الجمعة، 3 سبتمبر، 2010

الحب.... من يكون!!! وكيف؟



الحب


كوز درة وايد شابكة ايد وتمشية على الكورنيش ساعة عصارى ؟


الحب


حضن دافى , روحين بيدوبو فى بعض؟


الحب


كلمتين حلوين,رسايل غرام,قصايد شعر,واسم الدلع " بيبى " ؟


الحب


تضحية بالروح , تعدية الشارع ناحية العربيات فدا الحبيب؟


الحب


دبدوب وبوكيه ورد وورقة باردى عليها قصيدة لنزار قبانى فى لفة حمرا يوم عيد الحب؟


الحب


دبلتين وكوبيتين شربات وصوت عسيلى وهو بيقول " انا كل ماغمض عينى الاقى جية من بعيد لبسة الفستان الابيض" ؟


الحب


مقدرش على بعد حبيبى انا لية مين الا حبيبى ؟


الحب


سماحة صفا نقاء اطمأنان ود ألفة جمال متعة سكن سعادة رضا ؟


الحب


صدق وفاء كلمة حق زرعة مايرويهاش غير الثقة طرحتها امل ؟


الحب


حائط صد ضد اعصار المصالح السلطة المظاهر الكدابة ,, ضد الظروف قوة تتحدى الخوف ؟


الحب


وليد محتاج رعاية , زرعة محتاجة سقاية , مشاعر محتاجة احتوى؟


الحب


امبارح مش محسوب , بكرة مش مفهوم , انهاردة دقات الساعة مش مسموعة؟


الحب


يعديك بحور الحياة وعند المرسى تلقى حبيب رفيق دور عيك فى كل الشطوط وفى مرساك كان اللقى نصيب؟


الحب... تختلف معانيه اشكاله الوانه طريقنه ,, بس الاكيد ان كلنا بنحب

السبت، 21 أغسطس، 2010

حقى...



حقوق المرأة , جمعية المرأة تساوى تلات تربع الراجل، جمعية المرأة المتوحشة ، بلا بلا بلا رغى كتير وغنى ومواويل بحقوق المرأة .... وفعلا كل الجمعيات اللطيفة دى وصلت الست انها تكون وزيرة،قاضية،مأذونة حتى،،قوانين ارمة خلع ومحاكم أسرة وحجة اوبها .... كلام عظيم لكن مايهمنيش ولا يدخل علية بشلن


الحقيقة ان مش دة الحق اللى بدور عليه،


ببساطة انا عايزة حد يحترم وجودى وكيانى ..


اعرف امشى فى الشارع من غير ماكون حق مكتسب لاى مريض ماشى فى الشارع..


حقى انى اركب مواصلات باحترامى،،


حقى فى انى اقول رأى ويحترم حتى لو معارض للقصادى،


حقى فى انى ينفع اسوق فى الشوارع منغير ماتشتم اويتحدف علية او يتكسر علية لمجرد انى ست،،


حقى انى اختار وقراراتى تحترم حقى فى الرفض فى القبول ، مايتصدرش كلامى لمجرد فكرة ان الستات بتحب تجادل وخلاص, وحتى لو الست رغاية طبع فيها, حقها انها تلاقى قبول لطبعها زى ماهى..


حقى انى اوصل للمكانة اللى استهلها بمجهودى وفكرى مش باستغلال اونثتى ..


انا مش عايزة اكون وزيرة ولا احكم الامة ولااقف على منصة قضاء.. انا كل حقى اللى بطلبه انى الاقى الاحترام والتقدير لكيانى كأنسان مش كائن من الدرجة التانية


حقى فى انى احلم ويكون لحلمى الحق الشرعى فى الحياة مايتؤادش لمجرد ان اللى حلمته..... امرأة

الأحد، 8 أغسطس، 2010

جواب....


بحبك بشتاقلك بخاف عليك بندهلك

رحتى رحتك ولو رحتك في البعد ,, ابعد... البال معاك

لورحتك فى القرب ,, قرب ... القلب بيستنى لقاك

بس المهم انك ترتاح...

حبيب العمر استحمل قلبى البرىء ...

قلبى لسة معانى حياته ابيض واسود الرمادى معاه عدو لدود

قوللى خايف قوللى محتار فوللى هبعد قوللى البعد مش اختيار

قوللى قلبك بيتى ومترحى قوللى معاكى بقت السعادة لية عنوان

بس قول ... اروى القلب العطشان منك شوق وحنان...

حبيبى....

الحب راحة من جوة عذاب

الحب سعادة مسروقة من قلب احزان

الحب امان وسط غابة ضلمة موحشة

الحب عطاء السنين نبع مية وسط صحرا

الحب طريق ممهد وسط رمال متحركة

لحظة حب بقربك بعمر

نظرة خوف فى عينك تقتلنى

ارمى خوفك علية .. ادفن حيرتك فى حضنى .. طوح آلمك مع خصل شعرى الطايرة مع نسمة الهوا

حبينى..... زى مابحبك

ارتاح والمس الصفاء.... معايا او مش معايا

الاثنين، 5 يوليو، 2010

من يوميات بنت مصرية


لحظة جنون تخطف فيها من الدنيا حقها اللى سابتهولها كتير .. لحظة ماهمهاش فيها وصفها بالجنون .. هى لحظة قررت فيها تكون نفسها تكون الشخص اللى هى حبة تكونه حرة عاشقة رامية حسابات العقل والمنطق الصح والغلط العيب والحرام ...


لحظة جنون رامية فيها حتى المشاعر ... مش المشاعر هى اللى محركاها ..دى حاجة اكبر و اعمق واحلى كتير... دى الروح


لحظة جمعت روحين ببعض جمعت روحين فى جسد واحد ,, لحظة وقفت فيها عقارب الساعة وقفت فيها حسابات العقل والمنطق لحظة فيها نعومة اكتر من نعومة السحاب .. لحظة برقة نسمة الهوا قطرات ندى الفجرية على جسم وردة بيضا نقية تنقى الروح من عبث الكون


مش على كوكب الارض مش شمس البشر مش صوت عصفور الصبحية مش الكون كله دول فى مكان تانى مش دنيا مش جنة دةحالة خاصة بيها هى وهو وبس روحها وروحه بعثو فى مكان تانى غير اللى بتروحلو اى روح


ماهو طبعا ماهى مش اى روح دى روح عذبة رقيقة نقيية بريئة محرومة من جسدها كتببببببببببر روح محبوسة مسجونة بعيد عن جسدها سنيييييين مشتقاله ومقتولة حنين ...


روح اشتاقت للحياة انها تعيش من خلال جسد يعبر عنها عن مشاعرها احلامها افكارها جنونها


روح اشتاقت للحنان للحضن للآمان للونس ..... للحب


روحين جمع بينهم جسد واحد جسد الحب


الروح المشتاقة للحب مافيش حاجة تقف قصادها تمنعها ن انهاتوصل لمكانها لسكنها و سكونها يوم ماتقف فى وشها كل الحدود والحسابات تبدأ حربها للوجود للبقاء لانها تعيش وتثبت وجودها ....


الروح النقية البريئة فى لحظة الحرية جريت عليه وبروحها التحمت بروحه وبقو آمان لبعض بقو فى لحظة جسد واحد قوى قادر يواجه كل الكون بصعوبته وحرمانه وقسوته .... بعالمهم الخاص بوجودهم اللى وجدوه بروحهم بحبهم بلحظة عشق برة كل الحدود دخلوبيها جوة كونهم وعالمهم الخاص جدا جدا .....

الثلاثاء، 29 يونيو، 2010

لما يجيلك بيجرى وخايف.... احضنه

لما تلاقى قلبك جايلك بيجرى عليك دقاته ترعش ضو نجوم الليل .. صوتها رعد يهز الكون .. افتحله دراعك حضنك داره احتويه طمنه لا تخاف عليه ولا تخاف منه ,, دى لحظة فى عمره ماتتعوضش ...

قلبك عاشق والعشق هى الحالة اللى ماتقدرش فيها غير انك تسلم فيها ... والقلب لما يسلم محتاجلك معاه

العشق حالة من كل حالة .. من الفرح و الحزن من الخوف و الامان السكون و العنفوان .. حالة على البرىء مؤلئة و على اللى لفها ودارها مرعبة حالة الوحدة و الونس ....

جالى قلبى بيجرى طاير مغضوض خايف فرحان عشقان عيونه تضوى زى النجوم ,, جالى يوصف حالته .. بتوصف فى ايه ياقلبى و بتحكى فى ايه ماكله ياقلبى باين فى عنيك ... شقاوة و حب وفرحة راحة و هدوء كأنك لاقيت حاجة كنت بتدور عليها سنين راجع من رحلة تواهان فى بحور الغربة واخيرا لقى البر ...

حضنته قوى طبطبت عليه و بكل حنية سرحت فيه وفى سعادته اقوله الحقيقة واصدمه و لا اسيبه يعيش لحظة حلوة طعمها لذيذ تنعشه وتجدد الحياة وتدبها فيه من تانى !!!!

يصعب

السبت، 19 يونيو، 2010

من على ضهر فرس اسود...


من اعلى قمة قمة فرس اسود جامح قوى نبيل حر من غير سرج من غير لجام تقدر تروح معاه لاخر الدنيا...


بس مش اى حد يقدر يروح معاه لاخر الدنيا , بس بحكمتك وصدقك معاه واحترامك لكيانه وروحه و حريته تكسب ثقته وياخدك فى رحلة طويلة تمر بيها فى روح الكون ...تقدر معاه تغوص فى بحر الكون الواسع من غير لجام من غير سرج تحس بأمان وانت فوق ضهره شايلك رافعك تلمس نجوم السما وانت رجلك ثابتة فى الارض ,, بس صدقك واحترامك لحريته وحدود عالمه الخاص وثقتك فيه ونبلك معاه وحدهم سرجك ولجامك من غيرهم تقع وقعة موت او كسر... بيهم أمانك عنوانك وانت معاه
هى اختارته بنبلها بقوتها بروحها الشفافة الحرة كسبته وصاحبته اختارها واختارته رفقة وصداقة فى رحلة لحضن الكون على ضهره الصلب..


يمرح يسابق الريح تلمس اطراف خصل شعرها نجوم الليل بقلب صافى برىء وعيون قوية حادة في نظرتها للئيم طيبة حنينة فى نظرتها للضعيف للمظلوم م الارض اكتسبت صلابة صبر كبرياء عند عطاء وخير صبر وقوة تحمل من صفاء السما خدت روح نقية من كل شوائب خبث البشر و من نقاء السحاب ونعومته خدت روح نقية و عيون بتلمع من الكبرياء والبراءة ومن قوة شمس الصيف خدت قوة من نار نار تحرق اى كداب خداع لئيم طاغى متكبر...

وحيدة وحدة فرس اصيل نبيل وسط مزرعة خرفان ...

ووسط صحرا تحت اشعة شمس قاسية تحرق تغلى الجليد ,, صحرة وحدة وكبرياء نار عطش للونس للامان للدفا ..خرج فيها رافض لجو الزحمة للمدينة اللىى اتزحمت و اتخنقت من كدب من زيف و آلم ولؤم هارب برفض كبرياءه النبيل لنقاء الصحرا قابل حرها وحريتها وحرارتها ولاهيبها ...

تخرج هى بعند وقوة وطيبة وصلابة رافضة للكبت للضغط للمنطق واللازم والمفروض هربانة بحرية للحرية الحريةعنوانها وغايتها

وفى لحظة ضياع ورفض تلاقى الكون اتحول للسكون ... وقف قصادها وبنظرة كلها قوة وحنان وحب واستعطاف بكبرياء يقولها فوق ضهرى مكانك سكنك وعنوانك ,, بقفذة قوية وبأيد وماسكة من حديد تحضن رقابته وتسكن فوق ضهره .. مع كل خطوة فى طريق الحرية تطير معاها خصلات شعرها توصل للسما تملاها نجوم مع كل خطوة تدب الحياة فى قلب الصحرا ينتشر الاخضر يحول نار شمس نهار صحرا لنسمات هوا تنعش القلب وتملاه ابتسام ...

من فوق ضهر فرس اسود بنظرة تحدى للشرور الكون بنظرة امل بنت معاه ليها وليه عالمهم النبيل زرو سوا صحرة الخوف امان ودفا وهدوء حب ونبل قوة وعند يبنى بكرة بلجام الحرية وسرج الحق

من فوق ضهر فرس اسود عنيد ونبيل ...... حر

الأحد، 13 يونيو، 2010

فتاة الليل


هى ليه صحيح اسمها فتاة ليل ...مع انها عادى جدا انها تنارس مهنتنا بالنهار او العصر او اى وقت!!!!

يمكن لأنها شبه الليل !!

- غمضة و.مش معروفة للقصادها ... زى غموض الليل!

- ولا يمكن عشان دايما الدموع بتلمع فى عيونها ... زى نجوم الليل!!

- ولا يمكن عشان بتوصل اللي بيسرح فيها للسكون بعد دوشة يوم طويل.. للسكون فى حضن الليل!!!

-ولا عشان عاملة زى نسمة ليل بتنسيك حر نهار صيف طويييييييييييييييل !!

- ولا يمكن عشان معاها عفاريت و اشباح انضاف شخوص زى عفاريت الليل1!!!

- ولا يمكن عشان بينهاشها خفافيش ليل عمى بتمرح فى ضلمة الليل !!!

- اة يمكن هى حالة من الابيض و الاسود .. يابنكدب كلنا لما يحل علينا الليل يااما الصراحة هى الطريق حقيقة متعرية من غير زيف.. كله فى الليل!!

ولا عشان كلام الليل مدهون بزبدة طلع نهاره سايح...!

- ولا هى عشقت ليل و الليل خداع اتصدمت فيه وكانت قوية..قالها بحب عاشق ولهان شايف فى عنيكى بكرة مش هاممنى اللى فات .. انتى اللى جى و فى عنيكى الاحلام.. صدقت ومسكت لده ومشيت معاه المشوار مشوار جنة الاحلام البيت و الدفة الامان الاستقرار النضافة الحب

نسيت معاه مين هى وجاية منين ايام عسل اتنسيت فيها كل لشرور .. انا محبوبة واقدر اعيش فى حضن دافى ونضيف....

