الجمعة، 1 يناير، 2010

مع كل عام جديد اكتشاف جديد.....


حبيت أفضفض مع نفسى كدة وافكر فى السنة اللى فاتت اللى لسة خالصة من ساعات قليلة جدا السنة اللى تميت فيها 23 من العمر مش كبيرة ومش صغيرة 2009 سنة كانت عجيبة جدا بالنسبةليا حصلى فيها كتير وكتير ماكونتش مطوقعة اى حاجة من اولها لاخرها من اللى حصلت فيها كانت سنة اكتشفت فيها عن نفسى كتير صحيح كبرت فيها سنة بس اكتشفت عن نفسى انى مش كبيرة ومش صغيرة ...

مش كبيرة لسة على اللعب او الحب او المرح والانطلاق الطفولى ولا حتى كبيرة على مخاوف الاطفال اللى ممكن تكون مش منطقية للكبار ...مش كبيرة كفاية لدرجة انى اعرف اتحمل مسؤلية اخطائى او حتى ادركها من بين التصرفات والكلمات مش كبيرة كفاية انى اتساب لوحدى فى وسط الصحرا ليلة شتا من غير قمر ولانجوم اصارع وحوش الليل من الافكار القاتلة والآكلة للحوم عقول البشر ولجدار القلوب ..

مش كبيرة كفاية لدرجة انى اعرف اتحمل مسؤلية انا مش قادرة اتحملها ، مش كبيرة كفاية لدرجة انى اعرف اغير احلامى ومعتقداتى اللى اعدت ابنيها سنين وسنين لوحدى وفجأة ادخل فيها حد تانى مش كبيرة كفاية انى اقدر اطمنى واتغلب على مخاوفى الطفولية من الحياة بسرعة البرق مش كبيرة كفاية انى اقدر اتحمل الظلم من الحبايب ظننن بس كمان مش كبيرة على انى ادلع شوية زى البنوتات ولا على انى ادلل شوية على محبوبى واتقل تقل البنوتة الصغيرة عشان تفضل تسمع الكلام الحلو المليان دلع بطعم الشيكولاتة ..

بس كمان مش صغيرة لدرجة انى اقصد اجرح حبايبى مش صغيرة لدرجة انى ماينفعش اتصدق او ماينفع يتوثق فيا ،، مش صغيرة لدرجة انى ماقدرش افهم اللى قصادى واحس بيه مش صغيرة عشان اغلط وماعتذرش على غلطى مش صغيرة لدرججة انى اغلط واطنش واعمل نفسى مش واخدة باللى مش صغيرة لدرجة انى اعند على الفاضى والمليان مش صغيرة لدرجة ان مايتخدش رأى فى مستقبلى مش صغيرة لدرجة ان الدنيا تفضل تودينى وتجبنى على مزاجها وكفها من غير ماتسألنى عن رأى وتعاملنى على انى ضيفة شرف فى حياتى وماليش دور ،، مش صغيرة لدرجة انى ماخودش باللى من دمعة العين لما تستخبى عنى ، مش صغيرة لدرجة انى مش هاعرف احس بالآه اللى طالعة منك وانت بعيد .....

