أحلام المشربية..........

كل ليلة بعد صلاة العشاء،، تعمل كوباية الشاى ، وتيجى توعد ورا المشربية تطل منها على الشارع الطويل الزحمة المليان بالاشجار ةتبدأ تدور على بطل لقصتها اللى هتألفها النهاردة ،، البطل اللى بتحلم بيه كل يوم وبتعيش معاه فى احلامها طول الليل ،، هو شبه فارس الاحلام بس هى مقتنعة انه مش فارس احلام على قد ماهو الحلم نفسه ،،لانه ساعات بيكون شخصية مش مثالية خالص،، يعنى مرة حلمت بالميكانيكى اللى على اول الشارع ، شافت فيه الواد الجامد اللى بيعرف يسوق كل انواع العربيات وخدها الحلم مرة انها راكبة معاه عربية كانت اول مرة تشوفها وفضلت تلف معاه بيها طول الليل لحد ما شرقت عليهم الشمس بنورها فى الصبح

ومرة بالدكتور اللى جه يعالج والدها لما تعب وشافته ازاى بيتعامل مع والدها بأدب وذوق ، ساعتها جالها فى حلمها انه لو عيت او تعبت هيفضل جنبها يراعيها وياخود باله منها وهيسهر على راحتها لحد ماتشد حيلها وتقف على رجليها

مرة عاشت حلم جميل مع مدرس اختها اللى بيجلهم البيت وازاى هيعلمها اللى ماتعرفوش وانبهرت بثقتفته ودماغة المتفتحة وعلمه ،،حاسيت انها هاتعيش مع موسوعة واى سؤال فى الدنيا هيخطر ببالها هيكون ليه عنده اجابة

مرة مع الجار الظابط الحليوة ابو البدلة الميرى وده كان حلم الحماية والامان اللى كانت هتموت عليه ،،كان اطول حلم يمكن عدى عليها لانه افتقادها للامان والحماية كان احساس مسيطر وقديم وفضل معاها طول الوقت ،كانت لما تشوفه من ورا المشربية كانت تحس انها طايرة فى السما وانه واخدها ورا ضهرة حاميها من كل حاجة فى الدنيا وماحدش يقدر يرقبلها من اى حد فى الشارع،، ماهى تبع البيه الظابط

اما الواد الروش اللى فى الدور السابع فى العمارة اللى قصادهم فده كان حلم الانطلاق والجرى والتنطيط و الشقاوة الشباب والحيوية والبوسة الخطف فى الخباسة وماحدش واخد باله والتمشية على الكورنيش فى العصارى ورحلات الجامعة والمصايف

اما صاحب ابن خالتها فكان حلم وقته قصير يادوب على قد الدكتور النفسانى،يعنى شافت فيه الصديق اللى بتتمنى اللى ممكن ترمى عليه كل متاعبها وكانت قاعدة تحكيله عن كل مخاوفها ومتاعبها وكانت دايما شايفة انه راجل قوى يعتمد عليه وعمره مابخل عليها بنصيحة ودايما كان عنده حل لكل المشاكل ودايما كانت تسمع كلامه وتثق فيه لانه نادرا مابتثق فى حد.....

وفى ليلة ،، بعد ماعملت كباية الشاى بتاعتها وراحت عشان تاخود مكانها ورا المشربية كالعادة،، بصيت من وراها نزلت عينها عليه ،، لابس جاكت تقيل ومولع سيجارته وقاعد على الرصيف بنظرة حيرة وكلها غموض وسحر شارد كأنه فى دنيا تانية سارح فى عالم غير العالم بتاعنا وغير العالم بتاعها الخيالى وللحظة حاسيت انه لاء مش حلم ده حقيقة ،، من روا مشربيتها لاحظت فى عينه الغامضة الشاردة دمعة بتنزل فى على استحياء

ماحستش بنفسها غير لابسة الشال الوردى بتاعها سايبة مكانها الحالم ورا المشربية وسايبة كوباية الشاى السخنة من ايدها ، ونزلت له وقفت قصاده وبنظرة كلها حنان وصوت كله قلق وخجل

قالت: الجو برد عليك !!

رفع عينه وبصلها فى هدوء وماقلش حاجة خالص

اتكسفت وحاسيت انه ماكنش لازم تنزل ،،بس حاولت تلم الموقف قالت:اصلى شفتك من فوق وحاسيت انه انت محتاج حد يساعدك معرفش ايه اللى خلانى انزل ، حاسيت انى مش هعرف اقعد مرتاحة طول مانت تعبان

قال: انتى تعرفينى!!!!!!!!!!!!!

