الأحد، 19 أكتوبر، 2008

فى الليل................

فى الليل ...بتصالح مع نفسى
فى الليل...بشيل القناع من على وشى
فى الليل ...بلاقى اللى بدور عليه
فى الليل...بفتكر اللى واحشنى
فى الليل...بطفى النور واعيش على نور الشمعة
فى الليل...مافيش دوشة
فى الليل....مافيش كذب
فى الليل...النجوم بتلالء فى السما
فى الليل....القهوة ليها طعم تانى
فى الليل....صوت فيروز يتسمع من القلب مش من الاذن
فى الليل....كتابى ينام فى حضنى واسرح فيه
فى الليل...بنسى الاسية وافتكر الذكريات الحلوة
فى الليل....امبارح خلص وبكرة لسة ماعرفوش
فى الليل....بحضن نفسى واحس بالامان
فى الليل....اقدر المس ملامحى فى المرايا
فى الليل ....كلبى الصغير بيصحى ويعد يلعب تحت شباكى
فى الليل.....بقدراحس ان احلامى اقرب ليا
فى الليل.....دموعى بتلاقى حريتها
فى الليل....تفاجئنى ابتسامتى انها كانت مستخبية
فى الليل.....بلاقى الحب
فى الليل....بلاقى الامل
فى الليل.....بلاقى الحق
فى الليل.....بلاقى النية الصافية
فى الليل....بعرف الحقيقى من الكداب
فى الليل....بواجه نفسى
فى الليل....بعيش حياتى على مزاجى
فى الليل....برقص مع النجوم على انغام ضوء القمر
فى الليل......علاقتى بربى دايما احسن واقرب
لو عليه اخلى كل اليوم ليل ..................................لكن للاسف ماينفعش

الاثنين، 6 أكتوبر، 2008

من وحى مسلسلات رمضان2008

من وحى مسلسلات رمضان 2008 المانشيت الرئيسى فى كل الجرانين"قرار العفو من رئيس الجمهورية عن الصحفى............من التهمة محل القضية,وهى الترويج لشائعة مرض سيادته"
أحب اتوجه بالشكر لكل من الاستاذة الفظيعة "امينة درويش" يسرا على مسلسلها الرائع اللى خلى الناس كلها من اصغرها لاكبرها يقدرو الصحفى ويشوفوه بيتعب ااى وازاى هو رقيق وقمر زيك كدة وحرام يتبهدل,,وازاى انه سوبر يعنى واتر بروف ضد الميه ضد النار ومابيجرالوش حاجة خالص
كما احب اتوجه برده بالشكر للاستاذ يوسف الصياد"خالد صالح"على شخصيته الصحفية الجميلة الرائعة اللى برده سوبر ,,مبادىء وقيم وشرف وحالة ازدواجية رهيبة واخيرا خطف الصحفى الهمام وقدرته على الهرب بعد الخطف ب4سنين بس طبعا يصع العودة فى ظل حالة التربص من ناس جوه وبره ده طلع الموضوع اكبر من جوه بس ده كمان ليه ذيول بره ماحدش يعرف عنها حاجة,,والله صعب عليه وبكانى
ياترى بقى يا هلترى كان اصحاب الاعمال الدراميه الرهيبة دى متخيلين النجاح للدرجة دى
ولا يا ترى ده انتصار جديد يوم ستة اكتوبر عشان الناس تنسى الانتصار القديماللى من خمسة وتلاتين سنة عشان يبقى ده طازه فريش ماهو برده خمسة وتلاتين سنة كتير فا عايزيين حاجة يشهدلها الاجيال الجديدة فا يلى نعفو عن الصحفى اللى اتمرمت سنة بحالها مرفوع عليه قواضى من الدنيا كلها تقريبا,فانزل الحكم ل ستة شهور وبعدين شهريين كتر خير الاستأناف وبعدها قرار العفو,,ودى الحلقة الجديدة من المسلسل
ياخوفى يابدران لا يكون قرار متهور زى قرار ال التلاتين فى الميه زياده وتانى يوم تترفع الاسعار
انا اكيد مش مضايقة من القرار ده انا طبعا مبسوطة جدا للاستاذ "ابراهيم عيسى"لكن احنا للاسف عندنا خبايا كتير وناس كتير لما تقول يمين هما يعملو الشمال على طول وش يعنى ماعندهمش تفاهوم وكأنهم بيطلعو الريس مش فاهم حاجة,,يعنى فى القضية دى الريس كتر خيرو سامح فى حقه وعف عن الراجل لكن اصحاب المصالح مش هيسيبوه فى حاله,لان مقالته الشهيرة ماكنتش عن الريس فى حد ذاتها دى كانت عن لعبة البينج بونج بين فريقين"فريق جيمى واللى معاه" و فريق"شوشو واللى معاه" ودول بقى مابيطلعوش فى خطب فى الاعياد الرسمية ويقررو قرارات عفو عن البنىءادمين
عشان كدة انا مش حاسة بنصر ,لكن يمكن الحاجة اللى ممكن اقول انها لفتت نظرى كحاجة ايجابية هى ان الريس فعلا حاسس بالناس اللى بتتكلم وان فعلا هو دماغه مش تايهة عن اللى بيحصل جوه وانه عارف ان لكل حاجة وقتها , وهى خطوة كويسة
بس بعد ايه,,يعنى اقصد,,الموظفيين فى الضرايب بيخدو حقوقهم بعد اعتصام
افران العيش مش بتزيد ويبقى فى رقابة الا لما تحصل موصيبة والناس تموت
العشش ماتتحولش شقق الا لما الناس تموت تحت الظلط والطوب
نعمل سنة ستة ونلغيها لما الدنيا تخرب ونرجعها لما خربت اكتر
نقول زحمة مرور,,يقولو قانون جديد شنطة اسعاف ومثلث,,وانشاء الله هيتغير برده
لازم القطر يولع عشان نصلح
المترو خربان نزود اعلانات
نحبس صحافيين وبعدين نعفو عنهم
ايه فى ايه بقى احنا هنقديها كدة بقى ولا ايه
بس سيبك انت يسرا كانت قمر المسلسل وابسط يا عم ابراهيم ياعيسى اكيد يسرا القمر هتيجى تزورك مش زمية مهنة وبايونك وامن وايدها امينة!!!!!!!!!!!!!!!!!!!!!!

