الجمعة، 15 يناير، 2010

اللى لية واللى علية ....




على رأى المثل اللى بيقول" اللى مارباهوش ابوه وامه تربيه الايام " ,, وانا ابوية وامى ربونى وكل حاجة بس الايام ربتنى اكتر الايام كانت بالنسبة عاملة زى المدرسة الداخلية فيها من كل نوع وشكل ضيقة وخانقة بس تتعلم منها كتير ، غربة ووحدة ودول اكبر معلم فى الدنيا .. وانا الايام علمتنى ان حاجة حلوة ان الواحد يبقى عارف اللى ليه واللى عليه عشان يعرف يعيش مرتاح على قد مايقر يبقى عامل واجباته وعارف حقوقه عشان مايتكلش على قفاه عشان عايشين فى مجتمع قانونه" لايحمى المغفليين ،، اوما بيحمى مين !! معرفش " ماعلينا مش موضعنا ،، موضعنا بقى قاللك ايه ان الواحد لازم يقول اللى ليه واللى عليه وانا قررت ان اقول اللى لية واللى علية ... بس خلينى ابدأ باللى علية الاول مش عشان حاجة غير انى بجد نفسى تصدقنى فى كلامى دة نفسى تصدقنى مرة واحدة قبل ماموت هههههه



- اللى علية :



- انا عارفة انا كنت بعمل ايه عارفة الاوقات اللى كنت بكون فيها مجنونة وساكتة وعارفة نفسى لما بكون مضايقة من حاجة بابقى عاملة ازاى ، عارفة غموضى وسكوتى اللى بيخنق ، عارفة انى مش بادى فرصة قوى لحد يساعدنى وعارفة انك كنت دايما شايف انى مش باديك الفرصة دى وانك لما كنت بتحاول كنت بتحس ان كلامك بالنسبةلى مالوش فايدة وانى بسمع من هنا واطلع من هناك ..



- عارفة انى طلبت منك المستحيل بعينه عارف ايه هو ؟ انك تفهمنى وتحس بية عن بعد ههههه ، انا عارفة ان طلب ان حد يفهمنى ده طلب صعب وذاكان اقرب الناس اللى عايشين معايا من يوم ماتوالدت ولا اللى عايشين معايا بقالهم كتير مش فاهمنى او مش قادريين يستوعبونى زى مانا على طبعيتى كدة زى ما انا يبقى انت اللى بقالك يادوب كام شهر هتفهم او هتقبل طب منين مش يبقى حرام علية انى اطلب منك ده!!؟؟ عارفة كمان انى حلمت وان مش من حقى افرض احلامى على حد ودة اللى انا ماعملتوش انا فرضت حلمى عليك حلم بتاع انى الاقى الانسان الخارق اللى ممكن يعرف انا عايزة ايه من غير ماقولو ، او انا بفكر فى ايه وانا ساكتة ، او اللى يقبل عليا كدة زى ماهى كدة ويصبر عليها ويحتويها زى ماهى كدة ،، عارفة ان ده كان حلم بتاعى انا ومش من حقى افرضه على حد لانه زى ماقلتلك هو حلم مستحيل وانا ماينفعش اطلب المستحيل ... عارفة انك حلمك معايا كان بسيط قوى اننا نتجوز وتبنى بيت وحياة مستقرة مع ولادك ومراتك وتعيش خمسين سنة قدام فى حضن العيلة دى خصوصا انك مش صغير وان ده وقت انك تنفذ حلمك ده وان ماعندكش حاجة تخليك تستنى اكتر من كدة وتستنى ليه ، حياتك وشغلك وناجح وواخد ماجستير وعندك بيت جميل فى حتة حلوة وبتتقدم فى شغلك وبتكبر وعندك كمان حياة ترفيهية لطيفة وسارفت كذا بلد واتفسحت وشلت مسؤلية اهلك وبتاخد بالك منهم كويس يعنى مجرب نفسك فى تحمل مسؤلية البيت والعيلة وكمان الرقص علمك انك تكون انت المسؤل عن البنت اللى قصادك عندك هواياتك ومحددها يعنى حياتك زى الفل ومثالية وكملت اكتر لما قبلت البنت اللى ممكن تشاركك كل دة وتكملك صورة حياتك اللطيفة دى جدا واللى بصراحة يحسدك عليها كتير مين انهاردة فى زمننا ده يقدر يعمل كل دة مشاء الله عليك بجد مش تريقة ،، وانا بقى جيت خربتلك الدنيا كلها ، فى الاول انت كنت شايف واحدة قوية مقاتلة زى مانت قلت عليها عندها حاجات كتير وبتفهم فى حاجات كتير وفى بينكو حاجات مشتركة كتير ودى حاجة فرحتك اكتر يمكن القرب اللى حسيتو معاها فى الاول حاسسك انك بتحبها بجد ويادوب كدة الدنيا بدأت تتظبط معاك وحلمك هيكمل بالحياة الهادية المستقرة اللى اى انسان فى الحياة بيتمناها لال انا طبعا ، للاسف صدمتك فى حلمك وعارفة كمان انك لاقيت قصادك واحدة ضعيفة غبية ماتسمعش لحد عنيدة وصوتها من دماغها جبانة وخايفة ومعقدة هتعقدلك حلمك وتقف فى طريقك وطريق تحقيقه واحدة مالهاش حياة عايزة تعيشها عايشة حياة ناس تانية غيرها ضعيفة قصاد الناس اللى حواليها واحدة ساعة تقربك ناحيتها وتحس معاها انك ماسك النجوم وساعة تانية تبعدك للجحيم وانت فى الاخر بشر وليك طاقة احتمال وبتحب تحوط كل حاجة فى مكانها المظبوط بتمشى بالمنطق طول الوقت وكلام العقل بيقول انك معاك حق فى كل حاجة بتقولها وبتفكر فيها ،، عشان كدة انا مقدرة جدا الوضع اللى انت فيه وحاسة بيك وعارفة يعنى ايه يكون عنك حلم واقرب حد ليك هو اللى يبوظو عليك .. بتوجع قوى وتجرح قوى .. صدقنى والله انا عارفة انت حاسس بايه انت دلوقتى مش فاهم حاجة ومش عارف تصدق وتثق زى الاول ولا انت شايف انى مابقتش محل ثقة لانك وثقت فية فى الاول وكنت فاكر حاجة وشفت حاجة تانية انت مباقتش فاهم هو انت يارتى فشلت فى اختيارك للمرة التانية ياترى العيب فيك انت انك مابتعرفش تختار صح " هون على نفسك ياحبيبى احلى مافى الحب انه مش اختيار " نرجع لكلامنا كل دة جوة دماغك انت افاكرك مشتتة ومشاعرك متلخبطة ومش فاهم حاجة .. انا اسفة على اللى عملته فيك وانت ماتستهلش منى اى حاجة من اللى حاصلة دى انت ماتستهلش منى غير انى كنت اساعدك فى تكميل حلمك وتكميل الصورة اللى انت راسمتها لحياتك ... نفسى تقبل اعتذارى



