كنت مرة قاعدة براقب تصرفات طفل صغير كان بيلعب ومبسوط جدا جدا ,,كان بيلعب فى التراب ,,ماشى كل الاطفال كدة .... وبعدين امه نادتلو علشان ياكل ,,طلبت منه يغسل ايده الاول عشان التراب,,, وزى كل الاطفال ماكنش عاوز يغسلها ,,كل همه انه كان عاوز ياكل,,طفل ,, مش فاهم ليه لازم يغسل ايده
ولما جت تفهمه دى كانت المشكلة,,
" انت لو ماغسلتهاش وكلت كدة من غير ماتنضفها هتجيلك امراض وميكروبات وهتعية وتروح للدكتور ويديك حوقنا,, سعتها الولد ابتدى يكون اسلوبه عدوانى جدا ابتدى يخبطها على راسها بالمعلقة,, ويقولها اسكتى ,, وهى مكملة ومش فاهمة هو ماله,,,هى بتقوله يابنى انا خايفة عليك قوم اغسلها احسنلك ,, وهو مستمر فى الزعيق والضرب وبيقولها اسكتى اسكتى بس خلاص بس بقى خلاص,,ويضربها بأيده الصغيرة ,, وهى مش فاهمة وبتزعقله انت ليه بتعمل كدة"
الحقيقة انا اللى كنت مستغربة هى اللى ليه بتعمل كدة, يعنى معقول مش فاهمه, مش فاهمة ابنك, اللى هو حتة منك, مش فاهمة انه خايف من الكلام اللى انت قلتيهوله بدافع الخوف عليه,,الحقيقة انه خاف منك انت لانك ببساطة باقيته مصدر خوف ورعب بالنسبة له,, هو ماكنش محتاج غير حاجة بسيطة قوى
انك تخديه فى حضنك وتقوليله براحة وبابتسامة حنية الام انه يقوم يغسل ايده بصبونة جديدة فيها لعبة اشترتهالك,,كان هيقوم جرى وبعدين تبقى تفهميه براحة مخاطر الميكروبات والجراثيم وحملة ديتول اللى انت قلتيهالو دى اه هى بدافع الخوف عليه,,لكن تحول الخوف من منك عليه الى منك انت ومن اللعب ومن الاكل ومن كل حاجة,,ليه؟
الخوف اسوء شعور ممكن يشعر بيه انسان,,ولما بنخاف بنتحول الى ناس تانية بنتحول لاطفال محتاجين حضن يطبطب علينا يحسسنا بالامان ويقولنا ماتخفش ياحبيبى وبس كل الحكاية حضن وضمة حنان ماتخدش ثوانى لكن ممكن تطمنا سنين