-وتفوق مسكينة على لطشة قلم من زمن غدار فى ايد اليتيم كحكة يادى العار!!!

حبيبتى ... بس ماتفول حبيبة 1 لاء حيبة ويشهد الزمان .. بس ياعمرى رجعتلى اللى معاها ضاع عمرى.. وحبيبك لاكان ولاهيكون فى يىمه ندل .. ولايهمك كاعيشت ايام و اسين اخود الجذوء م الدنيا واقول و ايه يعنى .. مكانى.. لكن لاء وحياة قلبى اللى حبك من غير شروط خلصت اللعبة ولكل ليل نهار له عيون بتشوف وتحاسب ..

ماهى تفضل بنت ليل عفية واللى صوتها من دماغها لما تقرر تنهى اللعبة .. هتنهيها حتى لو كانت لسة ... فى اول الليل

الثلاثاء، 1 يونيو، 2010

تلك النظرة اعرفها جيدا ...............


تلك النظرة أعرفها جيدا ...
استطيع ان أرى انعكاس مافى القلوب على مرآة العيون ،، وقلبك بشكل خاص مرآته صديقتى ، فعينيك هما اقرب الاقربين الىِ استطيع ان اقرءهنا جيدا واعرف مايخفيه قلبك عن البشر وتلك النظرة اعرفها جيدا .. حين أتيت اليك راكض قلبى ليحكة لك عن مابداخله جأت راكضة تطير الفرحة من عيونى ذاهبة اليك .. رأيتها فتنت عليك صديقتاى " عينيك " عما بدور بداخلك ورأيت بيهما تلك النظرة رأيت مابداخلك هنا الان وهى بجانبك تتحدث اليك عن اعمال اليوم ومشاغل الحياة تملى عليك افعالك وافعالها رأيت عينا تنظران اليها بتلك النظرة التى اعرفها جيدا .. نظرة طفل يعشق حديث امه وهى تحكى له عن عهالمها الخارجى الخاص بها والغريب عنه رأيت النظرة للعاشق الذى يذوب فى صوت معشوقته عندما تحاكيه عن غير العشق رأيت نظرة المحب لمحبوبته التى لم يستطع ان يخفيها بين أحضان عينيه ويطمأن ويسكن بين أحضنا ذراعيها فهى دائما حاضرة غائبة تلك هى النظرة فأنت دائما تنظر اليها وهى غائبة فهى كيان حاضر بالجوار ولكنها روح غائبة هائمة فى عالمها الخاص وسط زحام الحياة ... هى حاضرة بداخلك هى لازالت تستطيع البقاء حية بين احضان عينيك حتى وأن كانت غائبة بجسدها عنك ..تلك النظرة اعرفها جيدا ..نظرة من لم يعد يستطيع ان يكون حاضر بجوار الفراغ ...نظرة آلم ووحدة وغضب من البعد من الفرقة من انكِ لستى معى زتنى من اتمناها من الدنيا نظرة .. ستبقين بداخلى مهما افترقنا ونحن حتما سنفترق ولماذا ؟ فنحن فى الاساس فى فراق مستمر ؟ فأنا دائما هنا وانتى داءمة البعاد نظرة اعرفها جيدا .. نظرة لم اعد استطيع تحمل عيش حقيقة فى زمن زيفت فيه الحقائق ..تلك نظرة اعرفها جيدا .. نظرة حبيب مفارق حبيبه غاضب منه حتر الرغبة فى الانتقام ولكنها تظل وحتى آخر العمر ... نظرة حبيب عاشق متيم مشتاق لحبيبته البعيدة مهما حاولت افاعال الغضب مهما حاولت نشره وسط البشر ، مهما حاول اللسان النطق بعبارات الادانة لها ... تقول عينيك عكس اللسان يقول اللسان تعبت .. تقول العيون أحب يقول اللسان لا اريد اللقاء .. تقول العيون مشتاق يقول اللسان ويحكى ويلوم .. وتقول العيون فى القلب انتى الروح باقية غاضب اللسان .. محبة العيونمتمرد اللسان .. مشتاقة العيونلدى اللسان الكثير ليقوله.. وحيدة العيون شريدة من دونِكيقول اللسان أكرهك ..... تقول العيون انتى حبيبتى حتى بعد الوجود

الأربعاء، 5 مايو، 2010

شمعة حب ....



حبنا شمعة ولعها شوقنا لبعض على طول سنين عمر طويلة


مشوار وحدة نورته ضلمة الخوف


جه حبنا قنديل زيت جواه شمعة حب ضاع فى نورها ضلمة الخوف والوحدة


مشينا مشوار سوا كله شموع نوُرت بنورها نار الحب والشوق فى قلوبنا نورت قلوبنا بنورقوى شفاف صافى


شمعة معطرة عطرت بعطرها الحياة ادت من عطرها لزهور الربيع


أديت من الوانها البهجة لألوان الصيف


أديت من خفتها شجر الخريف


ومن دفاها خادت شمس الشتا كل الدفا ...........


لكن ,, يا حبيبى الشموع عمرها قصير مهما طال


وانهاردة دابت شمعتنا وساحت يقل ضؤها ويخلص وتنتهى يختفى منها النور يرتجف خيطها من خوف قرب النهاية وترجع من تانى ورود الربيع ينقص منها عطرها .. وبهجة الصيف تبهت الوانها ... شجرة الخريف يفارقها اوراقها ومايبقى غير اغصان خشب عجوزة وحيدة ميتة من غير حياة ...يغيب وسط الغيوم دفا شعاع الشمس الذهبى ..


تدوب شمعتنا وينتهى خيطها ويختفى ضؤها وتنطفى , يغيب النور وترجع تملى ضلمة الوحدة والخوف والبعد وتحل علينا غيمة فراق تعتم من حواليها الدنيا وتنمع اى نور ممكن يجى من اى براح ....


بس الحب ......


ورود.. مهما دبلت يفضل عطرها فيها


ورق خريف ... مهما سقط بسقوة اغصانه لسه تقدر تزهر غيره


بهجة صيف ... مهما اختفت منها الالوان قادرة تجيب من زرقة البحر والسما الوان تانية وتالتة


شمس شتا .... مهما غابت ورا غيوم وسحاب نورها قادر يضىء الكون


ودى شمعة حبنا انطفى !!! طرف خيطها موجود


أنطفى نورها !!!!!!! عطرها فواح مالى حبات الهوا من حوالينا


ده حبنا .. أبتدى بقوة شمعة معطرة نورها قوى خيطها أبدا مايرتجف مهما انهزت الارض من حواليه عطرها فواح واصل لأبعد سما الكل شايف سامع حاسس بوجوده ، داب زى مادابت الشمعة بس لسة له خيوط تدينا الامل فى بداية جديدة فى اننا هنرجع ننورها تانى ...


الحب اللى اساسه قوى مايموت ولاينتهى ابدا تسيح شمعته بس منها ممكن نعمل الف شمعة تنور الكون كله.....

الخميس، 1 أبريل، 2010

اتخنقت اخر حاجة ....


بجد بجد انا اتخانقت آخر حاجة انا بقى عايزة حد يقولى بأمانة كدة لما كلنا مظلومي وياعينى علينا وكلنا بنعيط على اطلالنا وبنوًح على نفسنا يبقى مين بقى المفترى الظالم اللى ياحرام عامل فينا كل ده ؟؟؟؟؟؟؟؟! وزير الضرايب صح !!!!؟

بجد انا مش فاهمة فى ايه كل ماقابل حد الاقى بيسب ويلعن فى الناس واللى جايين علية واللى بيعملوه فية واللى مش مقدرين مدى تضحياتى وبعمل وبسوى وماحدش بيقول شكرا ولا حد بيعبرنا والناس كلها بتيجى علينا ... بلا بلا بلا بلا بلا اووووووووووووووووووف بس كفاية اللى يخرب بيت الكفرة مش كدة يابشر بجد مش كدة فى ايه ؟؟

الحدوتة كلها اننا بنختار بعمل حاجات للناس فى ناس ولاد اصول بتعرف تعبر عن العرفان وفى ناس لظروف ما أى كان ايه هى مش بتعمل دة ساعتها بقى نقول فل وقشطة وادينا عرفنا ان فلان ده ميته كذا يبقى اتعامل معاه بالطريقة الفلانية وخلاص " اعرف صحبك وعلم عليه يامعلم " ايه بقى ايه الحكاية .....

فى حد يقولك انا اللى بسأل على طوب الارض وماحدش بيعبرنى ويزعلو منى لما ماسألش .. ماشى

انا زمان كان واحدة من قرايبى كانت صحبتى قوى كنا قرايب واصحاب قوى فى نفس ذات الوقت وكان ابوها غتييت قوى فى قصة مكالمات التليفون ومن النوع اللى بيقفل التليفون بقفل وحاجت كدة اكيد ساعتها ماكنش ينفع اقولها انتى ليه مش بتتصلى بيه وانا بس اللى بتصل بيكى لانى ساعتها هبقى عاملة زى خفت لايشيلو العدة مع انى ماعنديش تليفون ،، بس لما تمر الايام وربنا يكرمنا باختراع الموبيلات ويبقى عندها واحد وبرضة ماتتصلش لاء هنا فى مشكلة اتكلمت فيها وخلاص ساعتها عرفت انها مش طلبانى معاها قشطة انا حاولت وسألت ومابلاقيش ردود مقنعة فاخلاص يابنت الناس كل اللى ليكى عندى مكلمة صلة الرحم وشكرا ، ماينفعش اجى واقول الدنيا جاية علية وهى مش بتعبرنى وليه انا اللى لازم اكلمها وهى بتزعل لوماتكلمتش ........فى ايه لاء خالص هى بمنتهى البساطة مش طلبانى وهى مكسوفة تقول خلاص مش طلبانى يبقى مش طلباها مع السلامة واتنمالك الخير وبينا حبل ود برضة بس الصداقةوالاخوة والجو دة لاء خلاص حقوقه خلصت الحب بينا ماخلصش بي اللى خلص اننا نتعامل بحقوق وواجبات الحب ده لكن المشاعر مالهاش دعوة ...عشان مانتوجعش ونندب حظنا على السنين اللى راحت لاء انا كنت مختارة أاقدر لماكان فى ظروف بس لما الظروف تروح والدنيا تروق يبقى الاختيارات هتبقى على اعتبارات تانية مختلفة مش هنقطع علاقات بس على الاقل هتبقى على اساس واللى اوله شرط مابيكلمش عادة هههههههه

الحدوتة التانية بقى احنا اصلا بندخل على بعض ونفتح على بعض ونتعامل مع بعض على اى اساس ؟؟

هو ينفع اى حد فى الشارع معدى اقول عليه صديق عمر وحبيب هارتى ؟؟

هو ينفع اى حد يطل مننا خدمة نعملها دغورى واحنا مأفلين عيوننا ومخنا ؟؟

هو اصلا ينفع اى حد يطل مننا خدمات ،، هى سبيل !!!؟

طب هو ينفع غصب عننا نعمل حاجة احنا مش عايزين نعملها بس لمجرد ان الناس تبقى مبسوطة ونولع احنا ؟؟؟ ماحنا اصلا مش بس بنسكت ماحنا ياريتنا بنعملها ونسكت لاء احنا بنعملها ونيجى نعيط بعد كدة ونقول ماحدش بيقدر ولا حد بينيل ... طب هو مش انا اللى اخترت !؟ مش فاهمة بجد ... وبعدين ماحدش يتشملل ويجى يقولى لاء ماحنا المفروض نساعد بعض والمفروش الناس تقدر والمفروض الناس تعامل بالخير وتروده بالخير واننا نفرض حسن النوايا .... طب ماهو الطريق الى جهنم مفروش بحسن النوايا ،، ولا ايه !!؟؟

انا مش بعمل على الناس البت الجدعة اللى بتدى فى نصايح بس انا اول وحدة عملت ده والكلام ده بقولو من تجارب كتيييييييييييير وقعت فوق راسى ساعتها ماكنتش فاهماها وكان نفسى الاقى حد يقوللى قبل مانا اتعك فيها بس اللى حصل ان ربنااختار انى اتعلمها بنفسى عشان تثبت اكتر جوايا وكل ماتحرق القلب بنار الندم على حاجات وغلطات غلطتها كل ماعرفت انى احمد ربى اكتر على التجارب كانت مرة وقاسية ودمها تقيل بس اتعلمت وفى منها اتكرر وفى منها اتكرر بس بصورة اقل وفى منها راح خالص بس بجد الحمدلله اللى علمنى وبيحطلى كل يوم علامة تخلينى اجرب وافهم واستوعب على قد ماقدر ، فانا مش بقول محاضرة لحد انا بنقل خبرة حصلتلى وبجد كلنا بنقول كدة كل يوم ،، انا اللى خلانى اقول كدة انى انهاردة هنا عالفيس بوك نص اصحابى اللى عندى كانو كاتبين كلام شبه اللى انا بقوله ده فقلت بدل ماكلم كل واحد لوحده قلت اقول للناس كلها مرة واحدة وقول لنفسى معاهم ...........

- م الأخر احنا طول الوقت خايفين من شوية حاجات كدة اولها : اننا صورتنا تبقى وحشة فى عيون الناس اللى حوالينا فابنحاول طول الوقت نعملهم اى خدمة يطلبوها عشان يشوفونا كُرما ، يشوفونا جدعان وصحاب اصحابنا وسداديين يعنى ، مع انهم ممكن مايكونوش اصحابنا قوى يعنى او هما معانا فى الشغل مثلا او فى الجامعة ويكونو هما اصلا بيستغلو فينا ده طول الوقت وبيخدو اى حاجة وطبعا ساعة ماحنا نطلب حاجة شكرا مانلاقيش اى حاجة ، عشان اصلا ماكنش فى بينا حاجة بجد احنا بنستغلهم اننا نحسن من صورتنا قصاد الناس وقصاد نفسنا وهما بيستغلو ده لمصالحهم الشخصية ...