- اما بقى اللى لية : معلش ما انا قلت ان الواحد لازم يقول اللى ليه واللى عليه وانا بدأت باللى علية .. جه وقت اللى لية



- انا مش انسان كداب لانى ببساطة ماعنديش حاجة ولا على راسى بطحة عشان اضطر اكدب فاكيد لما كنت بقلولك اى حاجة ماكنتش بكدب فيها .. لما قاعدت معاك ساعتين فى التليفون نتكلم عن البيت وشكله وهنعمل فيه ايه وقاعدنا نتريق على ان شقتك كبيرة وهنعمل فيها استديورقص وممكن نقفل القوضة اللى فاضية فيها خشب ونرقص فيها ، اكيد ماكنتش بكدب ولابخدك على قد عقلك .. يمكن اكون بخاف بش مش لدرجة انى اكدب ........



- يمكن اكون كنت فاكرة انى محل ثقة الناس اللى حوالية لحد ماتضحلى ان ماحدش بيثق فيا خالص بس خلينى اقولك انا حد متصالح مع نفسه وعارف عيوبه كويس ومميزاته وانا بقلك انى ايوة لسة انا حد تقدر تثق فيه لما يقولك انه هيعمل كذا او كذا انا بتعلم من اخطاىء ومابعديهاش بسهولة ولما اقولك ان اللى عملته غلط وهصلحه يبقى لازم تثق فى كلامى وتعرف انى فعلا هصحه ....


- لما اقولك بحبك مش هقولها غصب عنى مش هقولها عشان ارضيك انا الحب عندى اكبر من اكبر حاجة فى الدنيا


- عارفة انك شايف انى ماتغيرتش وماحصلش جديد فى السبع شهور ،،، لاء اتغيرت وحصل جديد ومن شهر 5 او 6 لحد من تلاتين يوم فاتو بالظبط حصل كتييييييييييييير ، انا عمرى ماتمنيت الولاد دول انا عمرى مانمت حلمت بفستان فرح وشكل بيت يعيش فى ناس وانت عارف البيت اللى كنت بحلم بيه ...


