الثلاثاء، 23 يناير 2018

الحقايق ال سبعة

ومن علامات النضج هى الوصول لمرحة تقبل الحقيقة ومجارتها بشىء خالى من الدهشة او علامات التعجب والاستغراب ، حالة من التفهم والمعايشة للحقايق من حوالينا ودى من اصعب الحالات اللى ممكن ان توصلها الروح . الحالة دى ايا كان معاد وصولها فهى بتدل على انتقال الروح من مرحلة الشباب المندفع الغضبان لمرحلة نضج ساكن حاجة كدة عاملة زى ماتعدى جمب صور قلعة او حصن مدارى جواه اسرار وهو ثابت شامخ عالى حامى الل بيحصل جواه كأنك بتعبر بوابة من بوابات المحروسة القديمة عبر منها كل الاشكال والطواءف عبر سنين وعقود طويلة ..
الحقايق بالنسبالى بتظهرلى واحدة ورا التانية انا مواصلتش لمرحلة التفهم بس على الاقل ظهرت قصادى علمتهالى الدنيا غصب عننى .
-حقيقة رقم1 : مش حاجة جديدة هى الموت والحياة..
المجهول المعلوم اكتر حقيقة تجمع جواها تناقضات مرعبة مراية عاكسة لارواحنا صحيح هو الوجه الاخر للعملة الحياة والموت ، بس الموت على قد تناقضاته اللى هى فى الاصل تناقضتنا احنا او معايشتنا لواقعنا بنحكم منها عليه او بنشوفه ازاى ، مجهول ؟ مرحلة انتقالية بمعنى انه مش نهاية وانه بداية حياة تانية ؟ مخيف؟ عادل؟ راحة ؟ عذاب؟سارق؟  ببساطة هو حقيقى وهيحصل بس بانهى صورة هنا الحقيقة وهى ان كل حد فينا شايفه بصورة مختلفة مرايته اللى عكسة روحه تفكيره ايمانه ويقينه او مابينهما ..
الحياة الوجه الاخر الفكرة اننا احنا العملة روحنا هى اللى مقسومة بين موت وحياة ودة اوا طرف الخيط اللى بيوصلنا لمرحلة تقبل الحقيقة اننا احنا الآمر الناهى لحياتنا روحك عى المسؤلة عن شكل الحياة وفهم الموت المراية اللى عكسة صورة مزدوجة جامعة بين قبول ورفض محتوايتها تناقضتنا وحجمها او تجميع خلايا روحنا وحدة جمب واحدة لحد ماتوصل لدرع قادر انه يصمد قدام الحقيقة او يحتاويها جواه بقوة وبقاء ..

