الأربعاء، 28 أكتوبر، 2009

الرجل الثالث .......


لما نزلت من البيت انهاردة الصبح ماكنتش ابدا اتخيل ان ده اللى ممكن يحصل فى اليوم ده ، ماتخيلتش ابدا ان هلاقى حد غيرى ممكن يكون حاسس نفس الاحساس اللى انا حاسيته .. كنت متأكد انى حاضن لوحدى حزنى عليها ، وانى هشوفها وهى بتدبل قصاد عينى كل يوم اكتر من اليوم اللى قبله لوحدى .. لحد اليوم ده كنت فاكر انا لواحدى اللى بتوجع عشانها .. كنت فاكر انى انا الوحيد اللى كان بيحلم وبيتمنى انها تعيش معه العمر كله .. لحد اليوم ده كنت انا اللى مشيت معاها مشوارها الاخير الحزين المليان خوف وعذاب وآلم ولحظات فرح وسعادة وهدوء هى كانت بتصنعها عشان تهون عليها وعلية الايام المرة .. لحد اليوم ده كنت فاكر انى انا ليها وهى ليه وان مافيش حد فى الدنيا دى كلها ممكن يعملها نص اللى انا بعمله انا حياتها وهى عمرى ولو كنت اقدر اديها عمرى وصحتى وروحى وكل حاجة كنت عملت كدة وانا مغمض عينى وسايب ايدى فى الهوا .. لكن للاسف حتى لما بنحس اننا نقدر نعمل كل حاجة للى بنحبه ، دايما بنكتشف انه لسة فى تانى هو محتاجه بس مش عندنا مش موجود فى حياتنا مش ملكنا فامش قادرين نديهولو .. هى دى الحياة

بس انهاردة خلاص هى مابقاش عندها حياة انهاردة خلصت حياتها خلصت وخلص معاها العذاب اللى عاشته قبل النهاية شهور وايام ، خلصت حياتها قبل ماتبدأ ، خلصت حياتها وهى كانت بتحاول ماتزدش عذابها بعذابى ، خلصت قبل ماتقولى هى قد ايه بتحبنى وقد ايه انا بحبها حياتها خلصت وانا لسة عايش ، قلبها وقف وانا لسة قلبى بينبض ، خلصت حياتها بس حبنا لسة ماخلصش ... ومش هيخلص .

لما وصلت للوداع الاخير لحب عمرى ماكنتش انا لوحدى اللى هناك .. كانت اول مرة تصدمنى من يوم ماعرفتها صدمتنى وهى مش قصادى فاللاسف مش هعرف اتاخنق معاها ولا حتى اسألها .. لما وصلت كان هو كمان هناك

مين ده ؟ يعرفها منين ؟ ومدام عارف انها موجودة وبتتعذب سابها ليه وعمره ماجه ليه ؟ اخوها ؟ لاء انا عارف اخوها ؟ صديق قديم ؟ انا عارفهم كلهم وراتنى صور لكل الناس اللى كانو فى حياتها واللى هى كانت فى حياتهم ؟ حبيب مجهول ؟ مين ده اللى هيشاركنى وداعى الخاص لحبيبتى ؟ مين ده ؟

من كتر صدمتى وقفت مكانى للحظات وماكنتش عارف اروح اقوله ايه ؟

لماوصلتله كانت حلته عجيبة مانعنى صوت بكائه العالى من انى أسأله عن اى حاجة او يمكن سألته من كتر ماكان حزين وبيبكى بحرقة ماسمعنيش . اول حاجة قالهالى انت اتأخرت ليه ؟

بصتله وانا مندهش انت اللى بتسألنى ، مين انت اصلا ؟ طبعا قلت فى سرى حالته كانت ماتسمحش .. بصراحة انا غيرت منه من حزنه عليها ، يمكن عشان انا مأهل نفسى من زمان على فراقها بس ده مش مبرر يخلينى كدة ! طب ايه ؟ صدمتى من اخينا ده مثلا ؟ انا مش فاهم حاجة ...

رديت عليه ، اتأخرت يعنى ايه ؟

كانت بتسأل عليك ، كانت مستنياك عشان تقولك " سلام " اشوف وشك بخير ؟ انت كنت فين ؟

معلش يعنى ، هو مين حضرتك ؟

انا اللى هعيش عمرى كله ندمان على اليوم اللى سبتها فيه ..

انت ماكنتش حابيبها .. انا عارف حبيبها اللى كان قبلى وراتنى صورته وحاكتلى عنه . مش انت .

