الجمعة، 1 يناير، 2010

اه ده ......... ده فى حاجة اسمها صوت


من يوم ماربنا كرمنى وجيت الدنيا سنة 1986وخلى بالكو من التاريخ ده كويس وانا كل اوراقى الرسمية مختومة بختم الحقبة التاريخية الحكومية الحالية وشوش بسيطة جدا اللى اتغيرت والباقى نقوش على حجر فرعونى مأصل ، طبعا لو فكر حد انه يلون اى لون على جدار فرعونى قديم الناس هتقول عليه مجنون ومايستحأش يعيش فى وسط الناس الطبيعية وياهيترمى فى مستشفى المجانين بتهمة الجنان ياما يخوش السجن بتهمة تشويه الذوق العام .....

طب ماهة برضك غلطان مين كان قاله يعمل كدة فى اجداده الفرعين ويفكر يلعب فى نقشوهم وافكارهم واللعب فى قرارتهم المنقوشة على حجارة الجدران فى المعابد ...

صحيح الفراعنة جدودنا واحنا منهم بس ماحدش قال ان محاولة الشاب الغلبان الصعيدى الطيب ده انه يضيف بصمته على عمل اجداده جريمة جنون او تشويه الشاب المصرى اللى عاش عمره كله شايف عظمة اجداده الفراعين ولاعناتهم اللى نازلة على دماغه ودماغ اهله اشمعنى هما بس اللى ليهم حق التأريخ والخلود انا كمان نفسى اسيب بصمتى على نقوش حجر الجدران فى المعابد عشان اكيد هيكونلى احفاد فى يوم م الايام هما كمان يجو هنا ويشوفو اللى عملته .. حق مشروع وحلم ممنوع

ممنوع .مين اللى قال ممنوع !!؟

اى مصرى جدع عنده حلم من حقه انه يضيف للتاريخ حتة منه ليه ولبلده ، يعنى ماهما كانو ناس زيهم زيينا مايفرقوش عنا فى حاجة غير انهم كان عندهم كلهم هدف واحد مافيش غيره ومالهمش غيره يصبعه تاريخ يصنعو حضارة يحكمو العالم برة وجوة السيادة والقوة والوجود احنا اللى ناقصنا عنهم ايه انا كمان مصرى جدع وعندى حلم .. حلم انى انقش نقشة بأيدى الصغيرة فى حتة صغيرة على جدار المعبد الفرعونى .. حلم انى يكونلى مكانى على ارضى . بس الفراعين فى زمانهم كانو بيحلمو بالليل ويصحو الصبح ينفذوا اللى حلمو بيه ماكتافوش بالحلم بس لمجرد الحلم ....

كل واحد فينا عنده حلمه الخاص ببلده مجتمعه حياته بيته مستقبله .. احلام احلام احلام وكلنا عايزيين نحققها بس ازاى بلدنا محتجالنا زى ماحنا محتاجين منها الكتير ،، بما اننا بلد فيها شبيهة الديمقراطية وبيعلمو فيها انتخابات واحنا بنيجى نقول ماهى انتخابات مش حقيقية وفيها تزوير ، ينفع نزور فى كام الف صوت لكن هل ينفع التزوير فى ملايين الاصوات !!! هل اللى بيزور بلجرأة والحماقة انه يزور 70مليون صوت انتخابى !! ولو هو كدة هيزور مرة بس اللى بعدها هيخاف لانه يلاقينا مصيريين على موقفنا لاما المصرى بيصر على حاجة تخص حقه وحياته كل اللى حواليه بيخافو منه وبيعملو لصوته حساب .....

دايما يقولو اننا شباب فاشل مالوش فيها فا من هنا بيديرو اللعبة وهما مش حطينا فى دماغهم اصلا ، لكن لو لقيونا واقفين قصادهم وعملنالهم مفجأة وطلعنا كلنا فى الانتخابات نصوت طبعا مش هنصوت ونقول يالهوىىىىىىىىىىىىىىىىىىىى لكن قصدى ننتخب ننزل من بتنا ونروح نعمل بطاقة ونروح رايحيين على مقر الانتخابات ونقول فلان ،،، يمكن ماكنش نعرفه يمكن ماكنش شايفيينله اى خدمات بيعملها بس لما تتنتخب حد هتحب انك تتابعه زى بالظبط لو زرعت زرعة هتحب انك تروح تشوفها وهى بتكبر نفس الفكرة لو روحت انتخبت حد انت ماتعرفهوش هتلاقى نفسك شوية بشوية بتابعه وعايز تعرف هو بيعمل ايه لو عجبك خير وبركة لو حاسيت انه مالوش لازمة اديك ياسيدى عرفت السكة كلها دورة وتروح مغيره لانه ماسعدكش فى تحقيق حلمك لبلدك فى ناس بتنزل الانتخابات احزاب وعمال وفئات مستقل لو انت تبع حزب يبقى انت اصلا فاهم الليللة ماشية ازاى وسهل عليك انك تروح تقول كلمتك .. لو انت عامل يبقى انت اكيد محتاج وجودك ومحتاج انك صوتك يتسمع يبقى لازم تقول ان عندك صوت اصلا عشان يتسمع ولو انت عادى مصرى مالكش انتماء غير مصرى يبقى انت حر وليك الحق تعمل اللى يعجبك وتروح للى يعجبك .. انهاردة لما انزل ادى صوتى للانتخابات بكرة هنزل الانتخابات نفسها واحقق الاحلام اللى نفسها فيها ... كل حلم بيبددأ بخطوة وحلمنا لمصرنا حبيبتى هيبدأ بخطوة للقسم ونطلع بطاقة انتخابية ونطلع صوت عشان احنا ربنا خلق لينا احبال صوتية للاستخدام الادمى والانتخابات

وانا اول من قرر انه ينزل بكف صغير زى كف بكار كدة انه يرسم على مكانه ويقول انا عندى صوت ، ياليييييييييييييييييييييييل :)

ليست هناك تعليقات: