الخميس، 24 سبتمبر 2009

معشوقها الابدى


معروف عن المرأة فى العشق ان معشوقها هو الحياة كلها ، لما بتضحك يبقى عشان هو بيضحك ، الحزن مايعرفش طبيقو لقلبها الالو كان زعلان ، فى غيابه مافيش شمس ، والحياة بتملى الورد لما هو بيبقى حواليها ، الامان مش موجود غير فى حضنو ، والدفا هو لمسة ايدو
مافيش ست مهما كانت قوية وجميلة مابتحسش ان حياتها كملت و تحسب بأنوثتها لما تعيش احلى قصة حب فى الدنيا ...


وهى زيها زى اى ست مابتعرفش تعيش حياتها من غير حب وحبها ومعشوقها الابدى والوحيد هو " الرقص " .......


ماحبتش فى حياتها غيرو ، عشانه عملت كل حاجة ومن غيره الحياة بتقف ومابتحسش انها واحد صحيح الا لما تكون على المسرح بترقص وخصوصا فى المسابقات لانها دايما دايما رقم واحد ..


بس كان دايما عندها مشكلة انها بتبقى زى الفرسة الجامحة لما بيكون معاها شريك قوى فكان دايما شغلها الشاغل ازاى تقويه لو ضعيف


ازاى تحسن منه طول الوقت وتخليه احسن فى حاجة فى الدنيا عشان هى تبان احسن من احسن حاجة فى الدنيا ، ماكنش يهمها مشاعر اللى قدامها تعبان فرحان مبسوط مضايق بيموت ، ولا كان يفرق معاها كل اللى يفرق معاها هى وبس " انت لازم تكون هايل عشان انا اكون عظيمة "


بس هو ماستحملش كتير .. فى الاول كان مش مصدق نفسه مبهور بالحياة اللى هى وفرتهاله فضلت وراه لحد مابقو احس ثنائى والاول فى كل المهرجانات جوايزهم مع بعض كان لها مكانها المخصوص عاشو مع بعض افراح كتير وتعبو مع بعض كتير بس هو تعب منها اكتر كان بيحاول يعمل نفسه مش شايف بس مع الوقت انانيتها وحبها لنفسها " رقصها " اللى هو كان شايفهم معرفش يستحمل ابتدى يحس انه وراها مش معاها مش جنبها ابتدى يحس انها بتستغله وان كل التعب اللى تعبته معاه كان عشانها هى مش عشان هو يبقى حد جامد ويبقى راقص اول حتى لو من غيرها ...

سابها فى يوم فى ليلة لحظة قرر يمشى ومايكملش قرر يخرج من السجن الماسى اللى كان مسجون فيه ، مش عايز تعبك مش عايز نجاحك انا اقدر انجح لوحدى بنفسى من غيرك انا اقدر اكون انا لكن انتى من غيرى هتكونى ايه ؟

مشى غرورو وكبرياءه واكله نار آيده وشعلة حماس وتحدى هنجح من غيرك ...


بس هى تفضل هى انثى لما تعشق تعمل اى حاجة عشان خاطر المعشوق وهى تعشق الرقص راح واحد يجى غيرو، فى اللى فهمها وساعدها وفى اللى غار منها ومن ناجحها وفى اللى اسنغلها للشهرة، بس هى ابدا واقفة صامدة فردها ضهرها ، وهتفضل برضة رقم واحد ، مش هتتنازل يوم عن انها تبقى رقم واحد فى قلب معشوقها ، مش هتنكسر فى يوم طول ما عشقه بينبض حى فى قلبها ، عهدها اللى قطعته على نفسها معاه انه مع بعض للموت ...

تفضل اضواء المسارح وساحات الرقص منورة بيشع منها الضوء والحياة طول ماهى واقفة عليها بتتحرك بكل خلية فى جسمها وروحها تصفيق الناس وهتافتهم جوايز مساباقتها كل ده مش هو الهدف الهدف انها لسة رقم واحد فى قلب معشوقها الابدى ماحدش قدر ياخود مكانها فى قلبه ولا هو عمره فكر يتخلى عنها ، صحت عشانه بالكتير وهو دايما قدارها وفضلت هى رقم واحد .. وفضل هو معشوقها الابدى ...

