حب وسعادة زى الافلام اللى هو بيحب يخوشها :)