ماهو انا اللى عملته يخلينى ماستهلش حتى انى اجى بالها تانى فى اى يوم فى الحياة ، الحمدلله انها ماحكتلكش علية لانى ساعتها كنت هعرف انها سامحتنى او فاكرانى وده كان هيريحنى ويرضى غرورى كلعادة ، لكن نسيانها ليه ده هدية ليه !

انت عجيب شويتين ، مين انت ؟ ولما انت كدة بالنسبلها انت ازاى عرفت انها هنا ؟

انا هنا بالصدفة المستحيلة انا اصلا فى المستشفى هنا عشان ....................................................... سكت كتيير قوى وعياطه ماهديش لحظة واحدة

يا استاذ ....... انت هنا عشان .. ايه ؟

انا هنا مع مراتى .. بتولد وكنت مارر بالصدفة وشفتهم وهما بيخرجوها من قوضتها على العناية .. ماصدقتش الحياة اللى احنا عايشنها بعد العمر ده اقابلها فى الموقف ده .. انا كنت فين كل السنين دى ؟ سألت عنها وعرفت انها هى .. الانسانة اللى كنا فى الموقف ده من اكتر عشر سنين يوم ماتقبلنا فى حادثة وفادتنى هى وانا خرجت منها سليم ناسيها ومعرفش عنها اى حاجة ..

انا مش فاهم !!!!!!!!!!!!!!!!!؟ يعنى ايه حادثة ؟

كانت حادثة عربية خبطتنى بالعربية وجابتنى المستشفى ودفعتلى كل حاجة وفضلت جنمبى لحد مافوقت وعملت المحضر وادنتها وماتنزلتش وعملتها قضية وطلبت تعويض وكل ده كان بعد مافوقت من غيبوبة شهر هى فضلت الشهر قاعداه جنمبى وانا بكل بساطة اول مافوقت عملت فيها كدة ، بعد القضية هى فضلت متكفلة بعلاجى اتحدد معاد للقضية فعلا بس قبلها على طول اقنعنى المحامى بتاعها بأنى اتنازل وكفاية اللى دفعته فى العلاج وكمان التعويض اللى هى مستعدة تتدفعه وقفت بعد ماطلبت فلوس كتير وهى دفعتها بكل هدوء وأدب ،، عدت شهور وسنين وكانت دايما بتسأل عنى وعن اخبارى واللى عرفته انها لما عرفت انى هبدأ شغل ساعدتنى من غير ماعرف وده عرفته بعدها بكتير قوى واللى عرفته اكتر انها كانت بتحبنى وانا زى الحمار خدت منها كل ده وسبتها ورمتها ورا ضهرى حبيت واتجوزت وخلفت وده تانى عيل ليه وكل ده من فضلها هى ومع ذلك عمرى ماجتلى الفرصة انى اشكرها اوحتى اعتذرلها ، دخلتلها العناية وحاولت اكلمها بس مش عارف هى هتعرف ده ولا لاء ...

انا مزهول من اللى انت حكيتو ، ومزهول اكتر انها عمرها ماجابت سيرة حاجة زى دى

اعتقد ان الكلام فى الموضوع ده مايسعدش اى حد انه يتجاب سرته تانى ماحدش يحب يوجع نفسه

مش بس وجع الواحد لما بيعطى مسكين او شحات مابيقولش ،، قلتهالو واانا كان نفسى اخنقه بألأيدى

عندك حق هى كانت اكرم من انها تحكى حكاية زى دى

الحياة مليانة مفاجأت

عندك حق بس دى فاجعة مش مفجأة ، انا عش معاها سنين وشهور ألم وعذاب وحب وكنت فاكر انى انا وهو بس الراجلين الوحيدين اللى فى حياتها ، اتارى فى راجل تالت واحنا مانعرفش عنه حاجة ولو ان كلمة راجل دى يعنى ............ خلاص

وقفنا احنا الاتنين من ورا الأزاز نبص عليها وهى بتروح من بينا

راحت حياتها وخلصت وانا وانت وهو عايشين وحياتنا بتنبض انت عندك بيت وولاد وهو كمان وانا ماكنش ولا هيكون لية غيرها ومع ذلك كل اللى هى ساعدتهم وملت حياتهم فرحة وسعادة موجودين وبينبضوا وهى اللى قلبها وقف عن النبض والحياة

