وسط زحمة الحياة بنتوه كتير
وياما مشاوير بنلف فيها فى طول اليوم
عل الرصيف ياما قبلنا وشوش منها المالوف ومنها الوحيد
الفريد اللى عمرك ماشفته لكن اول ماتشوفه تحس معاه بعشرة سنين
شفته وقبلته وكلمته حضنت عيونا الوعد
الوعد الباقى من تاريخ البشرية
شبه بيوت كتير حضنتنى وشبه دوامات كتير لفت بية
الضحكة دى انا عارفاها شيفاها سمعاها من سنين
العيون بلمعتها ووحدتها ودمعتها حستها
عيون مش غريبة
حزينة غضبانة وزعلانة
كبرياء وغرور طواحين الهوا فى وش الريح
عند بنت مراهقة كسرة بنظرتها قصبان سجن من حديد
خرقة قماش مهرية ولسة عفية لو دارت على بلاط تنضفه
عزم جبال وشقى وفى قلب الشقة يشق مجرى لنهر يروى غيطان
فينك يانهر الحنان من زمان
مستنية دموع عينى تروى غيطانك من دموع الفرح والاحزان
معاتيه وتهنا فى نفس المكان
ضم الحلم جزة ضلوعك اصرخ واضرب مانت غضبان
بس حاسب وانت بتضرب تطوش ايدك قلوب هلكتها الايام
مش لوحدك اسيت وهرمت
غيرك فى مشوار التيه ياما وشوش وقلوب وعيون تاهت من قبلك
نشف الدمع الوجع وقسيت القلوب من الوحدة
اتكسر فيها ايمانها بكل موجود والذات تصرخ من الضياع والفقر
بكت سنين فى ليالة بردة وحرة وحتى فى الرييع
ماهو اصل البكى مالوش مواسم ..
والحسرة تعصر فى القلوب منغير رقيب
لفيت بينا الدنيا ورمتنا فى نفس الطريق
اصل ايمانها بنت اللذينة ان اللى شبه بعض هيلاقو بعض ولو حتى فى المتاهة ..