قالت: لو بتتكلم على معرفة سنين وطلوع ونزول ومشاويير ، يبقى لاء ،، لكن لو بتتكلم عن حد يعرف باحساسه ،،فأنا احساسى هو اللى يعرفك من زمان قوى ،، فيك غموض وهدوء يخوف يشبه هدوء قبل العاصفة،، دمعة عينك الحزينة المستخبية واضحة قصادى كأنها شمس اغسطس،،قلقت عليك ماحستش بنفسى غير وانا قصادك جيتلك وانا كل همى اعمل كدة " وخدته بين احضانها وهمست ارمى عليه حزنك.".................

غاب فى حضنها ورمى كل اللى جواه وجعه وحيرته وشكواه وغضبه وكشف عن كل اسراره كأنه كان مستنيها عشان يخرجلها كل حاجة جواة

قالها: تعرفى انا نزلت من بيتنا وانا مش عارف رايح فيين ولا لميين بس كان كل اللى جوايا انى نزلت من بيتنا وانا بتمنى الموت وانى اخلص من حياتى .....بس لاقيتنى فى حضنك وفى حضنك حاسس انى عايز ابدأ حياتى

مسكت ايده وخادته معاها ومشيو مع بعض فى شارع طويييييييييييييييييييييييييييييييييييييييييييييييييييييييييييييييل وكل وهما فى حضن بعض .......

ياترى ده كان حلم ولا حقيقة!!!!!!!!!!!!!!!!؟

لو كانلى ونيس..........

-لو كانلى ونيس فى الدنيا دى ماكنتش افوت يوم زى النهاردة عشان اعيش معاه احلى يوم... الجو بتاع النهاردة ده من اكتر الاجواء اللى بحبها على عكس ناس كتير ممكن تضايق من الجو ده ،،بس انا بشوفه اكتر الاجواء رومانسية وياما شعرا تغنو بالعشق والمطر

ايوة المطر ، المطر معناه خير من السما يطهر الروح ،ويغسل الاخضر ،ويروى الارض العطشانة

وبما انه المشاعر الحلوة زيها زى الزرعة عايزة اللى يرويها" وانا بقول مشاعر حلوة مش عايزة اقيدها فى معنى بعينه"

فعشان كده لما بنمارس المشاعر دى فى جو زى الجو بتاع النهاردة دة " تحت المطر" المشاعر دى بتتروى وبتزهر وبتتغسل من اى شوائب.........

عشان كدة بقول لو كانلى ونيس النهاردة ماكنتش اضيع الفرصة الهايلة دى من ايدينا اننا نطهر مشاعرنا ونرويها .....

لوكانلى ونيس : كنا هنطلع مع شمس الصبح بدرى نفطر فول من على عربية فى ميدان الفلكى ومعاه كباية الشاى الجامدة

بعد الفطار اللى غالبا هيأنتخنا ساعتيين ههههههههه ناخود بعضنا ونطلع على السيما نشوفلنا فيلم جامد فى سينما مترو

يخلص الفيلم ،، نتمشى وسط البلد كلها لحد مانجبها من اولها لاخرها وتخلص بينا واحنا قصاد مكتبة مدبولى ندخل ندورلنا على كتاب جامد عشان فى الليل ينام فى حضننا

نخرج من مدبولى نلاقيها بتمطر ،، نقرر نجرى تحتها لحد ماتبطل ،، نخدها جرى بطول قصر النيل لحد مانوصل للكوبرى اقرر ساعتها اننا نتصور هناك ،، نديها تصوير ونتمشى لحد مانلاقى نفسنا فى حضن جزيرة الزمالك

جعنا،، نقرر نتغدى بس السؤال اللى حيرنا بقى ناكول ايه ,,, مافيش غيره ،،ايوه هو ..." didos" احلى مكرونة فى الدنيا........

معاد القهوة ،، ناخودها فين ،، نتمشى لكوستا ،، ماهو ونيسى اكيد عارف انه القهوة الوحيدة اللى بحبها هى قهوة كوستا

ونتمشاها من didos ل costa وحاطين المزيكا فى ودنا بنسمع " دى مركبى فضة وفرحى لو قضة حبيبتى تبقى معاى منغيرها مش هرضى" الله عليك يا منير...