اللى مصبرنى انها هتعرف بحالنا برضه وهتفضل تسعادنا حتى وهى مش معانا .. كفاية بس نفتكر اى لحظة معاها واحنا هنلاقى نفسنا بنبتسم .. الكلمات دى جت من صوت تالت غيرنا احنا الاتنين

مين ده كمان ؟

لاء ده انا عارفة كويس ... القدر هو اللى جمعنا احنا التلاتة عشان نودعها يمكن معرفناش نجتمع عشان نسعدها فى الحياة كل واحد فينا عملها حاجة على حدا لوحدة فرح او حزن لكن دلوقتى احنا هنا واقفين وهى خلاص ماشية .. والحياة لازم تستمر


كنت فاكر انى هخدك فى حضنى فى هدوء واسبك تمشى فى هدوء اللى كنتى دايما بتحبيه بس القدر هو اللى عايزك تمشى فى احتفالية وسط اللى حبيتيهم فى حياتك واللى كنتى بتتمنى تعيشى معاهم على حدا طبعا حياتك فى هدوء ، شاركونى وداعك ده كل اللى قدرو عليه بس ماحدش شاركنى آلامك وعذابك ووحدتك وخوفك انا وحدى اللى ليه الحق انى اودعك لوحدى .. سيبونى معاها لوحدنا انتو عمركو ماهتسعدوها ولا هتسعدوها سيبونى انا وهى بس ... دى حبى انا وحياتى انا انتو مالكوش فيها . انت عمرك ماحبتها وسيبتها تضيع منك زمان ، وانت ياراجل ياتالت روح حش بالذنب بعيد عنها هى مش محتاجة ندمك ولا ذنبك ، هى محتاجة حبى انا وانا هيبها تروح فى هدوء حبى ودفا قلبى انتو مالكوش فيها اى حق ... امشو من هنا حالا

حبيبتى انا وانتى وبس انتى حبيبتى انا ومش من حق حد غيرى يوصلك لرحلتك .. توصلى بالسلامة ياعمرى ........

الأحد، 25 أكتوبر، 2009

الهدية ....


الهدية ..

كلمة كلنا بنحبها " هدية " مين مابيتبصتش من الهدايا خصوصا وان الايام اللى احنا فيها دى اللعب فى تصميم الهدايا وطرق تقديم الهدايا بقت حاجة فوق الخيال وكمان المنسبات اللى بنقدم فيها الهدايا مشاء الله بترف علينا ايه تمام يعنى واختراعات بقى ، يعنى زمان كان يادوب هدية عيد الميلاد ، عيد الجواز ايام ماكانو بيعملو حفلات كتير ، لكن دلوقتى بقى عيد ام وعيد اب وعيد حب ودباديب بقى ورورد وشموع وهنا والزيارات العائلية ويوم الخطوبة ومين غير مناسبة مدام مصاحب يبقى لازم هدايا اتجوزت يبقى لازم هدايا عمال على بطال وألا تبقى زوج اوصاحب او خطيب ممل او مابيفهمش فى الزوق ، ولو مادخلتيش على حماتك بهدية تبقى امك مافهمتكيش ايه هو الذوق .. وليلة بقى

جميل الهدايا حاجة لطيفة وبتسعدنا طبعا ، واكيد كلنا فاكريين لما كنا صغيرين واهلنا كانو بيعملولينا اعياد ميلاد وتجلنا الهدايا واللعب كنا بنبقى طايرين ومانمش طول الليل واحنا عمالين نفتح فى الهدايا ونشوف اللعب الجامدة من اللعب اللى اى كلام ونحب طنت فلانة اكتر عشان جابت هدية احلى من طنت علانة وحاجات كدة ... بس لما بنكبر بيفضل احساسسنا بالهدايا زى ماهو ؟

الهدية دلوقتى ليها معانى تانية كتير ، مابقتش هاحبك عشان انت جايب احلى هدية ، ولا بقينا بنستنى عيد الميلاد عشان نشوف اللعبة الجامدة اللى هنلعب بيها ، بنختلف ومفهوم الهدايا عندنا بيختلف ، وانا من الناس اللى الهدية عندهم للاسف مسألة معقدة شوية ، يعنى زى حاجات كتير فيه اشمعنا دى اللى هتبقى مش معقدة ههههه ، يعنى اقصد ان الهدية اولا هى الحاجة اللى بنعبر بيها للى قصادنا اننا فاكرينه مش مجرد واجب ولازم نعمله ونخلاص ، يعنى مش عشان فلان جابلى هدية يبقى لازم ارودهاله عشان بجد المفهوم ده موجود عندنا قوى وبيحرق دمى قوى ، لاء ياعم خلاص لومجاملة وواجب ولازم نخلص منه يبقى اصلا علاقتك بالشخص ده علاقة مش حقيقية مش نقية وانا مابحبش النوع ده من العلاقات لانه عدمه احسن منه اصلا ...