- حاجة تانية بنخاف اننا نبقى لوحدنا فابنعمل اى حاجة لاى حد عشان يفضل طول الوقت حاسس انه مبسوط وهو معانا فاأكيد مش هيسبنا طول ماهو مبسوط فامش هنكون لوحدنا وده اللى احنا عايزينو فنقدم تنازلات ونعمل حاجات زيادة عن المطلوب عننا ونيجى على نفسنا طول الوقت ونعمل تضحيات على الفاضى والمليان ونبرر لنفسنا انه صاحبنا وبنحبه ونحب نشوفه مبسوط ، كله جميل كله حلو بس فى الاصل مش ده الهدف من كوووووووووووووووووووووووووووووووووووووول التضحيات والمأسى دى ، الهدف هو اننا خايفيين من الوحدة اننا مايكنش لينا اصحاب ، بس فى الحالتين اخنا مالناش اصحاب واحنا لوحدنا خلاص معروفة ، وفى الحالة بتاعت التضحيات الكبرى دى برضة احنا مالناش اصحاب لان دى مش صحبية مش صداقة مش حب مش جواز مش علاقة اسرية او قرايب مظبوط فاحنا برضه بنحس اننا لوحدنا لاننا اصلا مش مقتنعين من جوانا اننا صح ومدركينه لانه لو احنا مدركين انه صح يبقى بنضايق ليه ؟؟!! مخلاص اللى بيعمل خير بيرميه البحر ، لما بتتصدق صدقة بتندم عليها وتقول ياريتنى ماعملت انا كنت اولى !!!؟ ده نفاق بعينه

ولو العكس حصل اتصدقت وايدك اليمين ماعرفتش اديت كام بالشمال ونسيت انك اصلا طلعت فلوس او اى نوع صدقة يبقى كدة برضة مش تمام ،، خير الامور الوسط انك تتصدق وتبقى واعى ومدرك بالخير اللى عملته بش مش هنمشى نغنى بيه اكيد ....

فى حاجات كتير بتحصلنا احنا اللى بنختار تحصلنا وفى حاجات مش احنا اللى مختارنها اكيد ، يعنى لو ابوية ربنا اختاره انه يبقى عنده شوية مشاكل كدة مع نفسوياته ده انا ماليش فى ذنب نبى هيبقى فى اختيارى للمعاملة اللى هتعامل بيها مع المشكلة دى هختار ابصلها ازاى

هبصلها ان ، ابوية ظالم وقاسى ومفترى وبيجى علية فانا هطلع عينه بتصرفات زبالة اعلى صوتى او ارود عليه كلمة بكلمتها او اى حاجة شبه كدة ؟ ولا هختار مثلا اننا نتجنبه تماما ومالناش دعوة بيه يزعق برحته يتخانق يعمل اى حاجة انا بعيد فى حالى وفى العالم بتاعى وخلاص ؟؟ ولا هختار انى اتعايش واعرف انه عنده مشكلة وخلاص زى البحر لما يبقى عالى ماننزلش ولما يهدى ننطلق ؟؟؟ كلها اختيارات بنعيش بيها وبنتعايش معاها وبتبقى اسلوب حياة ماينفعش الوم عليها حد ولا الوم عليها الزمن ولا الدنيا ... انا اللى اخترت

ولو اصحاب نفس الحكاية كلنا فينا بلاوى وعيوب وكل حاجة،، صداقة الحق ليها حقوق وكلنا عارفينها طبعا وكل واحد فينا بيبقى عنده حتة زيادة بتبقى ليها علاقة بمباجىء وافكار البنى أدم نفسه بس الاصل كلنا عارفينو ، وهنا فى حاجتين

صحبك على عيبه مبدأ معروف بس برضه احنا اللى بنختار على حسب العيوب اللى نقدر نعيش معاها ونتعايش بيها مع صاحبنا ده يعنى واحد ممكن يقبل انه صحبه انانى خلاص ماتجيش تشتكى بقى انته قبلته على عيبه فى حد تانى لاء يوجه يقول انت اناى وانا مش حابب ده معايا ممكن يطلع صاحب جدع ويشتغل على عيبه شوية وممكن لاء ويبعد عنك خلاص خلصت كدة عادى هتلاقى صديق غيره لان اصلا الصديق اللى يزعل من صديقه عشان عايزه احسن يبقى عيل اهبل قلته احسن ، الاستغلال الانانية المعيلة دى عيوب انا ماستحملهاش فى الناس اللى بتعامل معاهم بس دى عيوب اساسية اشترك فيها جزء كبير من الناس اللى عرفتها فى الاول قلت هستحملها وصحبك على عيبه وابتاديت اتنازل واجى على نفسى بزيادة مع ناس انا عارفة اصلا انهم بيعملو معايا كدة يعنى كأنى سلمت قط مفتاح الكرار انا عارفه انهم كدة وانا رويتلهم الارض اللى تنبت اناية واستغلال ةمعيلة اكتر واكتر لحد مابقيت حق مكتسب مش صديقة وطبعا معظم الصداقات دى انهارت وللاسف انهارت بعد سنين مع بعض طاقتى راحت وكل حد خد منى حاجة عرفت بعدها انى انا اللى اديت بأيدى سكت ومتكلمتش وقلت هظبطنى ومحصلش طبعا الكلام دة .......

الخلاصة : انت انسان عندك مبادىء واهداف وافكار ووجهات نظر فى الحياة اللى حواليك ، فى تنازلات بس لمين وفين وامتى وازاى وليه ، محكمش على الناس بسرعة مش اى بتاع انابيب ماشى فى الشارع اقول عليه صديق ، فى زميل فى صديق فى صاحب فى حبيب فى اب فى ام فى اخوات فى عشرة فى عيش وملح فى حاجات كتير وكلها ليها حقوق وواجبات والاتنين لازم يبقو عارفينها وبيعملو بيها لو مش بنفس الدرجة يبقى مش اقل منها بكتير ، احنا اللى بنختار عندنا عيون بتشوف اقدر اعرف الانسان ده فعلا يستاهل اقدر ظروفه ولا هو بيستهبل فى كل الحالات انا اللى مختار اضحى حتى الموت او استندل او فى النص انا اللى مختار ماجيش اولول على بختى .. بس كدة

الأربعاء، 31 مارس، 2010

احنا عايشين فى زحمة يادونيا زحمة ...........


بجد انا مبأتش عارفة اخرتك الزحمة اللى احنا فيها دى ايه ولا احنا عايشيين فين ولا الناس بقت عاملة كدة ازاى ولا ليه وتقريبا كدة اخلاق الناس اتأثرت بالزحمة اللى احنا عايشين فيها وبالضرايب اللى عمالين ندفعها ... الموضوع غيرب شويتين بس القصص اللى اتحكتلى وخالتنى اقول الكلام دة اغرب واغرب ،، الحدوتة دى حكتهالى بنت فوق الاحترام بشوية بمعنى كلمة محترمة كلمة قليلة عليها جدا

هى بنت مصرية جدا حتى شكلها مصرى قوى كمان خمرية وعيون سود وشعر اسود خفة دم اصلى مصرى البنت دى بتشتغل فى شوية اماكن كدة كلها ليها علاقة بالشارع والتوعية بالامراض الخطيرة اللى فى البلد اللى محتاجة تقبل من الناس اللى حوالينا للناس اللى ربنا ابتلاهم بامراض دون ناس تانية ، يعنى م الاخر كدة بنت عندها رسالة واهداف مش من النوع اللى عايش اللحظة ولامأضيها نت وموبيلات وخروجات وشوبنج والجو ده دة بيتعمل برضة بس جنب حاجات تانية دة مش كل الدنيا ...

المهم البنوتة اللطيفة الجدعة دى حكيتلى حكايتين حصلو معاها واحدة فكرتنى بالزحمة اللى احنا عايشين فيها والتانية فكرتنى بالضرايب

- حدوتة الزحمة : فى الزحمة كل واحد بيقى بيدور على مخرج يخرج منه ويلاقى لنفسه مكان بدراعه من اول سواق الميكروباص لغاية مغنى لكل مواطن وممثل لكل عيل والجو دة ، وفى زحمة البحث عن الذات وان الواحد عشان يحس بنفسه لازم يلاقى لنفسة مكان بدراعة مادام هو حاسس انه مالوش لازمة ماهى زيطة اصلها ،، الحدوتة كلها انها مرة كانت فى المترو وتذكرة المترو وقعت منها وهى جية تعدى من بوابة المترو خادت بالها انها مش معاها التذكرة فاجلها بتاع آمن المترو وعمالها مشكلة ولازم تدفعى غرامة وهاتى بطقتك وقدامى على مكتب الامن ، هى ردت عليه انه ماشى هتدفع الغرامة بس مش هديك البطاقة انت مش ظابط عشان اوريك البطاقة ، لاء ازاى بقى تقوزل كدة على صوته ومسكها كدة بطريقة مش حلوة من شانطتها فهى قالتله لاء انا كدة هاقدم فيك شكوى فى القسم وفعلا كبرت الحدوتة لان بتاع الامن ده اتعمله محضر وشكوى واتنقل من مكانه بسبب اللى عمله معاها من قلة آدب وذوق ، وفى يوم لقيت امه بتتصل بيها جابت نمرتها من محضر الشكوى واستعطاف بقى ده غلبان ، ده مش عارف ايه ، مستقبله والجو دة ،، فالبنت صعب عليها انه يتبهدل خصوصا انها خدت حقها منه فاخلاص اتنزلت عن الشكوى عشان ظروف الراجل ......

يعنى الراجل ده قاعد طول النهار يراقب فى الناس والدنيا زحمة جدا وآلاف يعنى بيزوغو من الجنيه بتاع المترو ووسط ملايين ركاب المترو مين ممكن يفكر فى الانسان ده ولايشوفه حتى احساس بالدونية وسط الزحمة طبيعى بدراعه يلاقى لنفسه مكان وسط الزحمة بأنه يفرض سلطته " مراقب تذاكر مترو " على الناس اللى هما مش معاهم تذاكر مترو ... وزحمة يادنيا زحمة

- الحدوتة التانية بقى ودى ليها علاقة بالضرايب ، موضة العصر الضرايب فطبعا لازم الحواديت تبقى على الموضة فاايه بقى صديقتى العزيزة دى المحترمة الملتزمة بمبادئها وبالابيض والاسود والحقوق لازم كمان تواكب الموضة وتدفع هى كمان الضرايب بس على ايه بقى؟؟؟؟؟؟ على احترامها ايوة الضرايب اليومين دول على انك لو بنت محترمة وعندك مبدأ وماشية مستقيم ومابتسمحيش بالعوج يبقى لازم تدفعى ضريبة ده " طبعا عشان نسدد العجز فى القلة الادب اللى احنا عايشين فيه " ماعلينا .. ايه بقى الضريبة اللى البنت دى دفعتها البنت دى دفعت ضريبة احترامها قلق وتوتر وسخافات من بنى أدم عديم كل حاجة وحرقة دم ومحاضر وبوليس واقسام وايام من القلق وحرقة الدم كفيلة انها تجيب لحد مرض بعد الشر عنها طبعا وعن كل الناس ،، الحدوتة بتقول كدة : من اسبوع جالها مكلمة تليفون على الموبيل من واحد ، ترن ترن ،، الو ،، فلانة معايا ، ايوة يافندم مين ، تييييييييييييييييييييييييييييييييييييييييييييييييييييييييييييييييييييييييييييييييت كتير قوى بقى كلام زبالة وحقير وزى ماهى دايما بتقول " كلام تقشعر له الابدان " كلام من اقذر مايمكن ان تسمعه انسانة ، يعنى لامؤخذة لو هى بتقف تحت عموايد نور ماكنتش هتسمع اكلام دة فمبال انها العكس تماما زى ماقلت انها فوق الاحترام ،، المهم طبعا هى قفلت السكة وبعتتله رسالة هزأته فيها وماتتصلش هنا تانى ، طبعا هو ماسكتش ، راحت رايحة على القسم عملة محضر بالقصة دى بصراحة الظابط استجتع معاها وسمعها واهتملها بشكوتها وهنجيبة حتى لوالنيابة معملتش حاجة هو هيتصرف ، بس الظابط حاليا فى مأموريات وسفر والدنيا ساحت كدة فجأة وهى لسة عايشة فى قلق وتوتر وحرقة دم وحالة انعدام وزن بسبب واحد مسمعش عن التربية قبل كدة ولا يعرف يعنى ايه احترم حد محترم ، ده حد عيان بالغيرة والحقد وبيتعامل بيهم طول الوقت ،، بس ياخوفى لايطلع مختل عقليا فاهمنى طبعا ...