وصلنا كوستا وشربنا القهوة وطول الوقت بنرغى ونضحك ونهزر ونتكلم جد نجيب من القديم ونحكى عن زكريات، ونشكى من حاضرنا،، نبتسم لبعض ونقول بكرة اكيد احلى.......ونعاهد بعض على اننا دايما نفضل مع بعض ولو حد زعل من التانى يبقى العتاب المحب عشان الحياة تمشى عشان من غير بعض هى ملهاش طعم نتعاتب عشان نصلح ..

نخرج فى طريق روحتنا علبيت فنقرر ندخل محل فضة ،،عشان انا نفسى اجيب تذكار وهدية ،، واجليبى خاتم بدل اللى ضاع.. بس فى نفس الوقت ونيسى كمان مايهونش عليه\عليها ان انا اللى اجيبه مادام ضاع يبقى يجيلى غيره ، ونتخانق قصاد الولد اللى شغال فى المحل ،يقطرح علينا ان كل واحد يجيب للتانى هدية

وخرجنا مارضيين احنا الاتنين.............................

لوكانلى ونيس كنت هاشتقاله قوى بعد مايخلص يوم زى ده،، تقريبا عشان كدة ربنا قدر ان اليوم ده يمر وانا لوحدى من غير ونيس لاه ونيسى مشغول بحياة واقعية الفرح فيها بحساب والجنان فيها مالوش مكان...عشان كدة انا لوحدى بعيدة فى دنيتى الى مالهاش مثيل فى الواقع او ليها بس صعب قوى تحقيقه ، محتاج صدفة او حظ حلو،، وانا الصدفة مالهاش مجال فى حياتى ،، والحظ مش هتكلم عنه ,, حظى قادر يتكلم عن نفسه بنفسه..............

الراقصون على السلالم

حرية التعبير،،الرأى والرأى الاخر،،عصر الحريات،،، الحق الحرية المساواة

شعارات اترفعت على مر العصور فى كل دول العالم وكل المجتمعات العمرانية ، واتكلم عنها كل رؤساء الدول الكبيرة وكل كبار المجتمعات دى ...

لكن سؤالى هل الشعارات دى معمول بيها فى بلدنا الجميل اوحتى فى مكان فى الدنيا مش عندنا بس ؟

هل فعلا فى حاجة اسمها حرية رأى ؟ فى حاجة اسمها حرية تعبير ودميقراطية؟

فعلا هو اسمه رأى ورأى أخر ؟ وهل فعلا هو عصر حريات وسماوات مفتوحة ؟فى حق ؟ حرية؟ مساواة؟.

كل الاسئلة دى وغيرها كتير بيجى فى راسى كل يوم وانا بفتح الدش او حتى التليفزيون الارضى عشان اشوف اهم اربع بنىْدمين فى حياتنا " منى الشاذلى- معتز الدمرداش- محمود سعد - عمرو اديب" اللى بقو اهم واغلى علينا من عيالنا وابونا وامنا ،، اللى بقى صوت الشعب ولا كأنهم اهم نواب فى اهم مجلس للشعب ،، راعيين الغلابة واللى صخرو نفسهم لكشف الحقايق للمشاهدين الغلابة او اللى مش غلابة

الاسئلة دى كلها بتيجى فى بالى كل ماتوقع عينى على هذا النوع من الجرانين الجامدة اللى مالهاش سقف لحريتها واللى عندها عصاية سحرية بتكشف بيها كل الحقايق وتكشف عن كل الفساد بالصور والمستندات

كل يوم احنا على معياد مع النوع من المذعين المذكورين سلفا مع برامجهم الجامدة اخر حاجة بيتكلمو مع نفس المسؤل او عن نفس الجريمة الغامضة، او عن هذا المختل عقليا الممسوك فى قضية مهمة ،، او مع المنتج اللى عامل قضية مع الرقابة عشان فيلمه العبقرى ،، او عن مدى تفاهة و جماهيرية " على حسب " المسلسل الرمضانى بتاع النجمة اياها

لكن الملفت للنظر ان الكلام هو من بره باين انه صباح الحرية يعنى سبق " عمر ماكان وزير يطلع على التليفزيون " على عينك يا تاجر لكن بما اانهم هما كلمتين مع نفس الشخص فى نفس البرامج فبنلاقى انه مافيش حرف زاد او نقص من برنامج للتانى ،، يعنى نفس السؤال بنفس الاجابة ،، زى مايكون مش من حق المذيع او المذيعة يسأله عن حاجة تانية "فعلا حرية وفعلا دميقراطية"