مفاجأت 2009 كانت كتير بزيادة اتخابط من نواحى كتير بدايتها كنت لسة طالبة فى كلية آداب علم اجتماع السنة النهائية بعد طول قوعاد فى الجامعة لوحدى من غير كل الاصحاب اللى ياما عيشنا ايام وذكريات مسخرة ومضحكة وايام شقاوة وحشانى كتير ... بأها بأمل انى اخلص السنة دى وعلى مايجى شهر تمانية منها اكون بامتحن معهد السينما زى مابحلم واتمنى عشان ابدأ بقى حياتى اللى اتأجلت خمس سنين واكتشف انى لسة عندى مواد همتحنها متأخر يعنى مافيش معهد السنة دى بخ كدة ... يجى فى نوصها اكتشف حقيقتى فى حياة شخص واعرف ان كل واحد فينا كان شايف حاجة ملهاش دعوة بالتانية فى بعض واحاول اكمل ،،، يجى اعرف ان حبيب العمر الحبيب الاولى اترزق بمولوده الاول وشيله واشم رحته فيه واحاول اقول انا تمام انا زى الفل ،، واكمل وانا وحيدة طالبة جامعية بائسة اصحابى اللى لية فى الدنيا مشغوليين عنى بالشغل وبنى الحياة ونقرب يومين اجازة فى الاسبوع واكمل الباقى مع نفسى وكتبى ومزيكتى واهى ماشية،، وفجأة يظهرلى من حيث لا اعلم هو كان صديق قديم وخادتنا الايام بعيد بس قررت تقربنا فجأة عشان احس ساعتها ان الدنيا يمكن بدأت تضحك على استحياء ضحكة خبيثة انا عارفاها يابنت الايه ناوية على ايه وتيجى مرفت صحبتى وتقوللى خدى بالك م التوقيت ياعليا لية دلوقتى بالذات ،، صحيح ليه كان ساعتها بالذات تيجى وتظهرلى فى حياتى وسط كدة الاقى اخويا بيسبنى بعد عشرة السنين الطويلة فى حياتى وبيبنى حياته الخاصة بيه وتفضى علية الاوضة واسهر كل ليلة لوحدى بدل ماكن هو الوحيد اللى بيسهر معايا لما ل ستة الصبح ،، والاقى نفسى ابتدى احلم حلم غريب عمرى ماكنت افتكر انى هحلمه اصلا فجأة دخل علية الحلم وشاركنى فيه مش هقول فارس احلام لكن هقول شريك احلام كنت اتعودت طول السنين احلم لوحدى بس دى اول مرة يجى شريك حلم يطلب منى فجأة شراكة حياة الله على الحياة وانت مش لوحدك الله على الحياة وهى فيها شريك بيحبك فاهمك عايزك محتاويك فضلت كتير مش قادرة اصدق انى ممكن حد يقرب منى قوى كدة يلمسنى ويحسنى قوى كدة لقيت جوايا افكار بتتغير احلام بتتبدل فجأة بقى جوايا صراعات وخناقات بين الاحلام وبعضها فى حلم عايزه معاه وحلم بيقولو انت ايه اللى جابك هنا والاقينى فجأة بتخانق معاهم اخرسو منك له انا عايزاه وماحدش فيكو يدخل انت .. ماتشدوش نحيتك سيبه حر جوايا ،، وانت اية المشكلة انك تقبله معاك فيك انتو الاتنين سيبه جوايا حر يمشى براحته بين ضلوعى بين مشاعرى بين دمى منك له أخرسو... واعيش اجمل قصة هوا ونسيم روح عليل ،،، يجى انتمنا الاول احمد يتجوز اول واحد فى شلتنا بيتجوز معقول لحقنا نكبر ونتجوز ونفتح بيوت .... يمكن !! بعدها جه عيد الميلاد والتجميعة الحلوة انا وأية واوزى وهبة ورامى وحلمى " ده مش اسم ده وصف " وصف للى ملى حياتى ونورها بنور الاحلام كبرت سنة وانت معايا اول سنة ليك معايا قد ايه مبسوطة بلمتنا وقد ايه وحشانى ،،، وبعدين تظهر النتيجة يااااااااااااااااي اتخرجت ياولاد خلاص مابقتش طالبة جامعية بعد الان انتهى اتخرجت وانا 23 سنة مش مهم المهم انه خلاص مش فيه جامعة يااااى ، وقت الشغل والزن على الشغل مقابلات فاشلة شغلانة مش راضى عنها الاهل مع انها ممتعة كانت بالنسبة لى وحدة فراغ خوف ضغوط مرض امى شيلة مسؤلية فجأة تقيلة مزعجة وسطها تيجى تطلب منى اهم طلب فى حياة اى بنت بتعشق وبتحلم بس طلبك جه بدرى قوى على ان قلبى الصغير يقدر يتحمله اكتشف انك فى عذاب من كتير واكتش انى مش قادرة اسعدك وتكتشف انه الانفصال اسهل الحلول وتختار وتقرر وتبعد فعلا وترجعنى تانى لوحدتى وحزنى واشتياقى ليك وتخلص 2009 مش زى ماكنت اتمنى ... انا ماكنتش اتوقع انى اكتشف واسمع الكلام اللى سمعته من آية فى اول السنة ماكنتش اتوقع ان يحى يخلف ماكنتش اتوقع ان احمد يتجوز ولا انتيمنا يتجوز ولا انى انجح واتخرج ولا انى هقبل حب حقيقى يخاودنى لبعيد ولا كنت اتوقع انه يسبنى مافيش حاجة اتوقعتها ولا حاجة حاسيتها ...... من اتقل سنين العمر اللى مرت علية مع انى بحب الارقام الفردية وانا هنا 23 فى 2009 بس مافيش اى حاجة حصلت تخلينى احب اى حاجة ... غير الناس اللى بتحب انها تقف جنبى فى لحظات على قد مقدرتها