اللى انا مش فاهماه بقى يعنى عشان فى ناس محترمة دى بقت ميزة تميزهم عن غيرهم من البشر فالازم يدفعو ضريبة عليها ، يعنى انا بنت دى يميزنى ويدفعنى ضريبة على نوعى اصلا كمان بقى محترمة وخط مستقيم يبقى كمان لازم ادفعها الضعف بهدلة واقسام ومحاضر عشان واحد الشتيمة خسارة فيه ، ايه بقى احنا عايشين فين وامتى وفى انهى زمن وانهى عصر ، صحيح الرجالة ماتو فى الحرب بس مش انقرضو يعنى !!!!! بجد انا كمان محروق دمى جدا بقينا عايشين زمن الفسل عايز يعمل من نفسه تمثال واللى مش نضيف عايز يخلى النضاف زيه الحقد والغيرة والانا العليا هنروح فين تانى هنروح فين بعد كدة نروح كوكب تانى ولانعيش حلم افلام الخيال العلمى مابقاش حد عارف يمشى فى الشارع ولا ينام فى بيتو مستريح ابقى قاعدة فى امان الله بشتغل وبساعد الناس اللى حوالية ولابذاكر ولاسايقة عربيتى ولابرقص حتى والاقى واحد على تليفونى بيهزأنى ويشتمنى كدة غتاتة بواخة علية مثلا فاضى فابيتسلى اييييييييييييييييييييييييه ده اسمه ايه ده فى انهى شرع ولاقانون ولادين ولاكفر حتى مافيش كدة ابدا ،، كفاية نقلد تقليد اعمى مش لازم احنا كمان ندفع ضرايب على احترمنا وأدبنا كفاية بندفع على الاربع حيطان اللى مدارينا ، ووحياة ابوكو شوية نظام واحترام للبشر مش عشان الدنيا زحمة نقوم نكسر على بعض ولا نلزق فى بعض بالغط ونقول زحمة ولا نعلى صوتنا عشان غيرنا يوشفنا فى وسط الزحمة ، اظن عيب بقى وكفاية ،، ولا ايه !!؟ وياريت لما نلاقى حد بيطلب حقه نساعده ونعمل شغلنا اللى هو نحافظ على الناس ده احنا خلائف فى الارض مش كدة يعنى ....... استرها يارب علينا

الخميس، 25 مارس، 2010

زى النهاردة


زى النهاردة......

كان يوم جميل يوم من ايام الربيع شمس دافية سما صافية ورود بتتفتح فى كل مكان انا والكون انا والطبيعة اعز اصحاب احضن الاخضر عيون عاشقة للسما قلب غريق فى حضن الفضا مافيش هموم مافيش احزان مافيش خوف الدنيا مش لون واحد دى ميت الف لون ولون بيحضوننى من كل مكان مش لوحدى مش خايفة ...

شعاع شمس طالع من عينيك بيقول بكرة احلى بكرة ربيع صحى ربيع القلب جواكى انا معاكى والكون براح مع كل رودة من ورود الربيع لسة بتفتح لسة بتتعرف على ندى فجر الربيع حبة حبة تفتح فى خجل على الكون خلى قلبك يفتح معايا ينسى خجله يرمى خوفه بصدر مفتوح هنقابل الندى اللى يروى عطش عشق جف من طول قسوة الشتا ....

زى النهاردة .....

قلت اوقاتى بتحلو جريت وسط خضرة احلام حلوة مالهاش آخر ومع سهر ليالى الربيع نسمة الفجرية ترعش القلب رعشة نشوة وسعادة نسمة هادية تروق البال وتنعش القلب ازاى عصافير الصبح على الاغصان الخضرا زايد جمالها !! عالى صوتها عذب ورقيق وسعيد !! يمكن حاسة بالدفا على غصن كان بردان واهو جاله اخضر يملاه بالدفا دفا البيت ...!

زى النهاردة ....

قلت عمرى ابتدى ربيعى جه بعد طول غياب املى هيفتح زى ورود الربيع بحب طاهر بلون الياسمين الابيض وريحه نقى بشذى الياسمين وعقد فل طول العمر فى قربتى ماينخلع ويربطنى بيك للابد طوق الياسمين ويحطنا طول العمر زرع اخضر نرويه يوم بيوم حى طول ماحنا حواليه وطول ماحبنا حى ينبض فى قلوبنا البريئة .....

بس النهاردة ، وبرضة فى يوم من ايام الربيع نفس الحالة واكتر وزايد عليها نار الفراق والشوق...........

وحيدة حاضنة ورود دبلانة،،،،، فى عز الربيع !!

السبت، 20 مارس، 2010

حكى الشوارع


امشى واسمع بودنى حكى الشوارع عنى .........

اللى يقول ... مجنونة مهبولة تعدى من هنا كل يوم !!

واللى يقول ..... عاشقة ولهانة بتيجى هنا كل يوم !!

واللى يقول .. تسأل عن حبيب هجر باع سافر لبعيد ... واحنا أش درانا !!

ياعينى ياحرام قد ايه حالها يصعب عا الكافر !!

ولا حرام ولاحاجة تلاقيها عاملالها مصيبة فيه عشان كدة سابها !!

بطلو افترى عا الخلق ماحدش يعرف ظروفها ايه !!

بس بصراحة زهقنا كل يوم تيجى وتمشى تدور بين وشوش البشر وعيون الاطفال حتى الطير بتسأله عنه !!

صحيح بتسأل بس من غير كلام عيونها تنطق !!

عيونها بتصرخ بتقول حرااااااااااااااااااااام كفاية بعاد !!

براها هدوء جواها نار بركان وحيدة شريدة بتكبى من غير دموع !!

تنده من غير صوت تننتظر مجهول مش معروف هو مين ولا منين جاى ولا امتى !!

واللى يقول ...لحد امتى يابنت هتفضلى تيجى وتدورى ..كعب داير على شىء مش معلوم !!

ياترى يستاهل ..ياترى هى هبلة !!

مين اللى ساب ومين اللى غلط ؟؟ هو وهى قلبها كبير وجاية تقول انها سامحة !! ولا هى وجاية بقلب أسف عاشق خجلان!!؟

واحنا منين نعرف وهى بتعدى لاسلام ولا كلام بس عيون بتدور وقلب حيران بس مليانين كلام !!

اه بس لو نعرف هو مين ، كنا حكيناله عنها يمكن قلبه يلين ! يمكن مش عارف يمكن مش حاسس يمكن محتاج لدليل ؟!!

واحنا منين هنعرف بس منين !!

واحنا مالنا ماتسيبوها واحنا خاسرنين ايه اهى بتيجى هنا كل يوم وادينا بنتسلى

عيب عليكو تتسلو بوجع الناس !! شكلها حقيقى محتاج لديل وبر آمان ... حتى لو هى الغلطانة

اللى بتعملو ده كتير ويقول انها تستاهل فرصة تانية ..

بس نقول لمين !!!!!!!؟

الثلاثاء، 16 مارس، 2010

الحب حاجة والجواز حاجة تانية ....


جملة سمعناها لما اطرشنا منها ومن كتر ماسمعناها ...

-سمعتها كتير اما من شاب لطيف كدة من اللى بيخروجو من الشغل لابسين نص البدلة وقالعين الكرافتة وبيقابلو البنوتة الروشة بعد الشغل برضة فى كافيه لطيف كدة فى المهندسين او فى الكوربة يتغدو ويتكلمو فى كل حاجة فى الدنيا بحرية ومن غير زواق وبصراحة ساعات وفى الاخر تلاقيه راح رايح فى مرة قايلها انا هاخطب ... وتطلع واحدة قريبت بنت خالة اخت مرات عمى مثلا ولا عمره شافها ولا عرفها وهيتجوازها .. عشان الحب حاجة والجواز حاجة تانية ...

- او نسمعها من اهل معقربين جوازة بين اتنين ولما واحد فيهم او الاتنين يتعبو الاهل يقولولهم بكرة تنسو ، ولما تقولو بنحب يقولو حب ايه الحب مش هيعيشكو مش هيعملكو فرح فى جراندحياة ولا فور سيزونز ولا هايوديكو هنى مووووون فى ماليزيا او تايلاند او جنوب افريقيا ونلاقيهم بيقولو الحب حاجة والجواز حاجة قصاد اكلام ده كولو ....

- او نسمعها من واحدة قضت سنين الجامعة كلها مولعة الجامعة بحبها لفلان ودباديب حمرا وبرافن وعزومات كبدة من الكافيتريا وفى الاخر يعينى تانى يوم الناتيجة تلاقي واحد شايل صنية بسبوسة وواخد ماما وطالع البيت عندهم وذغاريد ذغاريد ذغاريد ولما يولمها تقوله معلش انا حبيتك قوى بس الحب حاجة والجواز حاجة تانية ...

- ولا اللى يحب واحدة ويوهمها بان الحرية هى اساس الحب ولو مارضيتش تشاركه رغباته يبقى كدة هى مش بتحبو ويرسمهم عليها وساعة الجد يخلع ويقول ماتجوزش واحدة غلط معاها وساعتها بيسميها غلطة مع انه كان اسمه حب من اسبوعين .. ويقول حبيتها بس الحب حاجة والجواز حاجة تانية ....

- او اسمعها من الناس اللى مش بيأمنو انه بقى فى حب اصلا فى الدنيا وماينفعش يبقى فيه حاجة اسمها علاقة او ارتباط حب قبل خطوبة او كتب كتاب وانه ده اسمه مضيعة وقت او عيب اوفسق وفجور وضد التربية والاخلاق ويوقلك انا عمرى ماعمل علاقة ابدا مافيش حاجة اسمها كدة فى حاجة اسمها انك تدخل البيت من بابه وتتجوز واحدة من بيت او اتجوز واحد جالى من عند طانط فلانة لانه خرج بيت وهيعاملنى بما يرضى الله لانه واخد واحدة من البيت مش من الشارع ولو قلتلهم والحب يقولك حب ايه ده جواز والحب ده حاجة تانية خالص انما الجواز ياسلام هو ده عين العقل ... الحب حاجة والجواز حاجة تانية خالص ....

- او اسمعها من الناس اللى تقولك لاء انا مش بتاع جواز الواحد يقضيها كدة حب وبس انا ماليش فى المسؤليات ووجع الدماغ بتاع الجواز ده وبعدين الحب بيروح بعد الجواز ومابيفضلش غير المشاكل والسؤليات والواجبات وحاجة كدة تعكنن على الواحد .. كدة اريح ده الحب حاجة والجواز دة حاجة تانية خااالص ....

-- طبعا شكرا وعلى الدنيا السلام طول ماالناس دى بتفكر كدة وبالشكل دة يبقى فعلا الجواز حاجة والحب حاجة تانية خالص بس مش بالطريقة بتاعتهم دى .... الحب حاجة والجواز حاجة تانية يعنى ..

- اولا الحب مابيعترفش بالفوارق فى اى حاجة .... الحب مايفرقش بين البنىءدمين وبعض بالعكس الحب بيجمع اللى بتفرقو الظروف او المشاكل او اى حاجة بتحصل حوالينا بتفرق ! الحب يجمع اللى شتته الايام ...

- ثانيا الحب اصلا مسؤلية والتزام مش العكس ... يعنى اللى فاكر انه لوقضاها شهيصة وخروجات وهأ ومأ كدة ماعلهوش مسؤلية يبقى غلطان ،،على رأى احمد زكى الله يرحمه " كلمة انا بحبك عقد " ودى حقيقة كلمة بحبك لوحدها مسؤلية عليك لما نقولها يبقى معناها اننا نضهر وآمان وسكن وهدوء وثقة للى قصادنا ناخود بالنا منهم مانكدبش عليهم مانخدعهمش مانخونش كل دى مسؤليات كبيرة جدا جدا جدا قصاد الاكل والشرب والمدارس اللى بتيجى جوة علاقة الجواز لاننا لو قدرنا نحافظ على نضافة علاقة الحب هنقدر نبقى واثقين اننا نقدر بالقليل نلتزم بالمسؤليات المادية التانية ....

- ثالثا بقى للى بيفرق بين الحب والجواز بالادب او قلة الادب يبقى معلش بقى ومع كل احترامى يعنى هو ده الغباء بعين اهله لان مافيش حاجة اسمها خرج بيت لأن ببساطة مافيش اسهل من الكدب والغش وانك تضحك على الناس بالمظاهر الفارغة وبمانها فارغة يبقى اللى بيهتم بيها هو كمان فارغ لو ناوى تقفل دماغك وتبص على اللى برة اشرب بقى لانك حقيقى هتشرب المر اللى هاتخودها من بيت عشان عمرها ماعرفت حد وانت اش عرفك يابيه !!! واللى بتحب جواز الصالونات عشان مضمون ماكنش طلع المثل من آلاف السنين انه بطيخة

وبعدين لو علاقة الحب ضد التربة والاخلاق دخلتها ليه من الاول بتضحك على بنات الناس !! طب ودى اخلاق !!؟؟ اننا نضحك على بعض ونخدع بعض بكلام حب وود ووعود اننا مش هنفترق ونرجع فى كلامنا دى اخلاق وتربية !!؟؟ معرفش اعتقد اننا دايما بنحاول نرمى الناس بحجر عشان احنا نتطلع احسن من احسن كل الناس ،، مافيش حد احسن من حد كلنا بشر كلنا بنحب ماينفعش نحكم على بعض دى مش مشكلتنا ماينفعش عشان هى مسكت ايدك عشان حاسيت معاك بأمان ووثقت فيك تبقى سافلة وقليلة الادب وتستاهل تتساب اعذرنى كدة يبقى انت اللى عندك مشكلة مش هى ،، ولو بيحبك وشايلك فى قلبه وفوق راسه يبقى هيصونك ويستاهل انك تستنيه وتكافحى معاه لان اللى بيجى سهل بيروح سهل وصدقينى الحب مش حاجة والجواز حاجة تانية .. الجواز مرحلة من مراحل الحب مش هو كل الحب ولا حتى بعيد عنه تماما لكن الحب حتة منه جزء منه مرحلة ماينفعش نفصلهم عن بعض بالطريقة القاسية دى ،، ولو بالطريقة دى يبقى الحب حاجة احسن بكتير واغنى بكتير واصدق بكتير من الجواز ....

الأحد، 28 فبراير، 2010

وده كان لقانا ......


كنا اتنين والبحر كان تالتنا بعد نوة وعاصفة قوية وغيوم ،،

جو صافى وسما زرقا رايقة سحاب ابيض ناعم من الفرحة بيرسم اشكال تسعد القلوب الحزينة ،

يومها قلنا فى ساعتين اللى يتقال فى سنين ،

انا وانت على شط البحر بعد مغربية رايقة بين روايح شجر المنتزة على شط المارية الاسكندرية ،،

هناك كان المعاد كان اللقى .. عيون نازلة تلقط وتحفظ فى ذاكرتها ضحكة عيون الكون وطبيعته ،، جمعاتنا لقطة واحدة واحد خادها قبل التانى ، حضنت جواها ذكريات حلوة ،مرة ، صافية عكرة ..مش فارقة كله راح حوة حضن ضحكة موجة شقية فى نهاية شتا ...ودى كانت بداية..