لاء الهدية مش كدة .. اصلا الهدية معناها انك حد جدير بكل الحب والاحترام والتقدير وعشان كدة احنا بنهاديك ، زى مابنقول على حاجة كويسة حصلتلينا دى هدية من ربنا ، تفتكرو ساعتها بيبقى ربنا ادانا هدية فلازم نرودهاله عشان ده واجب ولا ساعتها بنقول الحمدلله يارب وردنا ليها بيقبى بالحفاظ عليها واننا نشتغل على رضاه دايما ، مع الفارق بين البشر وبعضهم مع بعض ، او بين احنا وربنا ، بس فى الاخر دى هدية ودى هدية ..

الهدية لما بنيجى نجيبها لبعض مش لازم تكون غالية اومش غالية لكن قيمتها وقيمة الهدية مش فى ثمنها طبعا لكن قيمة الهدية هى قيمة الشخص اللى رايحاله عنى انا قيمتها فى انك افتكرته وانت ماشى فى طريقك وقلت فلان انا هاجيبله دى هدية زى لما تبقى مسافر وتجيب هدية لحد من سفرك ده ، الرسول ( عليه الصلاةوالسلام ) وصى انه الحاج يرجع جايب هدايا لاهله من مكان الحج !! يعنى تبقى بتحج ورامى الدنيا ورا ضهرك وانت وربنا وبس طالب المغفرة والرحمة من ربنا بس كمان لاء لازم تفتكر اهلك اللى مستانيانك اللى ماقدروش لاى سبب كان انهم يبقو معاك هناك عند الهدية الكبيرة اللى كلنا بنتمناها من ربنا .. وقال مش لازم تبقى حاجة عظيمة انشالله تقوله انا دعاتلك هناك ماهى دعوتنا لبعض تنفع هدايا لبعض برضه مانا فاكراك وانا بدعى او وانا بصلى اياكان مش لازم نرجع شايلين الدنيا كلها ، وردة من جنينة بتعبر عن الجنينة كلها .. مش لازم الجنينة كلها

عشان كدة الهدية دى حاجة خاصة قوى قوى قوى .. آه بين الناس القريبين مافيش تكليف وممكن نسأل بعض عايزين ايه . بس انا فى رأى الاحلى ان انا اكون عارف الناس القريبة منى عايزة ايه ، ولو مش عارف خلاص اسيب احساسى يدلنى هما عايزين ايه بس مش لازم اسأل اجابلك ايه هدية !! سؤال مش مناسب لكلمة هدية ، وفى الاخر مافيش هدية حلوة وهدية وحشة كل الهدايا هى معنى تقدير وحب واحترام للناس اللى عايشة معانا ولو احترنا قوى نجيب ايه فى اساسيات ممكن نجيب عليها ، زى فيلم " تيمور وشفية " كدة كل عيد ميلاد ليها كان بيجبلها عروسة عشان دى ليها معنى ثابت عندهم هما الاتنين ، وكمان الهدية لا تهدى يعنى ماينفعش تجيلك هدية فاتشيلها وتقول عشان هبقى اهدى بيها فلان .. مايصحش .. الهدية فى معناها

وقيمة الهدية .. بقيمة بعضنا عند بعض

وقيمتنا عند بعض ..اننا نبقى فاكرين بعض ، واخدين بالنا من بعض

احنا مش هنستنى من بعض هدايا عشان نشوف احنا قيمتنا ايه عند بعض

مش هخستنى هدية عيد حب عشان اعرف هو او هى بيحبونا ولا لاء

مش هستنى هدية عيد الام عشان اعرف ولادى بيحبونى قد فازة كريستال او كابشة روز

مش هستنى عيد جوازنا عشان اقولها او اقله انى عشت معاك مبسوط حياتى

مش هستنى عيد ميلادك عشان اقولك انى صاحب جدع وجنبك وفاكرك

كل المعانى دى لازم نعرفها ونوصلها لبعض طول الوقت ساعتها مش هتحس ان نوع الهدية اللى هتجبها ازمة فى حياتك ، ساعتها هتبقى عارف ان اى حاجة اى حاجة انشالله خوص هتسعد الشخص اللى قصادك لانه اصلا عارف قد ايه انت بتحبه وبتقدره وكمان فاكره فى اليوم اللى فيه خصوصية عنده ...