الخميس، 2 أكتوبر، 2008

حاجات كتير

مش عارفة أبدأ منين,,
فى حاجات كتير ..نفسى احكى عنها
فى حاجات كتير..وحشانى
فى حاجات كتير,,قلقانى
فى حاجات كتير كتير محيرانى
نفسى احكى عن ظلمى لناس كتير كان بينا حاجات حلوة لكن دخل بينها حاجات صغيرة غيرتها وبوظت حلواتها حاجات خلت اللى فات بقى ماضى يتلعن ايامه بدل مايتقال عليها كانت احلى الايام
نفسى احكى عن غبائى وعن الناس اللى جيت عليها عشان ناس تانية ماتستهلش
نفسى احكى عن علاقتى بربى العالية ساعات واللى بتكون بعيدة ساعات ةازاى كل مااحتاجله الاقيه ,لكن كتير ببعد....
نفسى احكى عن تمشية حلوة مع الصحاب فى وسط البلد,,ولا على شط نيل الزمالك ساعة عصارى
نفسى احكى عن اللى حب ولا طلش وعن اللى حب وطنش وعن اللى حب واتحب وفرقت بينهم الايام وعن اللى حب واتحب وعدى الريح ووصل لبر الامان وهو مشبك ايده فى ايد حبيبه
نفسى احكى اللى الحب عنده بقى اسمه عايز اريح ضميرى من ناحيتك,,,ياعزيزى الحب شىء ووجع الضمير شىء تانى
نفسى احكى عن حاجات وحشانى.......
وحشانى الضحكة الطالعة من جوة حضن القلب
وحشانى الشلة اللى غاوية تهييس وضحك وضربة الدنيا ضرب
وحشانى السهرة فى بلكونة جدى على صوت الست فى ليلة الخميس
وحشانى البسمة ساعة اللقى,,والبوسة ساعة الفراق
وحشنى صوت فيروز مع كتاب الرباعيات قصاد الدفاية فى برد ليلة شتا
وحشتنى اللمة ساعة المغربية مع صوت المدفع والشيخ رفعت وكوباية القمر الدين
وحشتنى صديقتى الوحيدة,,والبعيدة وبينى وبينها بلاد بس من غير مسافات
وحشنى صديق وحيد بعيد حضن الاهل والوطن والحبيب
وحشنى احساس كان عندى زمان غاب ومعادش بيجى يزورنى اد ماكان بيجى زمان
قلقنى حاجات كتير,,,,
قلقنى اتنين كل مناهم يجمعهم بيت ومن الدنيا مش عايزين غيره
قلقنى واحد لسة ماعرفش طريقه ولا عدوه من حبيبه
قلقنى حلم بعيد قوى عنى تحقيقه
قلقنى مستقبل جيل بحاله جى بكرة وبكرة بتاعه مش بعيد لكن ملامحة لسة مش باينالى
محيرنى سؤال,,كنت صح لما اخترت الحلم ده دون كل الاحلام؟
محيرنى انسان,,مرتاح فى البعد؟ولو مش مرتاح طب ليه مصر عليه؟ولو مرتاح طب بيحوم ليه؟
محيرنى التانى,,حس انه وصل للى هو عاوزة وبيحلم بيه؟
محيرنى قلبى وعقلى ؟هو ده الوقت اللى لازم نعيش فى؟ولا كان احسن لينا وقت تانى؟ولا لو علمتم الغيب لاخترتم الواقع؟
محيرانى نفسى,,,هو انا صحيح زى ماهما شايفين؟ولا انا زى ما انا شايفانى؟ولا انا حد تالت غير الاول والتانى؟
سؤال اخير................هو انا قلت اللى عاوزة اقوله,ولا انا ماقلتش حاجة خااااااااااااااالص؟!؟!؟!؟!؟!؟!؟!؟!؟
وسؤال لليعرفنى بس...........هو انا مجنونة!!!!!!!!!!!!!!!!!!!!!!!!!!!!!!!!!!