انا اللى بشوفه كل يوم بيفكرنى بمثل مصرى قديم " اللى رقصو على السلم لا اللى فوق شافوهم ولا اللى تحت سمعوهم"

وبصراحة اللى رقصو على السلم دول هما اللى بيطلعو يطنططو فى التليفزيون كل يوم من 10 - 12 بالليل" مواعيد اذاعة البرامج دى " واللى فوق هما اللى بيطلعو على القنوات الفضائية ، واللى تحت هما المرتبطين بالتليفزيون الارضى

الفضائية " السطوح" فوق فوق قوى والناس اللى بتطلع على الفضائيات هما كمان فوق قوى عن المواطن الغلبان اللى مايهموش من كل الرغى ده غير ان يعرف يعيش وياكل ويلاقى الدوا ويعلم العيلين اللى طلع بيهم من الدنيا واللى لما بيشوف الكلام ده على لسان اهل السطوح او العلاى عمره ما هيصدقه لانه دايما شايفو فوق فاكيد مش حاسس بيه ولا بمعناته ، اللى فوق بيعيش فى جو نضيف صحى بعيد عن الزحمة والدوشة والاختناقات المرورية " يعنى مثلا ازاى وزير الداخلية هيحس بالزحمة والخنقة لما بيجى يروح بيتهم بيقوفلو الشارع عشان يعدى الراجل ما كدبش لما قال الدنيا رايقة ماهو طبعا شايفها رايقة"

واللى بيطلعو على التليفويون بتاع الغلابة فى البيت بيتهم " اللى هو اخر شياكة ومفروش من @ home

عمره ماهيحس ان البيت بيته ابدا ، والفروض ان دول اللى تحت بس تحت قوى برده بعيد عن البنىْ أدم الطبيعى اللى ماعندوش وعقد ومش منفسن ومواضيع اللى موجودة فى برنامج اللى تحت عقيمة مافيهاش اى حاجة مفيدة ولا جديدة انت لسة جو اطار التليفزيون يعنى عمرك ماهتقدر تقول على حاجة مش عاجباك ووزيرك قاعد فى المكتب اللى جنبك الحيطان ليها ودان ، ولسة ماقدرناش نتخلص من عقدنا القديمة والخوف من كل ماهو حكومى او " سلطة"

لسة ماوصلناش للحرية اللى تعلى وتطور وتجدد ،، لسة جوانا كبت وتقريسبا الكبت اللى جوانا ده موروث شعبى من زمان بعيد ، يعنى لسة ماوصلناش جوانا فى تفكرنا احنا كناس عادية بسيطة تقدر تحلل وتقارن وتناقش جايبين ناس بالنيابة عننا موفوضنهم يتكلمو عننا ويقولو الناس تعبانة ويجبولنا اتنين تلاتة يقولو اه امين الناس فعلا تعبانة وادينا فضفاضنا عن اللى جوانا وخلصت الحدوتة وماحصلش اى حاجة مفيدة لا لينا ولا لمصلحة البلد

مين المستفيد الاول والاخير من سوق البرامج الحوارية والجرانين الحرة المستقل منها والحكومى ؟

ماعتقدش انى حد جاتله اى فايدة شخصية او كمواطن فى بلد مهمة زى بلدنا" او حتى لو مش مهمة" من كتر الرغى والقيل والقال اللى بيتقال فى البرامج دى ،، الحاجة اللى جاتلى من البرامج دى ، الخوف ، مابقاش جوايا حاجة غير خوف وضلمة وعتمة ،، انا شايفة ان البرامج دى لسة محتاجة تتطور وتراجع النظر فى اللى بتقدمه لان بجد

يأهل المغنى دمغنا وجعنا ،،دقيقة سكوت لله.............

أخر رقصة................