الحلو اللى ممكن اكون حبيته فى السنة دى انى اصلا اكتشفت انه لسة ينفع القلب ينبض حتى لو مجروح ينفع يكون للبكى صوت اتعلمت كتير واكتشفت كتير عن نفسى لقطات بقو 142 يعنى لسة عندى اللى اقولو مهما كان اللى جوايا فى اخرها دخل علية ناس حاسستنى انى لسة لية لزمة كان فى فيلم واحد صفر واحكى ياشهرزاد ودكان شحاتة وطير انت والف مبروك ... فى عزازيل وكتاب مالوش اسم عقول لسة بتقول وقلوب لسة بتحس ... اتعلمت عن نفسى كتير كتير كتير

عرفت انى بحبك

عرفت ان اصحابى اهم حاجة فى حياتى وهيفضلو كدة ومش هينفع اتغير

عرفت ان افكارى اللى بتحركنى ومبأى ووجهات نظرى فى الحياة وادتنى فى داهية بس مع كل داهية باتمسك بيهم اكتر

عرفت انى بحب نافسى ومش باكهها زى ماكنت فاكرة خصوصا بعد ماتعرفت على عيوبى وحبيتها واحتويتها يمكن اغيرها ؟؟!! مش عارفة بس المهم انى على الاقل مع وجودها اكتشفت انى مش بكره نافسى زى ماكنت متخيلة

عرفت انى مشكلة الثقة فى النفس هعانى لسة منها كتير لسة حلها مش دلوقتى

عرفت انى فجأة هموت على فيروز وآدم ولي لى وياسين صحيو جوايا فجأة وانت السبب

عرفت انى عندى حلم وهاحققو غصب عن عين الكل واللى مش عاجبه يروح .. مش عند ،، لكن حب وايمان باحلامى

وفى اخر السنة اكتشفت انه اسواء قرار اتاخد يخصنى مش انا اللى خادته وان قرار السنة الغبى....... هو بعدك عنى

2009 بالف مليون سلامة و2010 انا معرفكيش سامحينى مش قابلة دخولك علية بس دخلتى كويس بقى او وحش اللى هتجبيه معاكى ادينا هنشوف ايه اللى هيحص وهنشوف جايبالنا معاكى ايه ...

اتعلمت من اخطائى ؟؟!! أه اتعلمت وعرفت وفهمت كتير عنى وعن الدنيا وعن نفسك ...

يارب سنة جديدة بحاجات جديدة مش هقول حلوة ومش هقول سعيدة بس باتمنى انى افضل اتعلم واغلط واعتذر وتسامح ...

ليست هناك تعليقات: