بكتبلك من قلب مجروح مشروخ مصدوم من فوقانه من حلم على حقيقة كسرت جواه كل حاجة حلوة ولخبطن جواه المعانى ، بكتبلك من قلب كله أسف ,,رسالة أعتذار....
أقر انا حبيبة مخدوعة ..
أنى أسفة جدا , وانت عارف ان مش من طبعى الاعتذار المباشر، وانى عشان اوصل للحظة اسف معناه ان الغلطة لاتغتفر، وانا فعلا غلط غلطة لاتغتفر ، علمتنى الدنيا وكسرت عنادى بأن لما الواحد يغلط مش عيب انه يعترف بغلطه مادام نفسه يصلح وانا لسبب ده قررت انى اعتذر بكلمة مباشرة وواضحة " أنا أسفة" ....
أسفة :على انى اقتحمت عليك حياتك وانت كهف وبير مالوش أرار واللى يفكر يقرب منك هيتبلع ومش هيوصل لحاجة لان البير اخره فاضى
أسفة: انى فكرت فى يوم انى ممكن اكون حد مناسب ليك انك تكمل معاه حياتك ، وطلع ده اى كلام وان ده مش فى مخطط حياتك اصلا
أسفة: على انى ماقدرتش احافظ عليك فى الوقت اللى كان فى حد تانى فى حياتك رماك بمنتهى الباسطة زى مابترمى ورقة الشراب الفيليه فى الباسكيت" اللى هى الزبالة "
أسفة : ان حبى ليك وتضحياتى ليك ماكنتش كافية انها تنسيك حب واحدة اسهل حاجة عندها تغير موجه قلبها زى مابتغير محطة الراديو مابين نجوم اف ام ونايل اف ام
أسفة : انى حلمت بيك فارس على حصان ، وانت اخرك واحدة تحلم بيك جايبلها شماعة عليها فستان سهرتها بعد التنضيف والمكوة عشان معزومة مع واحد تانى على عشوة عيد الحب
أسفة : انى رسمت لبكرة بتاعنا وانت مش موجود اصلك اتأخرت فى شغلك واضطريت احضر الحلم لبكرة لوحدى
أسفة : على سنين عمرى اللى راحت منى عندك ، فاكرنى اجى اخودها منك عشان ماتزحملكش دولاب الجزم اللى فى دماغك
أسفة : على اغانى الحب والغرام والشعر والكلمات ، واضح ان البوسطجى بعتهم غلط او انا غلطت وكتبت عنوان غلط
أسفة : على عزومة الغدا اللى كانت فى افخر مكان اللى كانت على شرفى ، بشرفى انت مسطول واضح ان كان قصدك واحدة تانية وانا اللى فهمت غلط
أسفة : انى لما انت قلت "بحبك" مافهمتش ان ده كان مجرد تست صوت او بروفة قبل العرض النهائى والافتتاح قصادها كنت بتجرب انك لسة بتعرف تقولها ،، برافو شاطر مابتنساش الكلام ، لكن ورينى شاطرتك فى انك بتعرف تفتكر المشاعر ولا لاء
أسفة : انى دمعت على زعلك قبل منك ، من باب الاحطيات ما انت اصل همومك كانت كتير " كنت فاكرة كدة"
أسفة : انى سمعت شكوتك وافتكرت انى اقرب القريبين وطلعت مجرد ودن بتملى فيها اللى انت عايزة
حبيتك حسيتك قربت وبعدت همك كان همى فرحك "اللى ماكنتش بعرفه " كان بيبقى فرحى " اكيد لما كنت بعرفه" فهمتك اكتر من نفسك " زى ماكنت دايما بتقول " حلمتكلك وحلمت بيك بس دايما حاجة غريبة كانت فى الاحلام ماكنتش بتقبى موجود ، خليتنى اشك انك واقع ملموس شاكيت فى أداميتك وفى وجودك كبشر مش مجرد خيال انا صنعته عشان اعيش فى الاحلام،، انا بجد أسفة على الازعاج ، ضيعتلك وقتك الرخيص وزعجتك بهدوئى وسط دوشة دماغك ...
انت ماقبلتش حبى ,,,بس اتمنى انك تقبل أعتذارى وأسفى .........
ليست هناك تعليقات:
إرسال تعليق