الاثنين، 14 سبتمبر 2009

علمتنى الحياة


علمتنى الحياة ان يوم ليك ويوم عليك

علمتنى الحياة انه زى ماهتاخود زى ماهتدى

علمتنى الحياة انه فى عز ازمتك الشكوى بتقبى لغير الله مذلة

علمتنى الحياة ان الصاحب الجدع لما تلاقيه امسك فيه

علمتنى الحياة انى لازم اسيب مسافة بينى وبين الناس " احرص ولا اخوانش "

علمتنى الحياة ان الناس سواسية كأسنان المشط

علمتنى الحياة انه عمر ماهيبقى قى حاجة اسمها ديمقراطية على مستوى حكومات طالما احنا بنمارس الدكتاتورية على ابن البواب

علمتنى الحياة ان عمر الحكومات ماصنعت شعوب ، لكن الحكومات صناعة محلية شعبية مهما طلا الزمن

علمتنى الحياة انه مش غلط انى ايأس للحظة عشان لما هدوق اليأس هعرف طعم الامل

علمتنى الحياة ان حب حياتك مش لازم يكون هو احسن حد فى الدنيا

وعلمتنى ان الحب هو لحظة بتيجى ويابنحس بيها سوا يامابتجيش

علمتنى الحياة احب الموت بس ماتنماهوش

علمتنى الحياة انى لما اخاف معناه فى حاجة عندى اخسرها

علمتنى الحياة ان الحب وردة ترويها تعيش وترعرع ، تهملها تموت بس ريحها بيفضل فيها

علمتنى الحياة ان الانانية بتكسب بسرعة ، بس خصراتها اقرب زى البورصة

علمتنى الحياة ان مصر بلد خير 7000سنة حضارة وسرقة بس لسة فيها خير

علمتنى الحياة ان من خاف سلم ، ومات وحيد

علمتنى الحياة ان لا البكى بيدوم ولا الضحك بيفضل بس الضحكة تطول العمر والحزن يقصفه

علمتنى الحياة ان مافيش حاجة اسمها قرار صح وقرار غلط ، فيه اختيار اشوف سعدتى او شقائى فى اللى اخترته

علمتنى الحياة ان فيها اسود وابيض .................... والوان

علمتنى الحياة ان فيها كتير شقى .. بس فيها لحظات حلوة

وعلمتنى انى لما الاقى اللحظة الحلوة امسك فيها بأيدى وسنانى ومتع نفسى بيها على قد ماقدر

علمتنى انى " اعمل لدنياك كأنك تعيش ابدا ، واعمل لاخرتك كأنك تموت غدا "

بس ماعلمتنيش ازاى !!!!!!!!!!!!!؟

الجمعة، 11 سبتمبر 2009

من مفكرة زوج.......


زى كل يوم بالليل قبل ماينام لازم يفتح المفكرة بتاعته ويقعد يكتب عن اهم الحاجات اللى حصلت فى يومه ، الناس اللى قابلها ، المشاعر اللى حس بيها ، كل حاجة عنه وعن حياته بيحب يكتبها كل يوم قبل ماينام ، لانه شايف ان دى اكتر حاجة لما يسبها للولاده هتنفعهم وتفيدهم

مش عشان هو احسن راجل فى الدنيا ولا عشان انجازاته لاتعد ولا تحصى ، ولا فيها ميراث مادى

لكن هو شايف انه رايه فى حياته وفى نفسة وفى ولاده ممكن يعمل حاجة حاجة فى شخصيتهم ممكن يقرو كلمة تنفعهم او يحتعلمو احساس جديد يعنى هو ده تفكيرو

وانهاردة كان عنده حدث مهم حصله موقف شافه وكان مهتم قوى انه يكتبو ويحكى لولاده فى المفكرة بتاعته

" انهاردة رجعت من الشغل متأخر شوية عن كل يوم فاكنت متوقع انى هلاقى الولاد نامه ومش هعرف اشوفهم وارغى معاهم شوية عن يومهم زى كل يوم ، وصلت البيت ودخلت مش سامع اى صوت روحت ابوص عليهم لاقيت الولاد كلهم مالفوفين حوالين امهم فى المكان اللى بتعد تشتغل فيه فى البيت واللى قاعد على كتفها واللى قاعدة على رجلها واللى فوق راسها ، بصراحة المنظر خضنى متجمعين ليه كدة ياترى اه شكلها كدة داخلين على خراب فى المزانية ...