-حقيقة رقم 2 : الناس بتتغير..
صاحبك بقى عدوك والقريب بقى بعيد والحبيب حبه خلص الغنى فلس والموهوب اتطفى واللى تحت بقى فوق والعكس انا بتغير على مراحل العمر حتى لوتغيير طفيف القهوة سادة بعد ماكنت مظبوط بس لسة بشربها ، زى انك تقول ان عمرك ماتحب فلان وفجأة تحبه مابطلتش تحب ، لحد اى تغير كبير فى الملامح فى ناس شبه نفسها جدا على مدار مراحل العمر وفيه ناس الملامح بتتغير تماما .. الحقيقة ان كل البشر بتتغير بس مش كل التغيير حاجة بشعة لاتطاق ولا كل التغير جميل زيه زى اى وكل حاجة المهم انك ماتتخضش لما تلاقى اللى كان صديق عمرك مابقاش ولا الغريب اللى بقى اقربلك منك فجأة تحكم عليه انه عايز منى ايه !! مش محتاج اخدها على اعصابى قوى عشان بجد دى حقيقة من حقايق الكوكب التغيير..
حقيقة رقم 3: ان صوت فيروز هو الآمان بالنسبالى وهنا كلامنا عن الامان مختلف الحقيقة هى ان الآمان هو غاية ووسيلة ومن وجهة نظرى هو مرادف الحياة مش هتحس انك عايش منغير امان عدم الامان هو احساس مدمر بيعطلنا طول الوقت عن اننا نوصل لهدف او حتى ممكن يعطلنا عن وصولنا لنقطة الانطلاق حتى ، كفيل لتحويلنا صورة قاسية غضبانة من نفسنا طول الوقت ، مالناش يد قوى فى الاحساس بس ممكن مع قبول حقيقة اللى بيعمله فينا عدم الآمان اننا نحاول ندور على حاجة واحدة على الاقل تطمننا ولو للحظات بسيطة حضن شخص ، صوت معين ، فكرة لما بنفكر فيها بتطمننا ، المهم مانسبش نفسنا فريسة للاحساس دة.
-حقيقة رقم 4 : الونس ؛ شعور من اورع مايكون العيشة منغير ونس مهلكة للروح وصفة سعادة وطمأنينة الحياة ماتكملش منغير ونيس والونس دة انواع صاحب ، بيت ،تمشية فى شارع ، راجل عجوز على طول بيقعد على نفس القهوة معاهم تتساير معاه ودة لفظ مصرى بحت مسايرة ونس ناخد ونددى مش خناقات ونقاشات ومأساة كدة حاجة لطيفة تهدى قسوة وسخونة العيشة اللى عيشنها
-حقيقة رقم 5 : البساطة هى الجمال..
كل مالحاجة كانت بسيطة كل ماكانت اجمل كل مالشعور كان بسيط كل ماكان دافى التعقيد فى كل حاجة مش حاجة لطيفة ولا مطلوبة طول الوقت ساعات بنخاف ونقول لنفسنا معقول المشكلة الكبيرة دى حلها بسيط كدة !! اه ممكن طبعا . انت ممكن تنقذ حياة حد بكلمة بسيطة بشعور بسيط الافورة مش حلوة .
-حقيقة رقم 6 : كل ابن آدم خطاء : بدراجات مختلفة محدش احسن من حد كلنا فينا العاطل والفالح وانك تعمل تصرف بشع مش معناه انك شخص بشع انت مجرد اتصرفت بشكل غير لاء مرة او 100 احنا طول الوقت بنغلط ماتعيرش ماتحكمش انا مش مؤهليين لا نفسيا ولا عقليا لدرجة الحكم على بعض بالتهم دى كلها احنا يدوب لو عندنا حكم نقييم احوالنا يبقى يادوب تمام كدة عشان كدة الفرصة التانية هى تالت اعظم اختراع بعد القهوة والشكولاته ، ودى بتديها لنفسك قبل مابتديها لغيرك ..
-حقيقة رقم 7 : كل حاجة لو اتعملت بحب بتنجح ومش قصدى بيها ( التعريض) اللى هوا ماشية بالحب لاء :) قصدى بيها الحب اللى بجد قوة الحب لسة ماحدش اكتشف مدى اهميتها وممكن تعمل ايه وتغير الحياة ازاى تماما طاقة الحب لو مش موجودة جوانا مش هنعرف نكمل ابدا مش هنعرف نتعايش على الكوكب دة الحب شعور بسيط قوى بيتدخل جوانا يمتلكنا ينور روحنا بنور الشغف والامل ، الحب مبدأ فى حد ذاته صعب التعايش منغيره صعب التخلى عنه او وصفه بابشع الاوصاف لانه انقى شعور ممكن يقتحم خلايا روحك وقبلك وعقلك بقلب عاقل وعقل محب هتمتلك مفتاح لحياة اوضح انقى اصفى وابسط حتى الحزن فيها هيكون مختلف ..
اختار الحياة بالتفصيلة اللى انت عايزها وخد وقتك لاكتشاف حقايق وطرق الوصول ليها انت حر مهما كانت الحبال اللى مكتفاك مسيرك تفكها او تحاول انك تخرج منها حربك بتعتك حقك تخوضها بموجب فكرك ويقينك ..

هناك تعليقان (2):

candy يقول...

الله ليع الكلام !! موافقاه كله
الاسترسال دا في حد ذاته ونس ^_^ <3

cema يقول...

شكرا جدا الكلام دة بيشجعنى انى اكمل :)