زحمة و دوشة وناس هايصة ومفرفشة كله بيرقص على كل انواع المزيكا عالى منها وواطى ،، سالسا وفالز وتانجو ومودرن والامر مايسلمش من شوية بلدى بردة ،،ماهى سهرة جنان والحب مالى المكان كله فرحان والجو جامد اخر حاجةوهى كانت شعلة الحفلة

لما رقصت الفالز ،،كل واحد كان واقف كان بيحلم يكون هو الكتف اللى بتترمى عليه فى اخر الرقصة

لما رقصت السالسا ،،،كانت الارض بتلف تحت كل الحاضرين ،وبلفة منها حس كل الموجودين ان العالم مابقاش العالم الثابت ده لكنه بيلف فى دواير طول الوقت ومع التانجو،،،،ماكنش فى ايد اى حد غير انه يغمض عينه ويحلم انه طاير معاها سما فو سما بخطوات ثابته محدده عارفة رايحة فينجنونها وروحها المرحة والسرعة والاندفاع والغرور اللى بيطلع منها فى كل خطوة ومع كل تمبو فى المزيكا ، كان بيلهب المكان وبيشع فيه روح الغيرة والرغبة،،والتحدى ،، تحدى لمن سيفوز بها فى اخر السهرة عشان يرقص معها اخر رقصة سكتت المزيكا،،وقف الرقص ،، ومافيش على وشوش الناس غير نظرة اندهاش وترقب ، وقفت بكل ثبات وثقة وغرور وتحدى وسط كل الموجودين وفى نص حلبة الرقص وبصوت اكثر ثباتا ومليان بالتحدى والغرور والكبرياء"

ودلوقتى : مين يحب يرقص معايا؟ "

ملواتى ، اميرتى ، حياتى ، تحت امرك انا ، انا كلى ليكى ، مين غيرى طبعا ؟ ،،، كلهم اتمنو يرقصو معاها وكلهم شافت فى عينهم الامنية والحلم والرغبة فى انه يفوز بيها اخر الليلة ، مش اكتر رمت بنظرة متأملة ، ولاحظته وشورت عليه من بين كل الموجودين وقالتله

" أنت" !!!!!!!!!

الكل اتجنن مين ده ؟ ده مدعو معانا ؟ اصلا ماشفناهوش بيرقص طول الليلة ؟دى اتجنن!!! اه ده معقول ؟ تلاقى الرقص دواخها؟

كان واحد واقف بعييييييييييييييييييد فى هدوء وثقة ، وكان الوحيد اللى ماطلبش انه يرقص معاها ، ده يمكن فضل معظم الليلة مابيرقص غير مع البنات اللى يعنى على أدهم كدة بهدوء وثبات قالها ،،

" أنا" ؟؟؟؟؟؟؟

قالتله ايوة انت انا اخترت تكون اخر واحد ارقص معاه

قالها :بس انا ماخترتش انى ارقص معاكى

الكل استغرب ،، انت اتجننت ،، ده اكيد مجنون،، وكلام من ده كتير قوى،،، وطبعا اكتر من اتغاظ كان هى،، زاد جنونها وعنادها ،، واعتبرت انه كدة عداها وهى كدة هتشن عليه حرب ولازم تكسبهاحاولت انها تستعيد ثباتها وهدوءها

وقالت: تبقى خايف؟؟؟؟

هو وبكل ثقة : من ايه؟

هى: منى انا

هو: وايه اللى يخوفنى منك؟

هى : عشان انا اقوى منك،، خايف على نفسك تضعف قصادى وكأنها تحدته

مغرورة

خلاص لو كلامى غلط اثبتلى واثبت للناس العكس

موافق ارقص معاكى بس خلى بالك اللى هيفوز فى الرقصة عليه تنفيذ اللى هيطلبه منه التان

ىموافقة

ووقف كل واحد فيهم قصاد التانى وكأنهم هيبدأو مبارزة مش رقصة،، وبدأت مزيكا التانغو تعزف نغماتها وبدأو برسم لوحة كلها تحدى وعنف وكبرياء ،، حرب مشاعر كل منهم عايز يكسبها ويسكب التحدى قصاد التانى،،لكن اللى كان بيدور جوه كل واحد منهم عكس اللى كان بيحصل ،، لما يحدفها دفعة قوية لبعيد تبدأ هى تقرب ،، ولما يحاول هو يقرب هى تبعد ،، شد وجزب ،، طلوع ونزول ،، كلمات من غير حروف ،، كان حوار عصبى عنيد ، كله ثقة وثبات وتحدى ومشاعر مغلفة بالغرور والكبرياء ،، ويخلص الحوار الراقص ببوسة وقاطعة فى ديل الفستان................