يجى بعد الشتا ربيع وفى الربيع يغيب عن موج البحر هياجه ويعودله هدوءه وصفاءه ..محنا اتنين من ولاد البحر ومين يفهمه غيرنا !!؟

ورود ملونة وفراشة طايرة ملونة حرة شقية تخدك من ايدك بمكر العاشقة الخجولة لفوق بعيد فوق السحاب خدتنى معاك وكلام كلام لما لآخر الليل وف آخر الليل جه السلام ... وفى السلام مات الكلام !!!؟؟ لا والله ده السلام اللى كان بيقول بينا وعد باللقى محتوم علينا مش اختيار ..

وكل لحظة جت من ساعتها كانت عبارة عن يوم جديد سنين وايام تفوت تخدنا الحياة بعيد ونتوه ويفضل يوم بداية الربيع وكأنه ماجاش من بعده ولا ربيع ذكرى حية فى قلوبنا وعيوننا المشتاقة للقى ..

وبعد ماتفوت السنين تيجى الصدفة تجمعنا !! صدفة !!! لا والله عارفة ومن جوايا انه كان معاد بس متأخر حبتين .. يجى اللقى التانى فى خريف .. خريف ارض مجروفة مهملة من سنين من كتر بوارها سكنتها مملكة من التراب الاصفر وضلمة ووحشة واصوات عويل قبض قلب خايف فى نهاره اكتر من ليله .. ناسى حنان تربة مابقتش خصبة نشفة عطشانه مشققة تحتيها آبار من التراب نسيتها المية والحياة من سنين محتاجة شغل عمر عشان بس ترجع خصبة من تانى ترجع ارض يمكن تدب فيها الحياة من تانى ...

جيت معاك آمل فى رجوعها للحياة بمية الصبر وايد من حديد وقلب عنيد عشان يزرعها من تانى يضحى بالغالى ..

جيت فى معادك تملى الارض بمية خير سيول العزم والاصرار عطاء أدى الارض تديك اكتر بكتير مهما تعبتلها اللى عندها كتير بس انت اعند اشتغل حب واصبر وهى مستعدة ..

وأدى اول طبقة ناشفة مشققة مجروحة من ارض القلب البور رجع يدب فيها من تانى أمل ،، أمل فى الحياة أمل فى النجاة ، أمل فى الاخضر

خير ومية تروى ارض عطشانة من سنين مش يومين ولا شهرين هتتروى دى محتاجة مرعية السنين بس لسة الامل موجود..

بس قلة الصبر تولد معاها خيبة امل مهما رويت كتير لسة الارض بتشرب بس من غير ماتتروى لسة ارض فاضية زرعتها مش باينلها بنتة .. يادى الورطة وبعدين .. الصبر بيقل العند بيتبدل من رغبة قرب ونجاح ومراعية لاحباط وفشل ورغبة فى الهرب ...

ايه جرى ايه من اولها كدة تخازل من اولها كدة تراجع من اولها كدة نخاف على نفسنا فجأة اطفى فى القلوب اللهيب ،، فجأة العند يولد انانية ويغمى العيون عن الامل راح فين الامل راح فين شلال الصبر ولا الصبر كان سيل عارم له وقته وخلص ماكنش نهر فياض كل ماتاخد منه يزيد !!!

فيضان خير كتير ومية كتير تيجى فجأة من غير حساب تموت الحى وماتنبتش غيره ... وده كان الوداع فى ارض كالحة مجروفة تراب مايشلش جواه اى خير تراب يعمى العيون ويسد مسام القلب عن الاحساس ...

الخميس، 25 فبراير، 2010

مدد يارسول الله ....



مش عارفة من حسن الحظ او من سوء الحظ اننا عايشين بعده ب 1500 سنة ، مش هتفرق لانه ايان كان مش هنغير القدر بس اكيد كلنا كنا بنحلم نشوفه ونتكلم معاه ونسمع منه عن الدنيا والدين المعلوم والمجهول ... ياحبيبى يارسول الله


مش عارفة فكرت فيها كدة وتخيلتها رب العالمين الله اللى خلق الكون ده كلو بشر حيوانات نبات كواكب مروج ملايكة شياطين ذرة وايونات كمياء وفزياء طب وصيدلة داء ودواء مياه وارض كائنات عايشة فى احضان الجبال وجوة المحيطات جبال سما ارض اخضر ياااااه ده غير المعانى الشر الخير الخيانة الامانة الصدق الكدب ........... جنة ونار يا االلللللللللللللللللللللللللللللللللللللللللله سبحانك ربى ،، كل ده كل القدرة دى ومن بين كل المخلوقات دى اصطفى الله بشر بنىءدمين ينزل عليهم رسايله ويكونو رسله للعالمين ويكون اخرهم الحبيب مسك الختام الصادق الامين المؤمن بالفترة على ملة ابراهيم وآمن بكل الرسل اتربى يتيم لكن مش وحيد رباه ربنا وعلمه القراءة والكتابة من عنده ياااااااه ياه لما بشر انسان رجل ربنا اصطفاه وحبه ربنا حب محمد بن عبدا لله ياااااه انسان ربنا يحبه ، صادق امين خلقه القرآن زى ماقال ربنا تخيلو بقى لما الشخص ده يكون هو نبينا هو الرسول اللى جايبلنا احنا الرسالة شوفو بقى اد ايه احنا محظوظين فيه ...


وفى ذكرى ميلاده نوره اللى نور علينا حياتنا وخادنا من ضلمة وعتمة لنور وبصيرة ابسط هدية نقدمهاله نقدمها للانسان اللى مش هيدخل الجنة الا لما اقل اقل اقل واحد فينا يدخلها الرسول هيستانانا لحد ماكلنا ندخل !!!!!!!!!!!!!!! يالله ايه الكرم ده كله ايه الاخلاق الرفيعة العالية قوى دى معقول اصلا احنا نستاهل الكرم ده كله !!!!!!؟ مش عارفة


فكرت كتير لاقيت اننا نقدر نعمل ايه نقدر نقدمله ايه قصاد العذاب اللى شافه عشانا وقصاد التضحيات اللى عملها بس عشان انا وانت نطلع اسمنا مسلمين وعندنا قرآن منهج عظيم نمشى عليه وينسقلنا حياتنا بالشكل ده ... الهدية الوحيدة بعد الصلاة عليه يوميا طبعا هى اننا نحىى ذكراه ونسلك منهجه على قد مانقدر طبعا وياريت نجاهد نفسنا اصلا اننا نشتغل على نفسنا طول الوقت عشان بس نقرب حبة كدة بدل مانا شخصيا حاسة انى بعييييييييييييييييييييييييييييييييييييييييييييييييييييييييييييييييييييييييييييييييييييييييييييييد جدا ......ازاى :


- محمد الحبيب المصطفى كان خلقه القرآن .. صادق آمين حنون آثر كريم شجاع لسانه ناطق بالحق حامل رسالة وعنده مبدأ وحارب علشانه عشان يوصل للحق حكيم شايل الحق سيف يقدر يحارب بيه كل خطء يكره الخطأ لكن الخاطىْ دايما له فرصة تانية ، الناس عنده معادن وكان بيبص للناس على انها معادن فيها القيم وفيها اللىىىىىىىىىى .... دايما مابيحكمش على اى حد طالما ماهواش فى ساحة قضاء حليم وعفو بيقدر المرأة أب رائع ومحب وزوج حنون أبن بار بعيلته كلها مع انه يتيم ... يعنى مالناش حجة وماينفعش نقول ياعم ده نبى رسول اكيد عنده حاجات مانقدرش احنا نعملها لاء خالص بقى على فكرة لأن ببساطة ربنا ربى وربك قال ان فى محمد قدوة لينا كلنا يعنى اللى عمله محمد تقدرو ياولاد آدم تعملوه يعنى ينفع ماكندبش ينفع ندافع عن الحق عن المظلوم عن الضعيف عن اليتيم ينفع مانحكمش على بعض من لبس او طريقة كلام او اسلوب اكل ينفعش نؤمن زيه ان الناس معادن يعنى نبص جوة الانسان فى ايه مش براه ابدا وكمان هو قالنا ان المؤمن لو فى مقدرته يبقى شكله مهندم ومرتب يبقى شى ء جميل ... لما يقدر يقف جنب بناته كأب حنون مع كل مشاغله اللى عنده يبقى ماينفعش تقول انك مشغول عن ولادك بلقمة عيش تأكلهالهم هو كان مشغول بهموم أمة بحلها نشر دعوة مسؤليتها تقيلة قوى قصاد مسؤليات مديرك فى الشغل ومع ذلك لاقصر هنا ولا قصر هناك واحنا نقدر نعمل كدة


لما يجوز بنت عمته للشخص اللى هى اختارته بنفسها ولنفسها يبقى بيحترم مشاعر المرأة وعارف ان العفة مسؤليتنا كلنا اننا نساعد بعض على اننا نوصل للطرق السليمة وان الحرمان من الحبيب ممكن يعمل مشاكل كتير ،، فعلى ايه !! صلى الله على محمد الحبيب


الامانة والايثار والكرم والمحبة للصغير والكبير احترام الاخر ومعرفة ان لكل بلد عاداته واخلاقياته وماينفعش نتعدى عليها حتى لو حاملين رسالة وعايزين ننشرها وكمان قالنا ان مافيش فرق بين اى شخص والتانى غير تقواه يعنى اللى يفرق بينا بس مدى تقربنا من الله وتقوانا اللى فى قلوبنا ...


اوعو تكونو مندفعين الاندفاع من اكتر الحاجات اللى كان بعيد عنها تماما واحنا عايشين فيها اصلا احنا مش بس مندفعين لاء ده احنا معجونين بمية الاندفاع ..


كمان الكرم والرحمة .. احنا مابنعرفش نرحم بعض ولا نسامح بعض ولا نكون كرما مع بعض والكرم مش فلوس ولا اكل ولاشرب لاء طبعا الكرم كرم الاخلاق اننا مانبخلش على بعض بوقتنا بصحتنا بمعرفتنا بحبنا ،، مانكونش انانيين لأن الانانية دى من امراض القلوب الخبيثة بتدخل فجأة وممكن تعيش وتتغذى جوانا واحنا مش عارفيين ولا واخدين بالنا منه وبجد المرض ده بيموت اى مشاعر حلوة بينا وبين بعض .. الحبيب جالنا يكمل مكارم الاخلاق ... الحبيب جالنا رحمة جالنا نور ... فاكبر هدية هى اننا فعلا نتحلى بالاخلاق اللى هو قال عليها انه بعث ليتممها جالنا عشان احنا نعرف كل الاخلاق الحميدة فاعتقد عيب كل العيب اننا مانحاولش نزين قلبنا ومعاملاتنا مع بعض بالاخلاق الأدب الاحترام نكون محترمين بقى ياجماعة وكفاية قلة أدب بالله عليكو تعبنا بقى .. شوية احترام جار على بر والدين على اتقان فى شغلنا على حب غيرنا ومانبقاش انانيين على تمسك بكلمة الحق على الايمان والاستماتة على المبدأ على شوية شجاعة بقى ونقف فى وش الظلم ونحقق العدل فى الدنيا من حوالينا حتى لو فى خدم فى البيت حد من اهلنا بيظلمه نقف نجبه ونساعده حاجات بسيطة على فكرة ماهى حياتنا مقارنة بحياته بسيطة جدا بس احنا شايفانها تقيلة وهى كدة ماهو اللى بيحارب عشان الظلم بيتحارب بمنتهى الظلم اللى بيحاول يمشى صح بيتاخد مخالفة واللى بيقول كلمة حق بينقط لسانة واللى بيتقن عمله بيتريقو عليه واللى بيحب بيتكره واللى بيثق بيتخان .. بس وايه يعنى ماهو كمان اتخان وفى منافقين كانو حواليه وهو كمان اطعن فى شرفه وهو كمان اتكذب وهو صادق آمين وخانوه كتير ... ومع ذلك كان بيدعلهوم بالهداية ومع ذلك مات على الحق وعمره ماتغيرت اخلاقه .. انصروه بالله عليكو واتحلو بالاخلاق اللى تعب عشان يعرفهالنا ويحافظلنا عليها واحنا نسيناها وسط زحمة الحياة مع اننا لو افتكرناها وعاملنا بيها هنعيش احسن لاننا هنعيش مرتاحين يعنى لو اتعلمنا نسامح ونقدر ونعفو ونكرم الناس ونعاملهم كويس ونتقن عاملنا ونسوق فى السارع بأدب ونسلم على جرانا ونكلم اهلنا ونبر ابونا وامنا ونخاف على بعض ونحب بعض اكيد هنام ورسنا مرتاح واكيد ساعتها ضميرنا وقلبنا هيوكو مرتاحين لما هنحب الناس هنحس بسعادة كفاية انك تحس انك عملت حاجة حلوة فى يومك وهى انك شايل خير للناس اللى حواليك كفاية ان قلبك يبقى طاهر برىء مش انانى مش كاره مش شايل حقد لحد كل ده هيريحنا فى الدنيا جدا لان الهرية والنتكة بتتعب القلب وترهقه وحبيبنا محمد صلى الله عليه وسلم ماكنش عايز يتعبنا ولا يعذب قلوبنا فاجاب لنا الاخلاق الطيبة الكريمة عشان نتزين بيها ونتحلى بيها ... لا تنسو الصلاة عليه دايما دايما لانه بيرود علينا فيها ودى حاجة بسيطة نسلم عليه بيها كل يوم وهو كمان يسلم علينا : اللهم صلى على محمد وعلى أل محمد كما صليت على ابراهيم وعلى أل ابراهيم وبارك على محمد وعلى أل محمد كما باركت على ابراهيم وعلى أل ابراهيم ..فى العالمين انك حميد مجيد ..
اللهم صلى وسلم وبارك على اشرف الخلق محمد وعلى آله وصحبه وسلم .. اللهم اهدينا وعينا على اننا نسلك دربه فى الحياة ..الله آمين

الاثنين، 15 فبراير، 2010

مركب ورق على البحر ....