- قبل مانتقابل اخر مرة كانت حلوة " يوم الساقية " اخر يوم حلو عشنا سوا انا كنت حد تانى وانا بقولك لو فترة قليلة جدا جدا جدا كمان كانت كل حاجة هتتغير وكل اللى انت عايزة وبتحلم بيه كان هيحصل ...


- خلينى اقولك بقى انى حاسة بالظبط كأن كان فى قالب كيك تحفة بالفراولة والشيكولاتة وانت جيبه فى ايدك وجى علية وانا فكراه هتأكلهولى بس رحوت ملبسو فى وشى بدون اى مقدمات ،، عارف ايه احساسى ساعتها !!؟


- عارف دلوقتى انا عاملة ازاى !!!!؟ انا اتفاجأت بواحد كان عايش معايا مدة ومخبى عنى حاجات فى قلبو كتير انا معرفهاش وفجأة طلعتهم من جواك بس بقرار قاسى عليك وعلية ، كنت بتفكر وتدور الاسئلة جواك فى دماغك ، طب مالاحسن كنت تقوللى ! ماشى مابتعرفش تقول كلام اللى جواك بسهولة ،، يبقى ليه زعلان منى قوى انى انا كمان مابتكلمش ،، طب على الاقل انا مابحكيش اللى مضايقنى فى المطلق ، لكن لو حصلت حاجة بننا كنت باجى وواقول واتكلم ونحاول نصلح ،، انا عمرى مابعرف اعاتب ولا اتكلم فى اللى بيضايقنى من الناس عارف ليه كنت بتكلم معاك !!؟ عشان انت اللى انا عايزة اعيش معاه عمرى كلو وعشان كدة لازم دايما ابقى مفاضية قلبى من ناحيته وماشلش منه ابدا وانت عارفنى انى باصفى نفسى ذاتيا من ناحية الناس لكن انت لاء عشان احنا هنعيش سوا بنبنى حياة لازم نعرف كل حاجة بتضايقنا بتفرحنا كل حاجة ...


- انت شحنت نفسك ناحيتى قوى وبزيادة لدرجة انك مش قادر تشلنى فى قلبك من كتر التقل والشحن والله ان وانت مانستهال كل دة انا وانت احسن من كدة كتير ... افتكر ،، افتكر الكويس


- اول ماعرفنا بعض انا قلتلك انى خارجة من قصة بهدلتنى ، وانى خايفة وماكنش فى باللى ابدا انى ادخل دلوقتى فى موضوع جديد وانى عايزة شغل جامد وقلتهالك كدة واضحة وصريحة ... وانت صبرت ،،، بعدها ابتاديت انت تشوف انى ساعات بقربك وساعات ببعدك ده ليه بقى ده عشان انا ابتاديت اعوزك بجد ابتاديت احس اننا ينفع نكون مع بعض ابتاديت احس انى معجبة بيك وبحبك وده هيقربنى من الحاجة اللى بتخوفنى وهى المسؤلية والارتباط والجو دة بس السعادة اللى بحسها معاك واللى حستها فى حبك كانت بطمنى عشان كدة كان بيجى اوقات اقربك قوى وده اللى حاسسك انى بضربك فى الخلاط وانك مش فاهم حاجة منى ... وهنا انت ابتاديت تفكر مع نفسك دخلت جوة نفسك ودماغك ابتدت تودى وتجيب مع نفسك ماتكلمتش معايا ،، ولما رجعنا من السخنة انا كان تفكيرى ابتدى ياخود شكل تانى ابتديت اتخلى عن انانيتى وابتديت افكر فيك وفى مستقلبنا سوا البيت والحياة المستقرة بتاعتك وظهرت نتيجتى ونجحت واتخرجت وابتدت معاناتى اللى انت حافظها صم واللى كنت بنهار بدموعى قصادك وانا بحكيلك عنها وجت بقى كل الظروف المهببة اللى عشتها الشهريين اللى فاتو والحيطة اللى لبست فيها فى بتنا واللى انت برضو عارفها ،، مع كل الدوامة اللى عشت فيها دى جت انت طاقتك ضعفت وقللت وبرضة فضلت كاتمها جواك لحد لما خرجتها خرجت بسرعة الرصاصة رشقت فى قلب الحدوتة وادينا دلوقتى بنتعالج فى العناية المركزة يا تن تن يا تن تن ... اللى جاى كان هيبقى غير .. وهنا جت حتة انك فقدت ثقتك فية ومش مصدقنى قفلت كل حاجة جبت ضرافها م الاخر بس الضرف نزلت على دماغى ....