و مع اخر دقة فى وتر الجيتار، وبسكوت وتحفذ من الموجودين وترقب للى هيحصل

زقته بعيد عنها ،، بصلها باندهش وقالها فى رأيك مين اللى فاز؟؟؟؟؟؟؟؟؟

ما طلعش منها اى رد كان رد فعلها الوحيد نظرة كلها شرار ، عند وكبرياء،

مش عايزة تعرفى انا هطلب منك ايه؟

وانت مين قالك ان ايا كان اللى هتطلبه هيتنفذ؟

دى اصول المراهنات

وفى هدووووووووء وبعد تفكير عميييييييق جدا

عايز ايه؟

هو ده اللى كنت عايزه

مش فاهمة

اكسر عندك وكبرياءك............

مشى ، وجريت وراه ،، وكل الموجودين مستغربين اللى بيحصل

لحظة لو سمحت

التفتلها ،، انت بتكلمينى انا؟؟؟؟؟؟؟؟؟؟

مافيش غيرك

عايزة ايه؟

انت فاكر ان انت اللى كسبت مش كدة؟؟

فاكر !!!!!!!!!!!!!!!!!!! ليه بتقولى كدة ،، دى حقيقة الكل شافها بعينه

ضحكت ضحكة كلها عند وتحدى ،، اتغاص وجن جنونه ليه بتضحكى ،، فى ايه فى كلامى يضحك

فيه انك شايف نفسك بزيادة وفاكر ان انت اللى كسبان

يا حبيبى خلينى اقولك ان لو بصيت بتركيز وفكرت شوية هتلاقى ان انا اللى كسبت ،مش انت

قصدى انه اغبى انسان اللى يفتكر نفسه انه مشة كلامه على ست ،، ماتستهونش بذكائى يا صديقى

لسة مستغرب قصدك

بعد ما انت رفضت عرضى للرقص ،، انا اللى جريتك لترقص معايا ، وانت فاكر انك جيت بأرادتك عشان تتحدانى وفى الاصل انا اللى ثيرت روح التحدى جوالك عشان تيجى ونرقص ،، وانا اللى وصلتك فى الرقصة للبوسة وللنهايةودلوقتى مين اللى كسبان ،أنا، أنت؟؟؟

؟قرب منها بخطى كلها ثقة وثبات وهدوء ، لف ايده حوالين خصرها النحيف ومسك ايدها ، وقالها بكل هدوووووووءانا اللى كسبان ،، بس مش فى الرقص !!!!!!!

انا كنت عارف انك هاتخترينى من بين كل اللى كانو موجودين

ليه بقى ؟؟؟؟؟

عشان انا فاهمك كويس وعارف ان اللى كانو موجودين دول مايكلوش معاكى ،، ممكن تصحبيهم فى رقصة ، فى كاس ،، لكن مش مشاركة فى الرقصة الاخيرة اللى انا فاهم انك جواكى عارفة كويس انه اللى هيرقصها معاكى هو اللى هيفضل معاكى لاخر العمر ،، وانا كل اللى محتاجه انك تفضلى فى حضن قلبى لاخر العمر ،، وتخلص الدنيا وانا وانت لسة بنرقص

يبقى مين فينا اللى كسبااااااااااااااااااااااااان!!!!!!!!!!!!!!!!!؟

صديقى العزيز.................

الشاعر الكبير ولجميل والعظيم واللى بحبو وبموت فيه " نزار قبانى" كان قال فى قصيدة من قاصيدو الجميلة " لم تستطيعى بعد ان تفهمى ان الرجال جميعهم اطفال" الحمد لله وشهد شاهد من اهلها مش انا اللى بقول اهو نزار راجل زيو زى كل الرجالة وهو اللى قال ان الرجال جميعهم اطفال فا محدش يزعل ،، وكمان للى مابيحبش نزار ، عمنا" صلا ح جاهين" عم الكل... هو كمان قال كدة ،

المهم ان كل انثى عارفة كويس قوى ان الرجالة اطفال ،، بس انهو طفل عشان طفل عن طفل يفرق

-فى طفل زنان ومزعج ويوصلك لدرجة انك تبقى عايزة ترميه من الشباك ومابيبطلش طلبات ومابيعجبوش العجب ..

-فى طفل انانى يعنى مايهموش غير لعبه ومصاصاته والبلاى ستيشن بتاعه ويبقى عايز الحاجة دلوقتى يعنى دلوقتى مافيش حاجة اسمها اى نوع من التقدير لاى حاجة بتحصل حواليه ، مايهموش امه تعبانة، ابوه وراه شغل ، اى هبل هو كل مشكلته انه يعمل اللى هو عاوزه وخلاص......