بس الكلام والمناقشة اللى سمعتها خلتنى مطمن قوى وماحبتش اقطع عليهم القاعدة الجامدة دى واكتافيت انى اسمعهم واراقبهم من بعيد وبس

- مامى ، احنا عايزين نسألك على حاجة هو انا معنى اسمى ايه ؟

- بتسألى ليه ؟

- عشان انهاردة فى المدرسة ميس هنا سألتنا عن اسامينا ومعناها ومين اختاره لينا ؟ فا انا قلتلها معرفش وسألت اخواتى واحنا مرواحين فى الباص برضه ماحدش يعرف فاقولنا نيجى نسألك

- ههههههه ، ماشى نبدأ بيكى انت عشان انتى الى سألتى

انتى اللى اختارلك اسمك انا وطبعا بابى وافق عليه ، انتى اسمك لى لى ورده اسم وردة انا بحبها قوى قوى هى الودرة اللى انا زراعها عندى وبتيجى دايما معايا وانا باخود باللى منها وحابيت اسميكى على اسمها لانك نقية ورقيقة وزى الامر زيها كدة وكمان عشان كل ماتشوفيها تحسى انك شايفة عندك وانك قد ايه حلوة وجميلة ورقيقة ، عجبك اسمك ؟

- اه حلو انا كمان بحب الوردة دى زيك يا مامى

- وانا يا ماما ..

- انت ياحبيبى اكبر اخواتك انت ابنى الاول واكيد ماكنتش عارفة انا هخلف كام واحد بس حابيت اسميك آدم عشان سيدنا آادم هو ابونا كلنا كلنا جينا منو هو وانت الكبير وكنت بتمنى انك تبقى اب وسند وضهر لخواتك وانت اللى تاخود بالك منهم ، عشان كدة ساميتك آدم ..

- طب وفيروز ؟؟

- اقول انا يامامى اكيد عشان بتحبى اللى بتغنى دى صح ؟

هههههههههه ، اه يا روحى صح ، انا المغنية اللى دايما اغانيها شغالة طول الوقت دى اسمها فيروز وانا بحبها جدا ، ونفسى انك تبقى فى عذوبة ورقة ودفا صوتها واقولك على سر ، نفسى تحبيها زىى عشان كدة باحاول اسمعهالكو كتير ، وانتى بيبى كنت بنيمك على اغانيها

- طب مانت بتحبى محمد منير كمان يا مامى بس انا مش اسمى منير ؟

- انا لو كنت سميتك منير كان ابوك طالقنى ورمانى ورماكو من الشباك ههههههه ، لا يا بيبى انا سميتك يس لاسباب كتيرة قوى

اولها ان فى سورة حلوة قوى فى القرآن اسمها يس لسورة دى ربنا بيكلمنا فيها كلام حلو قوى وكمان لما بنقراها عشان اى حاجة نفسننا فيها ربنا بيقبلها مننا ويساعدنا نعمل كل اللى احنا عايزينو ، وانا كان نفسى يبقى فيك الصفة دى ، ان لمل حد يطلب منك حاجة انت تقدر تعملهالو تساعدو على طول .. وتانى سبب ، ان زمان كان فى بيبى صغير انا كنت بحبه قوى وكان برضه اسمه ياسين