من بعيد وكل يوم اشوف والمح البنت دى تيجى وتقف على اول الشط قرب المية فى ايدها ورقة ووردة وترميهم فى المية

وكتير اسأل نفسى ايه اللى ممكن يكون كتباه بنت عمرها خمس سنين فى ورقة ولمين؟ ممكن تكون بتهدى الوردة ؟ وليه عند المية ؟

لحد مافيوم قررت اقوم وراها واشوف هى بتعمل ايه وليه ؟ بس خفت لا مترضاش تتكلم معايا او تخاف منى

فكرت كتير ووصلت لحل ....

روحت عند الشط ومعايا ورقة ووردة واستانيتها لحد ماجت .. اول ماجت شوفت فى عينها نظرة ماقدرتش اقاومها ...

جت علية من غير ما اتحرك من مكانى وسألتنى بمنتهى الجدية :) طفلها عمرها خمس سنين وجدة كدة وقوية كدة ؟؟

- انت بتعمل ايه هنا ؟

- وانت بتسألى ليه ؟

- عشان ده مكانى انا وباجى هنا كل يوم ومش بيكون فى حد غيرى

- ليه يعنى الشط ده بتاعكل مثلا ؟؟

- اه بتاعى

- طب انا ممكن اطلب منك انك تسمحالى انهاردة بس اقف هنا شوية ؟

- ليه ؟

- اصلى معايا حاجة وعايز اوصلها لحد بعيد

- حاجة ايه ؟

- الورقة دى والوردة دى

تبص بصة كلها استغراب وكأنها بتقول ايه ده انت كمان جواك اسرار زيى !!

- هى الورقة دى فيها ايه ؟

- فيها كلمة

- كلمة واحدة بس !!!؟

- اه

- وانت ايه الورقة اللى فى ايدك دى ؟

دى فيها سرى

- مممم سرك انتى عندك اسرار ؟

- اه عندى اسرار ، وانت ايه الكلمة اللى فى سرك ؟

- انا ماعنجيش اسرار

- اومال جى هنا ليه ؟ وورقتك دى فيها ايه ؟

- دى فيها اعتذار.. يعنى كلمة انا اسف

- لمين ؟

لحبيبتى

- هى ليه زعلانة منك ؟

- انتى مش شايفة انك بتسألى كتير

- انت اضايقت ؟

- هههه لاء منك مش بضايق

- طب ممكن تروح بعيد عشان انا عاوزة الحق ابقول للمية سرى

- اتفضلى يافندم ... وروحت وقفت بعيد بخطوتين

- يا نهر يا سريع انا جبتلك اخبارى بتاعت امبارح كل اللى حصلى عشان ابعته معاك لابويا اللى مسافر عندك بعيد انا بعتله صورة جديدة رسمتهاله عشان كنت وعدته بيها المرة اللى فاتت عشان لما رسمت لامى صورة مدرستى فى المدرسة قالتلى وفين بابا لازم هو كمان عشان مايزعلش ،، قلتلها بعيد ،، قالتلى ابعتيهاله .. خدها معاك ليه مع وردتى بتاعت النهاردة وقله يلا يرجع عندى كتير حاجات احكيهاله ..

ياحبيبتى لابوها بتبعت سرها مع مية البحر ..!! ليه ياترى ؟ معقول الملاك دى يسبها ابوها كدة لوحدها معقول حد يبقى عنده الملاك دى ويبعد عنها ويجيلو قلب يعمل كدة ..!!! انهى أب و أم دول !!

- ورمت الوردة والصورة فى مية البحر

- ها يا حلوة قولتيلو سرك ؟

- اه .. وانت مش هتقوله ؟

- هقوله اكيد ..

- طب انا همشى ... مع السلامة

- رايحة فين ؟؟ انتى لوحدك معاكيش حد هنا ؟.

انا كبيرة والكل هنا بيعرفنى ومش بخاف وبيتى قريب من هنا

- :) ماشى يا كبيرة بس برضة مايصحش بنوتة قمورة زيك كدة تمشى لوحدها .. ممكن اوصلك ؟

- ممكن بس انت لسة مارمتش سرك فى المية

- سرى دلوقتى مش مهم

- بس كدة حبيبتك هتفضل زعلانة منك انك ماصلحتهاش

- طب هرميه بس بشرط

- ايه هو ؟

- تقوليلى كنت بتبعتى الورقة والوردة لمين

- بابعتهم لابويا

- ليه هو فين ؟

- مسافر بعيد فى البحر أمى قالتلى انه سافر من زمان كتير بعيد وانا كل يوم بيوحشنى وبيحصلى حاجات كتير وببقى عايزة اقوله عليها وبخاف انساها ولما عرفت انه فى البحر فكرت ابعتله اللى عايزة اقوله مع مية البحر وهى هتوديهاله واكيد هيقرا رسالتى لانه اكيد بيستناها واكيد عايز يعرف عنى كتير حاجات .. وانا مستنياه يرجع وانهاردة بعتله صورة رسمتهاله وانا معاه فيها عشان انا اكيد وحشاه كتير

- انتى عايشة مع مين ؟

- مع أمى هى بتحبنى كتير وانا كمان

- وأمك عارفة برسايلك دى ؟

- لا مش تعرف

- ليه ؟

- لانى لو قلتلها هتزعل منى كتير هتفكر انى عايزة ابويا ومحتجاله وبحبه اكتر وممكن تضايق منى لأنى بس اقولها كدة بتبدأ تبكى وانا مش بعرف اعملها حاجة وكتير بسمعها بتبكى لاما اقولها ابويا وحشنى وعايزة يرجع بقى ..

- انتى بنوتة حلوة كتير وقلبك كبير قوى قوى يابخت ابوكى وامك بيكى

- يالا بقى صالح حبيبتك قبل المية ماتمشى وتبعد

- طب يعنى فكرك هتوصلها الرسالة ؟

- اكيد انا بثق فى البحر انه بينقل الاسرار جوة فى موجه

- ههههه على ضمنتك

- ايوة .. يالا اكيد حبيبتك مستانية رسالتك زى ما أبويا مستنى رسالتى

- طب ممكن ترميها معايا ؟

- ماشى

وبأيدها الصغيرة الرقيقة الصافية رمت معايا وردة بيضة نقية بنقاء قلبها الصغير اللى مليان حب وبراءة اكبر من الدنيا كلها و ورقة فيها كلمة اعتذار لحبيبة .. للأسف مزيفة مالهاش وجود ..

السبت، 13 فبراير، 2010

كل حب وانت فىى قلبى ...


من يوم مابدأت القط لقطاتى وانا لازم فى يومه احتفل بيه وابعتله رسالة اعبرله فيها عن اللى جوايا ناحيته وانهاردة السنة دى كان لازم لازم ابعتله الرسالة دى .. اللى يعرفنى كويس ويعرف الظروف اللى بمر بيها فى حياتى اليومين دول هيقول اه اه اه انا عارف كويس هى هتقول ايه .. لكن احب اقوله ان لاء دى مش عليا ، عليا لما بتحب وتؤمن مابترجعش فى كلامها وانا عشان بأمن بيه وبأمن فيه مش هتغير من ناحيته مهما حصلى مهما اتعذبت واتجرحت وشفت حاجات مؤملة انا ماشفتهاش منه لكن شفتها من ناس استغله واستغله ايمانى بيه عشان يوصلو لغرض جواهم انا معرفهوش احب اقولهم انى عمرى ماهغير رأى فيه ولا ايمانى بيه ...

" كل حب وانت فى قلبى وكل سنة وانت جوايا عايش بتنبض نبض جنين بيكبر جوة قلب أمه "

الحب ... انهاردة يوم الكل بيفرح فيه وبيحتفل بيه لاء هو مش الكل هو الجزء لان فى جزء تانى بيشوفه فسق وفجور وبنحتفل بعيد واحد من المذنبيين فى حق البشرية .. كل واحد حر فى رأيه ومعتقداته .. وهو دة جزاء الحب الحقيقى لانه الحب فى عيون غير اصحابه جريمة تستاهل العقاب .. ودول احنا مش عايزيين منهم حاجة انهاردة احنا المجانين اصحاب الحب اللى هنحتفل بيه ونقدسه ونشيلو فى روسنا كمان ليكو فيه !!! p:

انهاردة عيد الجنين اللى شايلاه جوايا من سنين .. مرة كنا بنلعب لعبة وكل واحد كان بيختار ورقة مكتوب فيها كلمة والمفروض يتكلم على المعنى اللى طلعه فى ورقته وانا وبالصدفة جاتلى كلمة حب " معنى الحب " وكان لازم اتكلم عنه ساعتها اتلخبط وماكنتش عارفة اقول ايه لان صعب انك تتكلم عن دمك او عن نبضات قلبك وده هو الحب عندى الحب جوايا جنين بينبض بالحياة جوايا ومن زمان شايلاه لوحدى من غير أب اخترت بارادتى انى امشى فى دربه لوحدى اعيش فى عالم الحب لوحدى بس لما يبقى جوايا جنين اخترتله اسم الحب يبقى اكيد انا مش عايشة لوحدى ... كان نفسى يشاركنى اب للحب اللى جوايا فى يوم ميلاده بس مقدرلى من سنين انى اعيش معاه لوحدنا وده كفاية علية مافيش احلى من اننا نعيش فى الحب ونعيش بيه من اجمل المعانى اللى ربنا خلقها فى الكون لان ربنا اصلا وهو بيخلقنا خلقنا بحب شديد ربنا حلقنا لانه عايزنا وعايز يحبنا ونحبه ..

انا بحب وهفضل احب مهما كانت الايام مرة وقاسية مهما كان فى فراق ودموع مهما كان فى ضلمة وخوف واشتياق .. انا مؤمنة بيه بوجوده لان ببساطة بعيشه كل لحظة فى اليوم ..

بحب لانى بعرف اهتم ... اهتم بقطة صغيرة تحت شباكى فى ليل شتا بردانة ادفيها واكلها واقولها احلام سعيدة

بحب لانى بخلص .. اتعلمت تنى فى فى الدنيا حاجة اسمها اخلاص للناس اللى حواليك لشغلك حتى لزرعة الصبار المزروعة على الشباك

بحب لانى بسامح .. كلنا بنغلط وكلنا لازم نسامح مش مثالية ولا انا ملاك بجناحات بس لما بتأمن بحاجة لازم تسمع كلامها وتوصيتها والحب بيقول سامحو بعض وانا بسامح كل اللى اتعمل فيا واللى كان مش قليل بس لسة بعرف اسامح وهما عارفيين انى سامحتهم

بحب لانى بحب ضحكة الطفل ... ضحكة الطفل هى ضحكة الامل ولما تكون سبب فى انك تخلى طفل يضحك ده معناه انك حد صافى نقى لمست قلب الطفل النقى البرىء خليته يصدق فيك ويسمحلك تسمع صوت براءة قلبه فى الضحكة الحلوة

بحب لانى لسة بشوف الالوان ... الدنيا مش سودا مش بيضا مش بمبى زى مقال صلاح جاهين على انغام ملاك اسمها سعاد حسنى اكيد ماكنش بيكدب علينا لاننا لما نسمع سعاد حسنى وهى بتقول بمبى اكيد هنشوفها بمبى ةهنضطر نصدقهم .. مع ذلك هى فيها كل الالوان واللى خلانى اعرف ان فيها كل الالوان انى شفت الاسود الاسود هو اللى عرفنى ان فى الوان تانية كتييييييييير احمر اصفر ابيض ازرق كل الالوان ولكل لون حلاوتة وجمالة ومعناه

بحب لانى بصبر .. الصبر هو اكبر دليل على الحب لما تكون بتحب السمك هتصبر كتير على ماتصطاد سمكة .. لو بتحب الطفل هتصبرى تسع شهور على مايتولد .. لو بتحب الورد هتصبر لحد مايجى الربيع عشان تشم رحيته وتلمس جماله .. لوبتحب وماتلطش زى حالاتى كدة :) هتصبر لحد ماربنا يرزقك او يحنن قلب الحبيب .. لو بتحب هتصبر هتصبر على عيوب حبيبك هتصبر على اللحظات الرخمة عشان تيجى اللحظة الحلوة بعدها هتصبر على البعد عشان يجى اللقى هتصبر على الوحدة عشان عارف انه موجود وحسة فى الدنيا على رأى الافلام العربى القديمة :" ياخويا حسك فى الدنيا " :) .. هتصبر على الليل عشان تشوفه فى النهار

بحب لانى بستحمل وبضحى .. لو بتضحى بجد عشان الناس اللى بتحبها او عشان الحاجات اللى بتحبها يبقى انت وصلت لاحلى صلاة فى قداس معبد الحب .. لما تضحى بأى حاجة صغيرة فى سبيل الحاجة الغالية قوى هتلاقى اى حاجة رخيصة ومالهاش تمن قصاد لمعة فرحة فى عيون الناس اللى بتحبها او حتى تضحى عشان تمنع عنهم لحظة وجع .. تيجى على نفسك وتتنازل عشان خاطر ماتجرحهمش لانهم اغلى عندك من نور عينيك بتحبه لانك مش انانى عشانه يهون كل حاجة اكتر حاجة حلوة فى الحب انك تقلع عن نفسك لبس الانانية لانه لو موجود يبقى انت مابتحبش مهما بقى كنت بتقول او تعيد مهما كنت بتسهر اليالى وتسمع حليم وتعد النجوم بس انانى !! يبقى طظ فى كل ده انانى يبقى انت كدة مابتحبش وعمرك ماهتحب فى حياتك ولا هتعيش علاقة حب سليمة

بحب لانى كريمة .. ماببخلش على اللى بحبهم باى اى حاجة لاوقت ولامجهود ولا مشاعر ولا حتى حتة شيكولاتة .. لاء كدة بكدب انا فى الشيكولاتة ماعرفش امى معلش ياماما :) عشان بحب فيروز اضيع فلوسى كلها على سيديهاتها ومابخلش عليها بوقتى مهما كان الوقت .. عشان بحب اصحابى هما عارفيين بقى مش هقول حاجة .. عشان بحب ابويا ............ مش لازم تعرفو على فكرة :)

بحب لانى مؤمنة بيه ... انا مؤمنة ان الحب موجود فى الدنيا الحب هو الدنيا نفسها هو الحياة عرفت ناس وحبيت كتير حاجات وناس واتوجعت من حاجات ومن ناس بس مش هلعن الحب ابدا لانه حبيبى الحب حبيبى انا بحبه هو نفسه لان الحب هو الحاجة الوحيدة اللى حبتها وحبتنى يعنى حب متبادل .. زى مانا مؤمنة بيه وفيه هو كمان مأمن بيه ومصدقنى عشان كدة هو الحاجة الوحيدة اللى بتفضل معايا وبنكبر مع بعض كل يوم مرافنى كل لحظة كل ثاية وانا سعيدة لان الحب جوايا وماسبنيش لحظة واحدة فى عمرى الناس سابتنى فرقتنى بعدت عنى الحاجات اللى بحبها برضة مابدلتنيش نفس الحب لكن الحب نفسه لاء فضل معايا وهيفضل معايا قولو انشالله ...