الهدية ممكن تسعد لآآآآآآآآآآآآآآآآآآآآآآآآآآآآآآآآآآآآآآآآآآآآآآخر حد وممكن تسبب وجع ، فاريت كلنا نحرص على الهدايا اللى بتسعد مش اللى بتوجع والابتسامة فى وش بعض ممكن تكون احلى هدية نقدمها لبعض كل يوم .. كل يوم هو عيد ، كل بسمة هى هدية :)

السبت، 24 أكتوبر، 2009

بنت الخريف ...


اكتوبر28 يوم من ايام الخريف,

,اليوم ده يوم ميلادى,

يعنى انا من مواليد الخريف,

,وفعلا انا فيا حاجات كتير فى طباعى تشبه الخريف,,

الخريف فصل غريب جدا له حالة كدة مختلفة عن كل الفصول,

-,ساعات احس انه حر جدا اقرب منه للصيف شمسه سخنة زى شمس الصيف والسما مافيهاش اى سحابة واحدة زرقان خالى من اى لون تانى,,والليل فيه شبورة الرطوبة اللى تعميك دى وتخليك ماتشوفش حاجة

-,,وساعات تحس انه اقرب للشتا,,فى برودة صغيرة كدة ترعش قلبك,,والسما الزرقة دى فى شوية سحاب بيلعب ويرسم لوح من ابدع ماياكون تخليك رافع عنيك للسما طول الوقت ,,تخدك من زحمة الارض والناس والدوشة وتلاقى كدة اشعة الشمس الدهبية طالعة من بين السحاب مستخبية ,,جو كلو نقاء وجمال,,بس فجأة يلقب مطر ورعد هوا شديد مافيش حاجة توقفه,,يخوف بيهم كدة الناس ويلمهم فى حتة مع بعض,,وفجأة تطلع الشمس من تانى والدفا يملا الدنيا والنقاء يرجع تانى

و برده فى من الربيع...فى غصون لسة عليها الورق الاخضر,,لسة مكسية بالورود,لسة فيها حياة قوية متمسكة بحياتها,,وفى اغصان وقع من عليها الورق الاخضر واصفر ومات,,ضعيفة حياتها خلصت منها وموقمتها كانت ضعيفة,,استهونت فى حقها فى الحياةيمكن الفرق بينهم ان دى صاحبها واخد باله منها والتانية صاحبها مش فاضلها,,

اهو انا بحس انى عاملة زى الخريف

ساعات بكون منطلقة جدا وجوايا سخونة وقوة وحماس ومافيش حاجة موقفانى وجوايا مرح الصيف وانطلاقه والوانه المبهجة,,واملى الدنيا من حواليا مرح واكون سبب لانطلاق الناس اللى معايا وساعات تكون اغصان قلبى ضعيفة وراقها يسقط منها بسرعة وده لما قلبى يحس انه لوحده او فقد الحاجة اللى عشانها بينبض,,

وساعات تانية بشوية عناية صغيرة"كلمة حلوة"ورقه يخضر والغصون تفضل محافظة على حياتهاوساعات تقوم زعابيبى وماحدش يقدر يوقف قصادى,,خصوصا لما اجى اعدل حد ماشى فى سكة مش اللى هى او لما الاقى حد بيأزى نفسه,,او حتى عليه انا لما اجى أزى نفسى,,او لما احس ان فى حق ضايع ولازم يرجع..بقلب فى ثانية وعصابيتى وحشة,,ساعتها كل اللى حواليا بيخافو ومابيبقوش عارفيين هو فى ايه ولا ايه اللى لازم يحصل,,

ساعتها اللى لازم يحصل هو اللى بيحصل لما المطرة تمطر عليك,,يابتجرى فى حضنها لانها مش مؤزية,,يابتستخبة منها لو فاكر انها مؤزيةوساعات تكون سمايا صافية وطالع منى احلى شغل وفن وروحى هادية مافيهاش اى دوشة ولا زحمة فيها نعومة ورقة"ودى قليلة جدا"بس موجودةوكفاية ان الخريف بعده الشتاء يعنى اخر محطة قبل مايوصل حبيبى هو المحطة اللى بروح استناه هناك,,

الخريف :حزين وفرحان بارد ودافى حنين وعصبى واضح وغامض صافى ومشوش قوى وضعيف ميت وصاحى محتاج معاملة خاصة جدا عشان تعرف تستمتع بجوه وجماله انا فهمته واستمتعت بجماله وحابيت جنونه,,,لكن ادي مش مطلوب من اى حد انه يستحمل جنان الخريف زى لكن انا من مواليده,,,فورثته فى حاجات كتير

انا بنت الخريف ...