انا ماخترتش احبك وماخترتش اسيبك انت اللى جيت وانت اللى مشيت وانا فى الاخر مش فاهمة حاجة فجأة لاقيت حب عظيم اخيرا لاقيت الحب اللى يقدرنى ويحمينى واعرف بقى اترمى فى حضن دافى وانسى الدنيا على رأى " شانيا توين " اخيرا لاقيت اللى كنت بجلم بيه اخيرا لاقيت الثقة اللى كنت بدور عليها طول عمرى ، ثقة انى اقدر ابكى اضعف اصرخ اعمل اى حاجة فى حضنك وانا مطمنة ومش قلقانة ، عارف حبة صبر صغيرين منك وثقة كانت كل حاجة هتتحل ، عارف حبة كلام منك وفضفضة لما تقلق كل حاجة تتحل


انا قلت اللى لية واللى علية ... بس خلينى اقولك واكدلك ان اللى انت شفته وحبيته موجود حقيقى انا مابكدبش عليك يبقى معناه انى حد محل ثقة .. اللى احنا عايزينو واحد بس الفرق انه ده ترتيبه فى حياتنا مختلف وزى ماقلتلك انا بدور على حلول عشان نوصل للى احنا عايزيتنو سوا والحياة تضحية والحب تضحية والاقوى يضحى انا مستعدة لكل حاجة واى حاجة هتخلينى معاك على طول ، انا لما كنت بقول خايفة وقلقانة ومش جاهزة والجو دة كنت بقوله وانا فاكرة انك معايا مش هتسبنى فاهنحاول سوا وهنحلها سوا بس فجأة لاقيت التورتة لابسة فى وشى اينعم كلت منها برضه لما جت على وشى بس ده مش معناه انى لما لاقيت سايبنى اقول لاء لا ء لاء وانبى خليك انا خلاص خلاص هبقى كويسة اكيد انا مابععملش كدة خالص دلوقتى انا بتكلم بصراحة شدية لان دة اللى انا اصلا كنت مختطاله من قبل مانبعد اصلا وده اللى انا كنت فاكرة انه هنعمله مع بعض عادى زى ماتنفقنا انا ماجاش فى بالى دقيقة انا ممكن مانكنش مع بعض خلاص فاكن كل تفكيرى فى اى حاجة وانت معايا فاكيد مش لاما صحيت من النوم مالقتكش رجعت فى كلامى لاء دى مش انا .. انا حبيتك عليا لما تحب خلاص انسى انها تتخلى عن حبها ده ابدا واسأل عنى بقى فى دى بالذات حبيت يعنى ثقة امانة صدق وانا كنت كدة معاك ياريت تسمع وتفهم وتحس وتفتكرلى الكويس بدل ماتعود تشحن نفسك افتكر يوم ماقولتلك نفسى اخواتك يبقو اخواتى لانى ماعنديش اخوات بنات .. افتكر الفريست دانس " مارك انتونى ولا براين أدمز " افتكرلى الكويس ياكريم لأنى فكرالك الكويس طول الوقت فاكرة حبك طول الوقت ... لما حد يغلط ويحس بغلطته ممكن نعاقبه عشان مايكررهاش تانى وممكن نسامحه لاننا عارفينه كويس وعارفين انه مايقصدش يجرح حد ومدام اعتذر واعترف بغلطته ووعد انه هيصلحها يبقى كويس اننا نديلو فرصة .. بس كل دة لو بنثق فيه وبنجبه وبنقدره اكيد انت ماكنتش اعمى لما حبيتنى يعنى شفت حاجة كويسة افتكرها يمكن ترجعك لية تانى ... انا قلتهالك وهاقولها تانى لا انا ولا انت نستاهل كدة .. انت طيب وحنين وكريم وشخصيتك حلوة وجميلة وهادى يبقى اكيد تستاهل تعيش احسن بكتير وتعيش فى هدوء وراحة يناسبوك وكمان مع حد يحبك ويقدرك ويحتويك ولو تكرمت وتعطفت علية انا كمان استاهل انى اتحب ياكريم مش كدة !! انا مش وحشة كدة مش كدة !!!! قول قول انا شايفاها فى عينيك ..


لما نغلط فى حد بنحبه لازم نعتذر منه .. ولو بنحبه بجد ياريت نحاول مانزعلهوش اصلا ولا نغلط فيه ، لكن احنا بشر مش ملايكة بنغلط غصب عننا .. كلنا بنغلط وكلنا لازم نغفر بالذات لاما يكون حد يستاهل اننا نسامحه ..


ينفع اقول وحشتنى قوى .. ينفع اقول بحبك ؟




كنت بقولك عندى ثقة فيك ... اتعودت اصدقك ، وانت !!! لابتثق فية ولا بتصدقنى !! واو ممكن احس بايه !!؟


هناك تعليق واحد:

candy يقول...

..................ى