ها عرفتو بقى ليه اساميكو ومين اختارهالكو ومعناها ايه ؟

-- بصراحة انا لما سمعت منها الكلام دة ماصدقتش ، عمرها ماقالتهوللى حتى واحنا بنختار الاسامى كانت محاسسانى انه اى اسم عندها عادى ماتخيلتش ان ورا كل اسم من اسامى ولادى حدوتة طويلة كدة وحلوة كدة يمكن الوحيدة كانت واضحة لية فيروز لان مراتى حبيبتى مدمنة لفيروز واى احول هيعرف لكن لى لى وآدم وياسين دى اللى كانت جديدة عليه

بعد ماسمعت الحوار ده بينكو بين مامتكو من ساعتها وانا براقب تصرفاتكو وخد قرار انى لازم اساعدها انها تحقق احلامها فيكو وكمان احلامى معاها ... ياولاد امكو بتحبكو قوى وانا ابتاديت اغير منكو عليها بس اعتقد انى لو سألتها عن اسمى هطلعلى وراه برضه قصة ماهى اصلها لازم ورا حاجة يبقى فى احساس ، حلم ، قصة حب بينها وبين اى حاجة حتى اساميكو

الموقف ده غطى على ى موقف حصللى انهاردة مع انه كان يوم مليان بالمواقف ، بس اللى يروح بيته ويلاقى زوجة عاملة كدة واولاد بالجمال والروعة دى ، لازم ينسى اى هموم ومشاكل :)

ملحوظة : وعلى فكرة انا كمان اختارت معاها اساميكو مش هية بس ها .... بحبكو قوى :)

23رمضان

13سبتمبر

سنة .................................

الاثنين، 7 سبتمبر 2009

الوردة ...


الوردة

طول ماهى مقفولة بنفضل رايحين جايين عليها نسقيها

، ناخود بالنا منها

، نستنى لما تفتح عشان نشوف لونها ونشم رحيتها

واول ماتفتح شوية بشوية وتبدأ تكشف عن اوراقها

ناخود بالنا منها اكتر واكتر

واول ماتفتح شوية اكتر نتعلق بيها اكتر

وتبدأ تورينا جزء اكبر من جمالها والوانها وتبدأ تغازل مشاعرنا بريحتها

واول مايجى اوانها

وتكشف عن كل اسراها وجمالها والوانها

نحس اننا فى الجنة ، لونها يسر عينيك ونظرك

ريحتها تدغدغ مشاعرك تهزها من جوة قوى

كلها على بعضها تملى قلبك وتسعده وتخلى فى حالة من النشوة

تلاقى نفسك دخلت معاها فى قصة حب وعشق وغرام

تلاقى نفسك خايف عليها

تلاقى نفسك غيران عليها حتى من ستنشاق النحلة لريحقها

كل ده يخليك تجرى عليها عشان تقطفها وتخبيها عندك

بس اللحظة اللى هى انت بتعتبرها اكتر اللحظات اللى بتعبر فيها عن مدى حبك للوردة

ماتعرفش انك مجرد قطفك ليها من غير ماتكون فاهمها وعارف منين تقطفها ده ممكن يضيعها منك للابد

قطف الورد له اصول عشان ماتدبلش وتموت وتعيش معاك اطول واطول ويعيش فيها ريحها اللى طير عقلك

الوردة حساسة ورقيقة صحيح لها شوك وبيجرح بس مهما كان جرح شوك الوردة ، مش هيكون اد جرحك انت ليها لو قطفتها وانت مش فاهمها ، شوك الوردة حماية ربانى ، عشان يحميها من الايد الطايشة اللى ممكن تطمع فيها ، لان اللى هيحبها بجد هيستحمل شوكها او على الاقل هيتعلم ازاى يحافظ عليها وبرضة من غير ماينجرح من شوكها ، لكن لو لزم الامر وانجرحت من شوك الوردة فانت برضة بتحبها وكله يهون عشان خاطر عيون الوردة ....

الوردة ..