الثلاثاء، 20 أكتوبر، 2009

حلوة يابلدى


كلمة حلوة وكلمتين,حلوة يابلدى,غنوة حلوة وغنوتين,,,وحلوة يابلدى,,,,,,,,,,,,,,

دى الاغنية اللى كنت باسمعها بالصدفة كدة فى الميكروباص الزحمة الفظيع اللى كنت راكباه عشان خاطر اقدر اروح مكان كدة مافيش فى اى عربيات بتدخل غير الاوتوبيسات السياحية وهو حى الحسين وخان الخليلى,اللى لو اللى قبلنا عرفوا ان ولادهم بيطرممتو ميكروبصات عشان يروحو كانوا بنوا خان الخليلى فى ميدان رمسيس "الله يمسيه باالخير بقى مطرح مانقالوه"

ماعلينا الغنوة اللى سمعتها فى الميكروباص طبعا يعنى السواق ماكنش مشغل دليدة لكن ربنا برده يخللينا الفن واهله و محطة ال" ف م" كانت الغنوة فى الراديو

سألتنى سؤال هى حلوة فعلا؟

نزلت من الشىء الانتحارى اللى اسمه مايكروباص واتمشيت منقوعة فى الشمس طبعا علشان مافيش اى نوع من المواصلات بيدخل جوة غير السياحى,شاالله ياحسين, وعلى اللى شفته,المفروض انى رايحة مكان سياحى وتاريخى وشوية كلام كبير كدة اول حاجة لاقطها,كمية الستات والرجالة والاطفال اللى نايمين جوة وبرة المسجد ,حد يقول ان ادخل مسجد دار عبادة ومعرفش اصلى من العيال اللى بتطنتط عليك والستات اللى بترغى واللى بترضع ابنها واللى بتغير للتانى مهزلة انا دخلت ماحستش بنفسى ,ايه ده فقر ,جهل,ولا عصابات.

اللى شفته وسمعته مايقولش لا فقر ولا جهل, دى ناس عايشة حياة كاملة داخل هذا المكان المقدس مسجد سيدنا الحسين, ومقامه كما يقال, اه و بمناسبة المقام, كمية البنى ادمين اللى بيتشحتفوا قدام المقام وكمان اخونا العرب اللى منورنا اليومين دول مالين المكان , خارجة بضرب كف على كف , بسمع كتير عن مدام فلانة الللى بتدي دورس عن الفقهة فى بتها فى المهندسين ومدام علانة اللى فى مصرالجديدة و التانية اللى فى المعادى, طبعا كل المدامات دول بيدو دروس فى الدين لشوية بنات ومدامات زيهم كدة ماهو اكيد مش لولاد ومراتات البوبين بتعهم يعنى, فين بقى الاخوات الفضليات دول جزاهم الله الخير على مايفعلن فين بقى من شوية الستات بعيلهم اللى واخدين المسجد مكان لتقدية اليوم وشغل فى نفس الوقت فين هؤلاء السيدات الفضليات من هؤلاء الاقل منهم فى كل حاجة وفعلا محتاجين منهم حاجات زى دى!!

خرجت عندى انهيار حضارى فى دماغى,قلت بما انى فى الحسين اضربلى بقى واحد ام على من الملكى وكانت اسواء ام على كلتها فى حياتى حتى الملكى عندو انهيار حضارى فى ام على تقريبا ابو على منعها من نزول الشغل

ما علينا, سمعت جنبى خناقة جامدة قوى باالطليانى مع عامل الكافيتريا بعد ماالجماعة الطليانة مشيو قلت اسئله قاللى خدوا واحد كوكاكولا وماحسبوش عليه ومصرين انهم ماخدوش حاجة, وسبنى ومشى يبرطم بكلام ماينفعش اقوله الصراحة خت بعضى وقمت اتجول شويه شفت ان المكان دة بيضم كمية حضارات مختلفة من كل مكان فى العالم ممكن يكون فى اتنين واقفين يشترو عين رع الفروز بالفضة وهما الاتنين من بلدين مثلا بنهم خلافات سياسية او ضرب احزمة حاجات كدة

