منتصف العمر

بما ان فى هذا الزمن اصبح متوسط عمر الانسان 60 او 70 سنة فا ممكن نقول انى وصلت لمنتصف العمر ، او بما ان الموت بقى مفاجىء وقريب قوى مننا فى اى لحظة فا بقى عندى احساس فى الاخر الليل انى طالما مامتش انهاردة يبقى بكرة ، المهم انه بعد ماعديت 30 سنة من العمر واه انا حساهم كتار ومش هقول انها دراما بس مكنوش خفاف مكنش عمر هادى كان عمر حزين موجوع مكسور مشوه ايوة 30 بالنسبالى مش مريحه ولا العمر مجرد رقم لانى عمرى مكنش رقم ودة مش شكوى خالص بالعكس التشوهات هى اللى مليانى معلمانى حرفيا :) ..
وصلت لفكرة اقل مايقال عليها انها تافهة من 10 سنين كنت فاكرة ان هحب واتجوز واخلف 4 ولاد وهنعمل عيلة كبيرة انا ورفيقة عمرى صحبتى وولادنا هيكبروا سوا وهيقى عندنا مشروعنا الخاص اللى كنت هشارك جوزها فيه اللى هو صديقى كمان وهى هتبقى مهمة جدا فى شغلها المكتبى الممل وكان تربية الولاد علية انا اللى هعلمهم الفن والجمال والحياة تقسيمة العمر خطة لحياة طويلة مرحة وافكار كتير واحداث هتحصل وطبعا بما ان مش كل حاجة بنخططلها بتحصل زى ماتخيلنا ..
خلصت مشوار كبير مابين فراق وزعل وقطيعة وخبطات كتير وناس ودوشة فى كل مكان ، وصلتنى لمرحلة من السكينة والهدوء الحياة بسيطة وان مش عيب انك تحلم بحياة بسيطة ممكن يكون دة هدف فى حد ذاته ان احلم ببيت صغير على قدى وكلاب روف مزروع منه للسما والشمس شغل عادى بسيط مش هحتاج انى اجرى فيه ولا اوصل لحاجة مجرد دخل للمعيشة اصحاب كتب مزيكا لي لي وفارس اقضى معاهم حلم الامومة الغريزة الموجعة الملحة من وقت للتانى ، مش زهد فى الحياة ولا ضباب واكتأب احساسى ونظرتى للحياة بالشكل دة هو رغبة شديدة انى اعيش العمر ببساطة دة هدفى منغير حروب منغير مبررات منغير احساس المتهم اللى بعيشه خصوصا انى مش مؤهلة لاى وظيفة فى الحياة ..
مش احسن ابنة ولا احسن اخت مكنتش مميزة فى شغلى دايما فى المتوسط دراستى علاقاتى بالناس والصحاب مش احسن حاجة ولا حتى الحبيبة التى لاتنسى ولاتترك 😂 الحاجة الوحيدة اللى مقاسها مش متوسط فى حياتى هى الهدوم فمقاسى فيها صغير 😃 .. البساطة بالنسبالى هى بر الامان البيت الل  اعمله بأيدى طالما امى محسسانى انى مأجرة القوضة وكل ماحتاج تغيير تقولى ليه هو انتى قاعدة على طول !! ياست دة بيتى مالك وصلنى احساس انه مكان مؤقت بيتى اصبح مكان مؤقت بغير رغبتى شأت ام أبيت ..
طبعا مش قصدها وهى عايزة تفرح بية وبابا عايز يطمن عليه وبلا بلا بلا كلام جميل حقيقى ومنطقى ، بس خالى م الاحساس وانا الاحساس والشغف هما منطقى واسلوبى مش محتاجة لحاجة تقنع عقلى محتاجة لحاجة تملى قلبى ، قلبى لو مقتنعش وحس مش هيصدق وبالتابعية عقلى مش هيفهم .. وانا احساسى فى الوقت دة مايل لكل شىء بسيط مش قادرة على الدوشة حبه وجودى لوحدى بقيت اختار انى ابقى لوحدى ، عندى شعور انى مش كفاية ولا آمان لاى حد حوالية عايزة اقولهم انى بكلمكم عشان واحشنى بس معنديش كلام اقوله عندى مشاعر كتيييييييرة قوى قوى بس الكلام سكت ، ساعات بعملها فى تصرف عبيط زى انى اجيب شكولاته وقهوة لحد منهم بعد الشغل يلاقينى بديهمله واسلم وامشى ، او اجمع صور للحظات حلوة واقول بيهم انى مهتمة بلحظتنا مع بعض ، او حاجة واحدة منهم نفسها فيها فاعملها المهم انى فعلا مابقتش اعرف اتكلم بس لسة بقدر اتصرف .. بعد كل دة كل الل محتاجة اوصله هو انى اعيش البساطة لو اطول اعيش فى بست عالبحر كنت عملتها بس دة حلم بسيط برضة على الاقل يفضل عندى حلم وانا لسة بتنفس احلمه .
يالا احلمه احلام حلوة :)
سلامات.