لما نأمن بيه هو كمان هيأمن بينا وهيفضل جوانا ولما نسمع صوته ونشيله فى قلبنا عمره ماهيفارقنا ابدا لما نسبه حر مش مخنوق ونفتحله القفص هيطير حوالينا وهياخدنا معاه على جناحه لابعد سما ... الحب حر مايحبش الحبسة مايحبش الخنقة مابيعيش جواهم بيموت او بيتحول لحاجات كتير غيره ممكن تألمنا كتير وتوجعنا وهيحبسنا معاه ... حبه وسيبو الحب يطير عشان احنا كمان نطير

اعطه جناحات سيبو يتكلم ولما تسمعو صوتو ماتكتمهوش افتحو فمكو وعبره عنه اروه بالحظة اللحلوة اروه بالاهتمام والمراعيا والصدق والثقة ماتخفوش منه الحب هو الحياة ..

الحب حرية امان هدوء جنون راحة وردة بيضا نقية صافية اقوى ضعف واضعف قوة ممكن تحميك من طوفان وغدر الدنيا .. خاف عليه واحميه بس ماتخفش بزيادة لانه الخوف الزيادة ممكن يخنقه ويخوفه منك وحالة الخوف مش حلوة فى الحب ..

عيد الحب مش بدعة .. عيد الحب لحظة حلوة تفكرنا بالغايب .. تفكرنا بالناس اللى بنحبهم .. تفكرنا بالحاجات الحلوة اللى بنحبها فى بعض بدل ماحنا طول الوقت بندور على اللى بيزعلنا من بعض بس .. لحظة حلوة هتخليك تسمع فيها عبد الحليم من كل فتحة مسام فى حواسك السبعتاشر ... لحظة يوم ساعة تفتكر حبيبك بهدية بودرة بكلمة بلمسة حنينة نفتكر فيها وبيها اول لمسة اول كلمة بحبك اول نظرة عين نسسى معاها الوقت والضغوط لحظة نقوف فيها ساعة اللهث وجرى الوحوش اللى بجريه ننسى فيها القسوة ننسى فيها الوجع ننسى فيها الزعل نوقف الزمن تقف ساعة البروصة عن الحركة وبس نفتكر المشاعر الحب الاصدقاء الكلاب والحصنة اللى بنحبها الحبيب اللى مستانينا من زمان اهلنا وقرايبنا اللى مش كتير بنشوفهم نسمع مزيكا حلوة مسمعنهاش من كتير نشوف فيلم رومانسى حلو خروجة مع اصحاب بنجبهم من جوانا بجد عشا رومانسى مع حبيبنا اللى مشتاقينله ساعة بين اتنين مجتمعين تحت سقف واحد يقربو فيها من بعض بجد من غير دوشة عيال ولا مصاريف مدارس .. يقولها يااااااا بقلينا سنين مع بعض ويارب نعيش طول حياتنا نرقص رقصة حلوة تفكرنا بأول رقصة رقصناها يوم الفرح اللى كان من عشرين سنة ...

الحب مالوش سن .. مالوش زمن .. مالوش مكان .. الحب هو اللازمان واللامكان واللاسبب

كل سنة وانتو طيبين :)

الأربعاء، 10 فبراير، 2010

مراية ذكريات ..


مراية الذكريات مليانة بالوشوش

اشى بيضحك اشى بيتزين واشى مستعجل مابيبصش حتى فى وشه

وانا كل ماطول على وشى فى مرايتى مالقاش غير ذكريات ذكريات ذكريات

ايام فاتت وعدت

ضحكات اضحكت ودموع نزلت

ليه يامريا مابتورنيش غير الذكريات ؟

هو ماليش انهاردة ؟طب ماعنديش بكرة ؟

ردتلى مرايتى : انتى بنت الماضى اخترتى تحبيه وتعيشى فيه يوم ماجيلتى بضحكة مالية الدنيا بعيون بتلمع زى النجمة حبستك وحبست معاكى اللحظة الحلوة خفت عليها تضيع منك وماتعرفيش تجيبها تانى

ومين قالك ان فى حبس الذكريات اى محافظة عليها

انتى خلتينى كل ماطل على نفسى فيكى اخاف واجرى

كل ماطل على وشى اشوف وش مش بتاعى

ماشوفش غير العيون اللى كانت بتلمع زى النجمة .. ودى كدبة

لان انهاردة مافيهومش نجوم يامرايتى انهاردة ضلمة وبكرة مجهول

ماسبتليش غير قهر وذكريات باشوفها غصب عنى وانا مش عايزة اشوفها

بسببك خلتيها محوطانى عمر

ردتلى مرايتى : كانت نيتى خير خفت عليكى ياكبدى عليكى عمرى ماشفت وشك فرحان سامحينى ماصدقت اشوفه فى لحظة فى العمر قلت اسرقها واخبيها واحافظ عليها طول الوقت

شكرا كتير قدرت المجهود .. بس قوليلى رأيك فى اللى شايفاه قصادك دلوقتى . عجبك !!!!؟

مرت ايام وايام وادينى رجعتلك بالبكى والحزن وعيون وحيدة بتلمع برضة بس من الدموع اللى مابتنقطع عنها ابدا كل يوم وكل ليلة

ياريتك يامراية ماحفظتى اى لحظات ولا بقيتى على اى ذكريات

حبستينى فى امبارح ومشى الحال .. خبيتى عن بكرة ومشى الحال .. وانهاردة اهو ادينى عايشه بس مش شايفاه وبرضه ماشى الحال

ردتلى تقوللى : وايه اللى مصبرك علية ؟ دشينى كسرنى حتت استاهل مادامت وجعتك

ارود عليها ، اللى يدوق طعم الذكريات صعب يدشها بعد ايه ماخلاص اتحفرت جوايا زى نقش فرعونى عتيق معمول بضمير حتى لو دشيتك هتفضل متخبية فى روحى ..

وبعدين قوليللى ازاى ادشك وانت جواكى حفرالى اللحظة الحلوة الوحيدة اللى عشتها فى حياتى .. انتى فاكرانى زيهم ولا ايه !!؟

احنا برضك عشرة يامريتى ويالله عفى الله عما سلف .. بس وحياتك ماتعمليها تانى !! انا مش حمل انى اقدر اعيش فى ذكريات تانى كفايا اللى انا فيه وحياة عنيكى يا شيخة :)

الجمعة، 5 فبراير، 2010

افتح شبابيك الحلم .......



من عز دفا البرد اقوم من تحت لحاف الشتا مشدودة لصوت جوايا بيقولى افتحيلى شباكك

اقوم اجرى ازيح الستاير افتح الشيش تلمس وشى ريح الشتا تنعش قلبى وروحى

تطير خصلات شعرى المنكوش من طول نومة ماكنش لها آخر

مع خصلة تطير تطير معاها افكارى لحرية الفضا تلمس النجوم وتلعب معاها تحت ضوء القمر الشفاف

دى خصلة بفكرة عن بكرة المجهول الهوية المرعب اللى مخابى جواة الاسرار

ودى خصلة طايرة بفكرة مشتاقة للمسة أيد من حبيب مفارق ومش ساءل

ودى خصلة تانية شاردت فى القلب الوحيد الدامى اللى شال ياما بلاوى

ودى خصلة طايرة وبتطير معاها الذكريات المحبوسة بقالها سنين طارت بيها لنجمة عالية بعيد

ودى بقى وخداها معاها للقمر يوصلها للغايب بوسة من جوة حضن القلب

ودى خصلة من غير فكرة بتطير حرة مش بصة وراها وملهاش دعوة بحد

ودى تنزل تلمس طرف عينى تبلها دموع ..فرحة ..حزن ... مش مفهوم دة ايه !!

ودى تلمس الخد البردان من ساقعة الشتا تحضنه وتدفيه

تنزل حبات المطر متلونة بلون فضى لون النجوم تتلحم مع دمعاتى على خدى وتلمس خصلة شعرى وتاخدها ريح الشتا وتطير

ينادى الشتا بعلوالصوت ويقول انا اهو بريح شديدة تحضنى كلى وتطير معاها شعرى وافكارى كلهم مع بعض فى اتجاه واحد

ريح الشتا بنفس عميق من جوة قلبى يمكن تهدى نار الذكريات ونار الفراق والوحشة من سقوية ليلة شتا

لكن لما يملا الهوا الصافى فى عز الليل قلبك مش هيطفى اى نار جواها ده هيشعل نار الحنين اللى تفضل مدفياك فى عز البرد

حنين للحب للصحاب لصوت فيروز تشوف كل حاجة حواليك نقية وصافية صفا سما ليلة شتا بعد ماتنزل حبات المطر الفضية

وتنزل معاها حتة من القمر يزفها نجوم ياما سهرت احكى معاهم ويحكولى عن العشق والهوى .. عن ارض خصبة من طينها اتوجدنا ..عن بنت سمرا اتكحلت عيونها بلون طمى النيل ودفى قلبها بشمس الجنوب واتطهر بمية مطرها الصافية

حكاوى كتير جابتها معاها ريح الشتا فى عز الليل .. احاول اسرق منها سر يطمن البال لكن تضحك علية وتسرق هى منى افكارى وتطيرها مع خصلات شعرى وريح الشتا فى عز الليل ..

السبت، 30 يناير، 2010

حتة شيكولاتة ....


- دورتى علية ولقتينى من بين الكتير اخترتينى من ورقة السلوفان طلعتينى واديكى اهو ظبطى المود

- سمعة من بعيد صوت السكر وهو بيدوب من حبات البن المحروق اللى دايب مع جوزة الطيب والمستكة

- واهى النار الهادية اللى طالعة من سبرتاية فضية فين لاقيتها ياريقة ياصحبة المزاج العالى وكل اللى موجود نحاسى

- وادى المعلقة بتحكى لحبات البن وهى بتدوب حكاوى عن الحب والغدر والفراق والصداقة والناس المتشردة فى احلى اماكن بلادى

- وادى الفنجان شرف من فوق الرف بنى بلون حبات البن المحروق ولا لون قلبك والله مانا عارفة مين فيكو اللى اتحرق !!

- اهو اهو بتتصب حبات البن بعد مادابت دوب هى وشوية السكر اللى يادوب يحلو البق.... ياعينى على الوش !!

- واديكى اهو روحتى نورتى نور خفيف كالعادة وادى السي دى بلاير بيشتغل وادى صوت فيروز جاى من جوة مش من جوة البلاير لكن من جوة قلبك ... " شوبخاف " وكيفك انت " وسلملى عليه " وانتى اهو يخرب بيت عيونك ياعليا شو حلوييييين " :)

- شايفاكى بتمدى ايدك ومطلعانى وحبة حبة مقربانى من شافايفك بس يادى الذل انا عرفاكى لازم تدوقى قهوتك الاول ..ممممممم يامزاجو

- يااااااااااااااه اخيرا هقرب اخيرا هوصل اخيرا هدوب فيكى وتدوبى فية مممممممممممممم

- مافيش حد غيرك بحب ادوب فيه بحس معاكى انى مش حاجة عادية كدة

- لما بقرب من شفايفك وتحضنينى بكل جوارك بحس ان مافيش احلى من كدة دوبان وان الواحد يحس انه مش هنا انه بيروح من عالم لعالم تانى خاااااااااااااااااااااالص ..

- بتحسسينى باهميتى فى الحياة انى لية دور فى الحياة انى صاحبة جدعة مش بس مجرد حتة شيكولاتة ..

- خلقتى بينى وبين فنجان قهوتك احلى قصة حب قربتينا من بعض وكونتى السبب فى ولادة حب من نوع تانى وطعم تانى جوة حضنك

- أنتى صحبتى الوحيدة وماليش غيرك وعلاقتنا ببعض مالهاش زى ..

- ادينى بدوب وبدوب بين احضان شفايفك محوطانى انا وفنجان قهوتك علىى وتر حس الحب فيروز وتحت جناح شفايفك الحنينة بحض حبيبى وانت محفظة علينا ومخبينا عن عيون الحقد والخوف ...

- انا مش بس حتة شيكولاتة انا وياكى كنز غالى مايقدروش غير شفايفك وقلبك :)

الثلاثاء، 26 يناير، 2010

حقيقتى ....