اد كدة المكان ساحر وهادى وعبقرى ان لامم المسلم والمسيحى واليهودى العربى والاجنبى الاسمر والابيض الروس والامركان الطلينة والكوريين حاجة من ورا العقل الكل ماشى مبسوط بيضحك حاسس بدفىء الشمس و حلاوة الشاى ابو نعناع والناس اللى بتضحك على اى حاجة وكل حاجة وتتخانىء برضة على اى حاجة فضلت اصور الناس والبيوت والبياعين ومشيت من الحسين للحلمية وانا بغنى حلوة يابلدى سعتها بس راضيت على السؤال

هى فعلا حلوة!!!!!!!!!!!!!!!!!!!! قوى كمان :)

الثلاثاء، 13 أكتوبر، 2009

كرامتى..انا راجل


عجبت لك ايها الرجل ، او بلغتنا العامية الجميلة " الراجل ده هيجننى " مش راجل بعينه لكن " الرجل " الذكر " ...


هيجننى لاسباب كتير قوى ابتدى منين .. ابتدى منين ..!!..


- ماشى خلينا نقول : استخدامه لنقط ضعف الست اللى قدامه ، اى راجل عارف كويس قوى انه عمر ما الست اللى قدامه هتستحمل كلمة " انتى جيتى على كرامتى " وان دايما الست لما تسمع الكلمة على طول بتنخ وبتتكسف من نفسها يالاهوى يا خراشى ده انا جيت على كرامة حضرتو ، وده لان الست اكتر حاجة تضعفها لما تحس منك انك متهان او جيت على نفسك او كرامتك بسببها ....


مثلا لو انت غلطت وغلطك راكبك من فوقك لتحتك بس جيت ساعة العتاب وقلتلها " ماتحاسسنيش انى وحش قوى كدة " او " يا للدرجة دى شايفانى صغير " ساعتها بتيجى هى تنخ على طول وتسح جنبك وتقولك " ينقطع لسانى لو قلت كدة " وعلى طول تخدك فى حضنها زى العيل الصغير مع انك عامل كرسة وتستاهل ........... ولا بلاش لحسن بتزعلو ..


اللى بستعجبلو بقى ، هل هى فعلا بتبقى كرامتك وجعاك ولا مجرد انك عارف انها نقطة ضعف لصالحك بتستخدمها عشان تحسن من شكلك او عشان ترجع صورتك حلوة وجميلة !!!؟


- خلينا نقول كمان : ليه دايما شايف ان كرامتك اهم من كرامتها ، ليه دايما مش بتشوف ان هى كمان عندها كرامة واتوجعت ، ليه كارثة ومصيبة ان اتداسلاك على طرف وهى عادى مش حكاية وتقولها نكدية وبتصغرى دماغك !!!؟


يعنى ليه لو واحد جه وسلم عليها تبقى حدوتة ومين وفين وعشان ايه ويبقى ابن تييييييييييييت ؟! وهى لو واحدة جت وسلمت عليك عادى يبقى كبرى دماغك وماحصلش حاجة لكل ده !!!؟ليه لو ابوها قالك كلمة صغيرة على تأخير برة ولا حاجة ليها علاقة بمستقبل بنته وانه يطمن عليها ، يبقى ابوكى وقال وعاد وهء ومء ، لكن لو امك مسحت بيها البلاط ، يبقى عادى ياحبيبتى زى والدتك برضه !!!؟


ليه لو هى عملت حاجة مش قصدها قدام الناس يبقى يانهار اللى خلفوها اسود ، وانت من حقك تعمل اللى يعجبك انشالله تعود تتريق عليها قصاد الناس " عادى ياقلبى بهزر " ....... هو فى فرق بين نوع الكرامة اللى عندك ونوع الكرامة اللى عندها !!؟


- كمان خلينا نقول : ليه لو هى رفضتك ، او رفضت انك تقرب منها ، او ماكنتش مستعدة لنفس الحاجة اللى انت عايزها ، او لو قالت تعبانة .. يبقى ازاى وليه وعشان ايه وكيف تجرؤ تقولك لاء وتتوجع قوى سادتك وتقول كرامتك ، لاء وهنا كمان تيجى امها وتقولها جوزك ولازم ترضيه تعالى على نفسك شوية ، وهى لو انت رفضتها ولا قولتلها تعبان يبقى عادى ايه المشكلة يعنى تعبان وهلكان شغل طول النهار وتزعل قوى لو غنتلك " براة البيت عاملى عنتر " ليه هى مابتحسش زيك كرامتها مابتوجعهاش لو طلبت منك حضن ولا بوسة وانت قلتلها لاء ولا اتحاججت باى حجة ، وتقول عليها الدنيا وماتعوضتش انتى اصلا ازاى تطلبى منه حاجة زى دى هو اللى يعوز وهو اللى يقول لاء وانتى اتفلقى نوصين تلاتة لو مش عجبك .. ليه انت هنا عندك كرامة وبتتوجع ، وهى هنا سافلة وقليلة الادب .. ورينى الفرق !؟؟