تحبها ، تحافظ عليها ، تسعد قلبك وتحرك مشاعرك

الأربعاء، 2 سبتمبر 2009

بفضل الله


تعبت ، ضعفت ، اتكسرت ، يأست

شوفت الدنيا سودا من حوالية

كلامى بقى عبارة عن شكوى وآه سؤال ليه وعشان ايه وازاى ؟

وحدتى زادت

بعدت الناس وفى عيونهم نظرات غريبة

دورت من حواليهم انتو بتعملو كدة ليه ؟

ليه بتسبونى وتمشو ؟

ليه النظرة دى فى عينيكو ؟

حد يرد عليه ويكون عنده الشجاعة

انا !!! انا بتبعدو عنى انا

جالكو قلب تبعدو عنى وتدونى ضهركو

اصرخ واجرى !! بس ماحدش يسمع صراخى والدنيا ديقة مش مستحملة جرى

انا فية ايه ؟ ليه حاسة ان الدنيا بضيق علية واحدة واحدة ؟ ليه فجأة لأتنى عايشة فى صندوق مافيهوش فاتحة تهوية؟

انا عندى ضيق تنفس !!؟

انا قلبى ضرباته مش مظبوطة !!؟؟

اجرى عالطبيب ، الحقنى ياطبيب انا ايه علتى ؟؟

جاوبنى الطبيب : علتك الكبر ، فرحتى بنفسك وتكبرتى على الخلق والخالق

عجبتك حكمتك وعقلك ، غاروكى لكا قالولك انتى الكبيرة وصاحبة القلب الكبير والعقل الكبير

صدقتى انك انتى صاحبة الفضل فى ده ونسيتى ان اللى آداكى العقل والقلب هو العاطى الوهاب سبحانه

بعدتى عنه ونسيتيه عصيتيه وتقلتى كتفك بذنوبك وسودتى دنيتك بكبرك وغرورك وقفلتى قلبك بعدم الثقة فى اى حد مانتى احسن من اى حد

طفيتى شمعة الحكمة اللى عطاكى الحكيم اياها ونسابتيها لنفسك ونسيتى انه الفضيل هو اللى ليه الفضل فى انه ياخد او يعطى سبحانه

كبرك صورلك نفسك احسن الناس صدقتى انك فاهمة فى كل حاجة واطنتطى على الخلايق واستكبرتى على النصيحة والمشورة " انا عارفة " علتك الكبيرة ونسيتى انه فوق كل ذى علم عليم سبحانه

افتكرتى انه عندك دوا لكل داء ونسيتى انه فى حاجة اسمها تخصص وان مافيش حد عنده كل حاجة لانه هو وحده الشافى سبحانه

كبرك وغرورك صورلك انه ماحدش قدك فى الحكمة والعقل ومافيش حد ممكن يساعدك مانتى الكبيرة بقى يساعدك ازاى

كان لازم توقعى وتضيق عليكى وتعيشى فى صندوق مقفول

اصل مين ممكن يتكبر على الله سبحانه العاطى الوهاب الفضيل

- دوايا ايه يا طبيب ؟؟

الفضل لله وحده ، اشكرى الله انه بفضله خلق الدوا مع الداء

من تواضع لله رفعه ، التواضع اهم دوا لداء الكبر احنى راسك لله حسى السجود وانتى بتقوللى " سبحان ربى الاعلى " هوا فوق وانتى تحت

تحت بتسجديلو وانت اقربله فى سجودك ده

الدعاء ، ادعيلو توبى واستغفرى اطلبى منه التوبة بقلب صافى ونية خالصة

الحمد ، الحمدلله ، كله من عند الله مافيش حاجة من عندنا سبحانه الفضيل كله بفضل الله

سبحان مقلب القلوب ، اللى كسرتيه فى نفسك بأيدك ، ممكن يتصلح بتوبة نصوحة لله ، كله بفضل الله ، واللى بعدوه عندك بسبب كبرك ، بتواضع منك ومعاملة حسنة ، وحب فى الله كله يتصل بأذن الله ، حبيهم انتى بس فى الله وفاتكرى انه كله بفضل الله

سبحان الله وبحمده ، سبحان الله العظيم

الحمدلله

ولااله الا الله

والله اكبر

ولاحول ولاقوة الا بالله

وانشاء الله ربنا يتقبل منك ويشفيكى ويتوب عليكى ويعفو عنك وعننا جميعا ، قوللى آمين

آمين :)