- ظالمٌ أنا ، قاسى القلب .. أعرف

- أمتدت يدى الحقيرة قاصدة شرايين فؤادك لتحطمها .. أعرف

- مزقت قلبك فاصبح قطع من البلور المنثور فوق مياه نهر النيل تحت ضوء القمر الفضى .. أعرف

- تركت يدك لتظلى وحيدة وسط غابة سوداء فى ليلة شتوية باردة لا دفء فيها ولا قمر ينير .. أعرف

- تركت القلب الصغير ينزف حتى جفت دماءه ودموعه توقفت وكأنما توقف النهر عن السير .. أعرف

-اطفأت نور عينيكى الذى كان ينير حياتنا وكأنى اطفأت شمس النهار .. أعرف

- كنت تناديننى بالصوت الذى طالما اغرانى للبقاء جانبك ولم استجيب .. أعرف

- حبست هواء الشتاء العاصف بداخلك حتى تنفجرين من الضغوط .. أعرف

- رحلت وتركتك وحيدة دون دفء دون حنان دون روح تدب فى القلب .. أعرف

- ذهبت بعيدا دون عذراً دون رسالة دون دموع وكأننى معاود فى آخر الليل , ولم اعد .. أعرف

- جعلتك تنتظرين حضن دافىء وذراع مفتوحة واسعة وسع الحقول الخضراء فى زمان وللى من بعيد ولم احضر ..أعرف

- لماذا حدثت كل هذه الاحداث .. لاأعرف

- أمشاتقٌ انا اليكى حتى الموت؟.. نعم

- أحبك حتى آخر قطرات القلب المجروح اللمزق ؟ .. نعم

- أنتمى الى نوادى المعذبين التائهين ؟ ..نعم

- اتعذب اكثر منكِ اتألم ؟ .. نعم

-صادقٌ انا معكِ ؟ .. نعم

- لم تصدقينى ؟؟

الأحد، 24 يناير، 2010

فى يوم ميلادك .....


يمكن كتير هيقول عنك الكتير فى ذكرى يوليو ذكرى رحيلك عنا .. لكن انا حبيت اقول عنك فى يوم ميلادك قبل كل حاجة فى الدنيا لازم اقول " كل سنة وانت طيب ياطيب فى المكان الطيب بأذن الله " ... وحشة كل حاجة حوالينا بس افلامك وروحك وافكارك اللى ماحدش يقدر يمنعها توصل للناس ملية علينا حياتنا ..

فى يوم ميلادك حابة اقولك يا جو يااستاذ انا اتعلمت منك الكتير ..

فى يوم ميلادك جايبلاك هدية عبارة عن انشانة صغيرة اتربيت واتشكل وجدانها وافكارها بيك وبكلامك يمكن ماكنتش من تلامذيتك المباشرين مانيش الطيب ولا الصيفى ولا طبعا خالد يوسف لكن انا حد بسيط من اللى انت كنت بتهتم بيهم وبتحس بيهم اكتر من اللى حواليك وتعرفهم انا من جمهورك اللى فهمكم وحبك وحسك وقدرك واحترمك ودول اللى انت طول الوقت كنت بتقول عشانهم وشايل همهم

وهو ده مربط فرسى معاك ..انت علمتنى انى ماهتمش بنفسى على حساب اللى حواليا انت علمتنى ان الاختيار صعب بس المصير لازم يكون فى اليد .. انت اللى عرفتنى ان الضال مسيره يرجع لحضن مدنته .. انت اللى علمتنى ان الاخر موجود شأت ام أبيت فاحسنلى احبه واحترمه وافهمه بدل مالعنه اواكرهه اوخاف منه ..منك السماحة والصدق والاحساس من اسمى المشاعر واجمل اساليب التعامل بين البشر مافيش مجال للانانية فى الحياة وان الحياة فى حب الناس اللى حوالينا تبقى احلى كتير من العيشة وسط الناس واحنا بنكره بعض،، نضحى عشان الحاجة اللى بنؤمن بيها ،، انت اللى علمتنى الحلم ازاى احلم ازاى اعيش حلمى ، ناس كتير كانت بتنقد فيك وتقول ايه الراجل اللى فرحان بحياته وعمال يحكيهلنا !! وانا بقولك انا من اكتر الناس اللى بتعشق الافلام اللى انت موجود فيها اصلا انت موجود فى كل افلامك بس التلات افلام بتوعك عندى من اهم مراجع تعليم الحياة والدنيا والحب ....

اينعم خربتلى دماغى وكل اللى انت علمتهوللى وشكلت دماغى عليه لاقيتو مش موجود فى الدنيا بس برضة انا مقتنعة باللى انتو علمتهوللى واللى دماغى اتشكلت عليه انت علمتنى اؤمن وانا دلوقتى مؤمنة بنفسى وبافكارى ومش هفقد الامل انى الاقى حد يشاركنى افكارى وان مالاقتش ادينى بدور على طريقة اقول بيها وساعات ناس بتفكر معايا وساعات ماحدش بيبص حتى على اللى بقوللو بس برضة انا هفضل اقول زى مانت فضلت اكتر من نص عمرك بتقول ...بتقول احسن نتعلم نحب بعض بدل مانكره بعض

بتقول ان البلدى ليها علينا حقوق وان ارضها ماحدش هيحافظ عليها غيرنا

بتقول ان العصفور مهما بعد مسيره يرجع لحضن عشه من تانى

بتقول منرضاش يهاجر القمر سماه وانا معاك بقول

بقول انى فهمت على طريقتك

حبيت على طريقتك

حسيت على طريقتك

حبيت السيما على طريقتك

فهمتك فاكيد هقدر افهم اجعص جعيص

خفت على بهية زى مانت خفت عليها واكتر

بس انا لسة مش عارفة اعمل ايه عشان احافظ عليها !! مسيرى هعرف

وحشتنا افلامك ياجو كان نفسى تكون وتقول وتفضل تقول بس اللى انت قولتو هنفضل نسمعه لسنين وسنين وهنفضل نحارب لحد مانوصل لحريتنا انا الحرية مبأدى الحرية فى الافكار فى الحب فى الاختيار الايمان علاقتى باللى خلاقنى علاقتى بغيرى الصدق الثقة الحب

الحب الحرية هما انت هما كيانك هما سرك هما سبب حبى ليك زوايا كاميرتك اللى ياماجننتنى هى الزوايا اللى بشوف بيها الدنيا على قد ماهى تبدو معقدة على قد ماهى فى البساطة مافيش ابسط من كدة ....

" الممثل كلام على ورق بيحولونبض قلب " اسكندرية كما وكمان !!

الثلاثاء، 19 يناير، 2010

ليه بنخاف م الموت !!!


مافيش شك ان كل الكائنات اللى مخلوقة فى الكون بتخاف م الموت

بس بما انى شايفة ان أجبن مخلوق من بين المخلوقات الكونية هو الانسان نفسه ، فهو اكتر مخلوق بيخاف م الموت وكل انسان عايز يعيش اطول فترة ممكنة فى الحياة ويمكن نفسه مايمتش ابدا حتى اللى بينتحرو بيقبو خايفيين برضه وبيبقى نفسهم حد ينقذهم بس فى ناس محظوظة قوى ومابتلاقيش حد ينقذها وللأسف بتيجى الطوبة فى المعطوبة ... والخوف م الموت مالوش دعوة بمدى قوة او ضعف الايمان او مدى قد ايه انت ملتزم ومتدين وماشى على الصراط ولا لاء ... لكن الخوف م الموت هو عكس حب الحياة فالو بتحب الحياة يبقى اكيد هتخاف م الموت ماهو اللى بيحب حاجة يخاف تضيع منه .. ولكل واحد اسبابه فى حب الحياة ، فى اللى بيخاف على حبايبه وفى اللى بيخاف على فلوسه وفى اللى بيخاف القطة بتاعته ، اى حاجة والحاجات اللى بنحبها فى الدنيا كتير ....

انا كمان بحب الدنيا عشان فيها حاجات حلوة كتير وكنت بخاف م الموت برضه عشان كل الاسباب الطبيعية والمنطقية اللى ممكن كل الناس تخاف منها ، زى انى مش مستعدة للموت يعنى اخطأى وذنوبى ومقصرة فى عبداتى ومقصرة فى خدمة الناس وفايدة مجتمعى وحاجات كدة اللى هى ممكن تتطمننا شوية او هتقول لنفسك اه انا عندى حاجات حلوة اعرف اقابل بيها ربنا وانا مش حابب مش خايف !!

حابب مش خايف ، هى دى النقطة انا بغلط طبعا طول الوقت اوكيد عندى حساب تقيل حلو كدة عند ربنا ...

لما بنغلط هنا فى بعض او مع بعض فى الدنيا ساعات بنلاقى اننا ممكن نظلم بعض او نقسى على بعض قوى بزيادة لمجرد ان كل واحد فينا عايز يعذب التانى بس عشان يحسسه باللى حسه ند للند ، هو كدة غباوة فى الادغال ...

لكن تعالو كدة نبص فى العالم التانى ... انا بخاف من غلطاتى الدنيوية اكتر من اللى فى حق ربنا ،، عشان ربنا لما اغلط فى حقه لو لحقت نفسى وطلبت منه يسامحنى هيسامحنى ، لكن احنا لاء مش بنسامح ..

لول مالحقتش نفسى واتماديت فى غلطتى هتعاقب منه عليها ويبقى انا اللى اخترت عقابه لانى فضلت مصرة عليها يبقى حتى فى العذاب عدل وانا عارفة انى استهال ...

الحياة التانية اللى فى الموت اللى كلنا عارفين انن ممكن يكون فيها عذاب ونار وحساب على الاخطاء هى بالنسبة لى اهون برضة من الدنيا اللى فيها فراولة وشيكولاتة وقهوة اللى كلها ظلم وكدب وحقد وقلوب تعسفية فى الاحكام

الحكيم لما يحكم عليك ،، غير لما يجى ابله مش فاهم حاجة فى اى حاجة ويحكم عليك ، ربنا من حقه يحكم عليك لكن احنا لاء مش من حقنا ، القاضى بس هو الوحيد اللى ربنا أداله الصفة دى من عنده ...

ربنا عادل " هو العدل ذاته " عشان كدة لما يحسبنى مش هيظلمنى ، لما اغلط فى بينا حوار وحساب وهات وخد والحاجات الحوة عنده بتهش الوحش بعيد ، لكن احنا ياعينى علينا الحلو ده بيتدفن تحت التراب ويداس عليه بالرجلين

يبقى ازاى اخاف م الموت وهو الوسيلة الوحيدة لتحقيق العدل فى حياتى حتى بكل اخطاءى وذنوبى اللى انا عارفها كويس ومدركاها واللى عارفة انها ممكن ترمينى فى الجحيم واعيش فى عذاب مالوش نهاية بس هو عذاب من الخالقنى سبحانه جبار وقهار وقادر على كل شىء بس كمان رحيم رحمان عادل غفار ورؤف هيشوفلى الحلو ويرحمنى بيه من العذاب وعلى قد حلوى على قد مايشيل من عندى ذنوب ويرحمنى شوية من العذاب ، بس مش مهم لانى اللى هيعذبنى رحيم واللى هيرمينى فى جهنم اعمالى واللى هيدخلنى الجنة رحمة الرحيم

يبقى عندى حق اخاف م الحياة القاسية الظالمة المظلمة ، وماخفش م الموت العادل المنور حتى لو بنار جهنم ،" او نور الجنة " الحنين لانه جى من الرحيم ، ده كفاية انى هقابل وجه كريم هقابل اللى خلقنى وخلق كل الحاجات اللى حبتها فى الدنيا ومين عارف يمكن اعمل معاه الحوار اللى نفسى اعمله معاه من زمان قوى !!!؟

انا مش خايفة م الموت ،، لاء كدابة انا خايفة م الموت ،، بس كل مابشوف قد ايه الحياة فيها ظلم كبير وضلمة وحقد ونفوس توجع وتحرق القلب اكتر ماهتحرقه نار جهنم ماحسش بالخوف م الموت بالعكس ده انا بخاف م الحياة اكتر .....

على القل فى عذاب جهنم اللسان لو هو غلطتك هو اللى هيتحرق ،، شعرك اللى اتعايقتى بيه وولعتى قلوب الناس هو اللى هتتعلقى منه ايدك اللى سرقتك هى اللى هتولع قلبك الحقود هيتقلى زى كنتاكى فرايد تشيكن ، فن هنا لو غلطة اللسان بيتعاقب عليها الجسم كله جواه وبراه وتلطيش وحرامى فى جامع مع ان عقاب الحرامى الشرعى هو قطع الايد مش علقة فى حارة .. وعقاب الزانى الشرعى جلد على الضهر مش الدبح يعنى ،، ياسبحان الله شوف حتى العقاب الشرعى فى الدنيا للى ربنا هو اللى منزله من جباروتنا وغروررنا وانانيتنا فى الدنيا مابنفذوش وبنعمل اللى على مزاجنا ،، يعنى ربنا عذابه فى الدنيا او فى الاخرة كله عدل لكن احنا ... مابنعملش حاجة غير الظلم بنحب قوى نظلم بعض بدل مانشوف كدة ممكن نعمل ايه عشان نسامح بعض ، انا عارفة ان الدنيا مش مكان عدل على طول الوقت بس برضه هى مش ظلم طول الوقت ...

عشان كدة الموت عندى هو تطبيق العدل والحق واللى ليك واللى عليك غلطتك تدفع تمنها كاملا ولو عندك حاجة حلوة ليك خصم ياعم وهنيالو اللى غلط ويتوب تتحول غلطاتطو حسانات شايفين العدل ,, بعد كل ده نخاف م الموت !!!!!!؟ بلا دنيا فانية ! اصلا الحياة قصيرة قوى قوى ومش مستهالة اى حاجة مش مستاهلة نظلم بعض ونقسى على بعض ونزعل من بعض على ايه ،، عموما انا هوفر كلامى عن اننا ازاى نلازم نحب وبعض ومانظلمش بلا بلا بلا بلا لانه مش هجيب نتيجة اللى فينا فينا كلنا ظالمين اصلا بس ماحدش بيشوف انه ظالم ابد ياسبحان الله لما كلنا مظلومين ياعينى وغلابة اومال مين الوحش الظالم " الملك فاروق !!!صح ؟؟ " والله العظيم ده احنا !!! يلا سلامات