بجد انا نفسى حد يفهمنى ليه فى فرق بينم كرامة الست والراجل هما مش انا انسان وهو انسان برضه ، اصل لو سبتها لنفسى يبقى كرامة راجل راجل راجل " تبقى متعلقة بحاجة واحدة " وماعتقدش ان الكرامة كمعنى ينفع احصره فى حاجة عبيطة قوى بالشكل ده اكيد مش كدة " طب لو مش كدة يبقى ايه ؟


ليه فى فرق بين الكرامة " عند الست وعند الراجل " مع انى اعرف ان الكرامة معنى واسع وكبير مبدأ المفروض انه يبقى موجود فى الانسان ويحترم فى الانسان اى كان نوعه ، ده حتى فى الحيوانات الحمار الدكر باشا مابعملش حاجة واللى بتتمرمت فى الروحة والجية هى النتاية ، يعنى الحمار عنده كرامة والحمارة ماعندهاش ........... والله عيب

الأحد، 11 أكتوبر، 2009

مهما كبرت صغير


كبرت و لسة جوايا طفلة

كبرت و لسة جوايا الطفلة اللى كانت بتزعل قوى لما يبقى عندهم حد بتحبه قوى ، ويمشى

كبرت و لسة جوايا الطفلة اللى كانت مسكة فى امها على طول ، بتدور على الامان

كبرت و لسة جوايا الطفلة اللى بتزعل لما تخلص الشيكولاتية او المصاصة

كبرت و لسة جوايا لطفلة اللى كانت بتلعب دايما ، لوحدها

كبرت و لسة جوايا الطفلة اللى ماكنتش شقية ، فاماكنتش ملفتة للنظر

كبرت و لسة جوايا الطفلة اللى بتتشد لصوت منير وفيروز ، وماكنتش فاهمة حاجة

كبرت و لسة جوايا الطفلة اللى كانت حاساسة لاى كلمة من اى حد ، تخص اللى بتحبهم

كبرت و لسة جوايا الطفلة اللى كانت دايما بيضحك عليها ، هبلة وبتصدق اى حد

كبرت و لسة جوايا الطفلة اللى كانت شايفة الناس القريبين منها اعظم الناس وبيحبوها ، وده طبعا ماكنش حقيقى

كبرت و لسة جوايا الطفلة اللى كانت بتخاف من حاجات عادية جدا ، ماتخوفش

كبرت ولسة جوايا الطفلة اللى كانت موهوبة قوى فى الرقص ، وكان نفسها تبقى ممثلة

كبرت و لسة جوايا الطفلة اللى كانت بتحب من وعمرها 5 سنين ، يعنى مايهماش السن فى الحب

كبرت و لسة جوايا الطفلة اللى كانت دايما لوحدها ، عشان كل اللى حواليها اكبر منها وهى اكبر من اللى قدها

كبرت و لسة جوايا الطفلة اللى كانت بتعشق الاسكندرية وتموت فى ماية البحر ، وبتموت فى البحر

كبرت ولسة جوايا الطفلة اللى كانت بتقول اى حاجة تخطر فى بالها ومش مهم العواقب ، مع انها كانت وخيمة

كبرت و لسة جوايا الطفلة اللى كانت صادقة ومتعرفش تكدب ، خصوصا على ابوها

كبرت و لسة جوايا الطفلة اللى كانت دايما تبكى لما تشوف اللى بتحبهم بيتألمو او موجوعين ، كانت بتحس بالعجز

كبرت و لسة جوايا الطفلة اللى كانت اسعد لحظاتها وهى منطلقة فى الدنيا وبتجرى وبتلعب ومع الناس اللى بتحبهم

كبرت و لسة جوايا الطفلة اللى كانت بتبكى كتير ودامعتها قريبة

كبرت وكل ما باكبر باكتشف انى " مهما كبرت صغير "