- فى طفل اهبل بقى مابيعرفش يشيل مسؤلية وبيمشى ورا مامته فى اى مكان تروحه وبيسمع لاى كلمة ماما تقولها صح بقى غلط ماشى فى ديل ماما طول الوقت وماعندوش هو اى تفاصيل صغيرة خاصة بيه هو .....

-فى طفل شقى حلنجى ياكل اللى قدامه بشقوته وضحكته وحركاته اللى دمها خفيف " نصاب يعنى" هههههههه ، بس تلاقيه فى اى حاجة بقى فيها جد شوية اعبط من العبط

-طفل غلبان وحيد هادى بيلعب مع نفسه وماتحسش اصلا بوجوده ............

-فى طفل جبان ، طفل كداب ، طفل لا يعتمد عليه.........

لكن عزيزى الرجل خلينى اقولك ان نوع الطفل اللى اى ست بتحبه واللى هى بتشوف انه هو ده معنى طفولة الراجل حاجة تانية خالص............

-طفل المرأة هو الطفل اللى فى عز الزحمة او الضلمة يحضنها جامد قوى و يتشعلق فى رقبتها من الخوف ، خوف عليها من الزحمة اللى حواليها وبيحاول يداريها من الزحمة وبيحاول يطمنها من الضلمة ويحسسها بالونس وانها مش لوحدها، وكمان بياخد منها الامان فى نفس الوقت لانه هو كمان مش مطمن فى وسط الزحمة ولا فى الضلمة بس احساسه انه حضنه هيحميها

-الطفل اللى بيحوش من مصروفه نث جنيه عشان يادوب يقدر يجبلها وردة فى عيد ميلادها او عيد الام ههههههه، اوحتى الىى بيعملها كارت صغير من ورق بسيط بس لما قالو مين نعمله كانت هى اول حد فكر فيه ،، يعنى حاجة بسيطة فكر فيها يقدر بيها يقولها بحبك.......

-الطفل اللى بيمسك ايد مامته وهو بيعدى الشارع ويقولها عادى يا ماما ماتخفيش انا معاكى انا هاعديكى ، وتبصلو وتبتسم وتحس انه معاها ضهر تتسند عليه ، مع انه عقلة صباع زبلة صغير هههههههههههه......

الطفل اللى لو مامته عيت شوية يقوم يجرى يجبلها ميزان الحرارة حتى لو هى بتعطس ويبتدى يعمل زيها ويقلدها لما هو بيتعب..............

-الطفل اللى يملى عليها حياتها ويكون لها كل حاجة وتقضى معاها ساعات وتفوت ثوانى ومهما يعدى ومهما تضحى عشانه هى عايشه بمنتهى السعادة ومعندهاش اى حلم غيره عايشة عشانه بيه وليه وعمرها ما تحس بانها مضايقة او زعلانة او نفسها فى حاجة ، راضية بوجوده وبتدعى ربنا طول الليل انه يخليهولها ويطرح فى البركة ....

-الطفل بمعنى اللى تحس انه محتاجلها فى اوقات اللى يحس فيها بخوف او قلق حتاجلها عشان يحس انه مش لوحده ،انها وحشاه ، الطفل اللى بيقابل مامته وهى جايه من الشغل بجريه وحضن ويقولها وحشتينى ويعاتبها عتاب طفولى " شغلك ده وحش " عشان بيحس انه واخدها منه ويتقمص شوية صغيرين وبعدين لمة تقوله وحشتنى يجرى عليها " وانتى كمان "

-الطفل اللى علاقته بأمه علاقة صداقة يعنى لما يغلط يقولها ومايكدبش لانه عارف انها هتفهمه ومش هاتعقبه ولا هتزعقله والكلام بينهم هيكون راقى ومافيهوش شباشب بطير هههههههههه.......

-الطفل اللى لما يخاف او يحس بالوحدة او بعدم الامان يبقى متأكد ان امه جنبه وحنينة عليه وهاتساعده لما يقع مش هتسيبه لوحده ابدا ابدا.........

اعتقد ان هو ده الطفل اللى ممكن تحبه المرأة وتحس ان لو الصفات دى موجودة فى الراجل اللى بتحبه هى عمرها ماهتضايق ولا هتحس انه " اففف لاء زهقت منه " بالعكس ده هيبقى اسعد لحظة فى حياتها لما يكون معاها وقصادها وحواليها،،ساعادة الست لما يكون الراجل اللى معاها بيحبها وبيقدرها وبينهم علاقة صداقة وثقة وبيخاف عليها وفى نفس الوقت هى بتشكله الحنان والحب وبتحس بيه وبتدلعه زى مايكون ابنها بس راجل وكبير ،، برىء زى الاطفال وشجاع وفارس زى ابطال الروايات فى العصور الوسطى وجوده امان، ووجدها استقرار، يعرفو يلاقو بعض فى الزحمة ، ويكونو ونس لبعض فى الفضا ،، وفى اخر اليوم ينمو فى حضن بعض زى الام وطفلها المدلل الوحيد......

المرايا................

طبعا جه فيلم اسف على الازعاج واغنية شيرين الجميلة وسبقونى فى الكلام على المرايا،لكن بجد انا فى حاجة حصلتلى من كام يوم وانا ببص فى المرايا،، انا اصلا من البنات القليلة جدا اللى بتبص فى المرايا يعنى الميكانيزم عندى سريع لدرجة ان فعلا اوقات قليلة قوى اللى ممكن ارفع عينى واشوفنى فى المرايا...

لحد من كام يوم كدة برفع وشى فجأة فركزت فى المرايا فى وشى قوى وابتاديت اعمل شوية انفعالات كدة بوشى ،بس ساعتها حاسيت احساس غريب وهو انى مش حاسة اصلا،،يعنى انا مثلا شايفة ابتسامة لكن مش حاساها مش حاسة انى مبتسمة،لما بعدت وشى عن المرايا وابتسمت ساعتها حاسيت انى مبتسمة ،، مفاهمتش ده معناه ايه بالظبط،،يمكن ده معناه انى بحس نفسى اكتر ما باشوفها ....

بجد مابعرفش اتعامل مع نفسى اللى بشوفهاان دى انا سواء صور او زى المرة دى لما ابص فى المرايا ،،بعرف اكتر اتعامل مع نفسى اللى مابشفهاش مثلا عنية مش بلونها لكن بأحساسى اللى بحاول اوصولو من خلالها ،، وشى مش بشكل ملامحه لكن بالتعبيرات اللى بحسها وبعملها عشان اوصل شعور معين او فكرة معينة ،، شفايفى مثلا مش شكلها اللى باشوفو لكن بحجم الابتسامة او الضحكة واحساسهم اللى طالعين بيه ،،،أيديا مش بشكلها لكن بالمستها والمعنى اللى بقولو من لامسة الايد ،، كل التفاصيل مابشوفهاش بحسها ولما باشوفها صدفة بتعامل معاها باستغراب ،،حتى اختياراتى فى شكل اللبس برده مابصش فى المرايا بعتمد على احساسى بالحاجةاللى لابساها لان فى خيالى واحساسى بيها كتير بيكون احلى يمكن من شكلها " بس لايقة عليه يعنى " م الاخر كدة انا اكتشفت انى بحسنى اكتر مابشوفنى واكتر ما بتعامل مع نفسى بالعقل والطرق التقليدية

بس اللطيف بقى انى مش بتعامل كدة مع نفسى بس ،،لاء ،،الانيل انى بتعامل مع الناس كمان كدة،، يعنى لا يهمنى انت شكلك ايه ولا لابس ايه ولا شبه مهند ولا البيه البواب المهم ان اللى قدامى اقدر احسه انه حد كويس او حد مش لاطيف يعنى والحمد لله مابتخمش فى اللى برا بدخل فى اعماق البنى أدام اللى قصادى بعدى معاه الحدود اللى هو بيرسمها علينا ويصدرهلنا ماتكلش معايا ،،بس الاهم انى بجد بهتم بالاحساس اكتر مابهتم باللى بتشوفه عينى او بتسمعه ودنى ،،كل الحاجات المادية دى ماليش فيها وكتير بحس انه احلى اننا نتعامل مع بعض بأننا نحس بعض اكتر ما نشوفها او نلمسها بمعنى انى ابقى عارفة وحاسة ان اللى قدامى ده ازاى بيحس لما يحصله الحاجة الفلانية ده هيقربنا من بعض اكتر ويمكن يخلينا نفهم بعض اكتر ،، عشان كدة انا بعرف اتفاهم معايا لانى بحسها مش بشوفها .......