من زمان

ايوة انا اللى هتلاقينى بسمع اسمهان وعبد الوهاب واتأنس فى وحدتى بصوت فيروز.
ايوة انا الل هتلاقيها لما تفتح الشباك بتلمس خيوط الشمس وجنتها وتحس بالدفا بيسرى بين شرايين جلدها.
ايوة انا اللى لما تضيق بيقة واتخنق انزل امشى فى شوارع مدينتى واحكيلها واتأنس واتونس بونسها.
ايوة انا اللى الذكرى عندها مش بتموت وفاكرة الحلو والعاطب.
ايوة انا الى عايشة ف زمان مش متجانسة مع بشاعة الحاضر فى حالة انكار مستمرة انى بانتمى لهذا الزمن الاغبر .
ايوة انا اللى معقدة ببساطة وبساتطى عى سر استمرار انفاسى.
لا بعاتب ندل على خيانة ولابلوم بعيد على بعده وبابى مفتوح للاتنين لو قررو يسألو او هفهم الشوق ف ساعة حنين.
ايوة انا اللى بتروق بالها بفنجان قهوة وسيجارة.
ايوة انا اللى يعكنن مزاجى الظلم يقلب كيانى ويحولنى لفيضان.
ايوة انا اللى عمرها ماخافت م الحب ووخداه مبدأ وايمان انه قوة عظمى لم تكتشف بعد.
ايوة انا المتصالحة مع اوجاعى ومدركة مدى انغماسها وعمق جروحى اللى ف شق الروح.
ايوة انا اللى اعتادت على الوحشة والبعد عن الوليف.
ايوة انا اللى بشعر بغربة وسط ناسى لانهم مش ناسى ووحدتى هي خير ونيس.
ايوة انا اللى رغم الوحدة مأمنة ان الونس جاى.
ايوة انا اللى بحبكم زى ماانتم بكل عبل الحياة وترابها.
ايوة انا عليا اللى من زمان.

علشان يشبهلك

كان نفسى وجريت ايامى
خدنى البحر وودانى..
- غنوة بتتغنى ف بالى من وقت ماعينى شافت عيون من الكسرة بتلمع، همس العقل للقلب وقاله اعقل اوعى تروح بس كان فات الآوان، كان جرى القلب على الروح وعليها نده اصحى فوقى نسمة الهوى هالا.
- عرفننا ان من الوجع مش خالصيين بس الروح بتميل للروح شبهى وشبهك واتقلاقينا.
- هنعافر تانى ونقرب وفى القرب نتونس وللبعد نستنى،ماعدناش هنعافر ونقول دة غير لانه مش غير وهيجى عليه لحظة السلام او حتى منغيؤ سلام هيفارق ف سكوت ويسيبنا نتوانس فى حزن وسكوت اصل الفراق عهد الهوى.
- بس مالينا عليه سلطان شبهى وقالها وكان الود ودى تكون حقيقى ياريتك تشبهنى ف عشقى ياريتك تشبهنى ف نصرة الهوى والإيمان بيه ياريتك تشبهنى ف دوغة نسمة الهوى.
- اتشبهنا ف ضلمة وعتمة واشبهنا ف صدق الملامح وكره الكدب وعشق الروح.
- همسه من القلب للروح خايف عليكى من كسرة وكتمة النفس.
- روحى راحت وحبينا واهى واجعة جاية بس بعد طعم الهنا ..
- مش هستعجل الوجع وياريته يطول ماتخلصهاش بدرى سيبنا فى حضن الليل وابعدى ياشمس النهار دة العشق بعيد من زمن والروح مشتاقة لردة روح خليك شوية وماتفارقش خليك هنا لسة بدرى لسة الروح بتحن ولسة القلب بيدق بالاش كسرة داحنا يادوب ياسادة مرممينه..

الشجرة العتيقة

أشعر وكأنى أصبحت كاشجرة من أشجار منطقة عتيقة قديمة لأحد اأحياء مدينتى الصاخبة الراقية، تتساقط اوراقها مع كل موسم خريف وتزهر مرة أخرى مع الربيع، جدورها لاتتغير ولاتنقلع ثابتة فروعها عالقة حد السما، أحتوت ف ظلها الكثير من قصص الحب والفراق تجمعات أصدقاء ووفود زوار جاءو من جميع الانحاء لالتقاط الصور الفوتوغرافية وتوثيق ذكرى تبقى للأبد، هى لا تتحدث هى فقط تعطى فى صمت وشموخ لاتنحنى مع الريح فهى مقاومة فقط اوراق خفيفة تتساقط وبقدرها وحبها للبقاء تزدهر مع نسمات الربيع.
شهدت الكثير من الوداعات ولكنها متيقنة من انه هناك لقاء على الجانب الآخر منها، فهى دائما تعلم ان لاشىء يدوم للأبد ولكن هى وحدها غريزة البقاء تعلم انه فى لحظة الوداع تولد لحظة أمل فى لقاء جديد ما النهاية الا بداية لشىء جديد، تعلم جيدا ماتعنيه الذكرى وماهى قيمتها فى قلوب المحبيين الراقية هى لاتخاف المجهول ولا تهاب الفناء فهى محفروة فى ذكرى كل صورة التقطت بجانبها وسوف تتبادلها اجيال لعقود قادمة، تعرف معنى الحنين والوفاء وايضا الخيانة والغدر، شاهدت هؤلاء وهؤلاء، على أغصانها تشدو الطيور وفى احضانها بنت اعشاءها، تستمد من الارض ثباتها وقوتها وصمودها ومن السماء الحرية والتجديد، تعشف الخريف حيث النهاية وتتشاجر اوراقها واغصانها مع رياح ليالى الشتاء الباردة وتهدأ فى الربيع وتتجدد ومع الصيف تعشق اللمة والاصحاب تحت ظلها..

خذلان

in a short sceen,

فى لوحة بعدسة كاميرا , مشهد ليها ماشية فى وسط دوشة وزحمة المزيكا مصاحبة لروحها فى مشهد سينمائى من اللى كان نفسها   

 تصوره بعدستها , بتتكلم وتقول وتحكى وتفتكر عن وجع احلام ..

- من كتر الزحمة والدوشة بقيت أحس إنى مصاحبة المزيكا كأنها تراك مصاحب لحياتى علاقتى بالمزيكا والسينما والكتب والبلكونة اللى بتبص على شارع ريحة البيوت القديمة ، صداقة وحنين اكتر منها أماكن بنفوت عليها كل يوم ..

- لما بتفرج على فيلم بحس إنى قاعدة مع مفكر كبير النقاش بينا حماسى بنطلع منه بأفكار ومشاعر مختلفة وجديدة ، لما بحتار فى إجابة على سؤال معين ممكن الاقيه فى فيلم ، زمان كان عندى شغف فيلم ( بحب السيما) من كتر حبى ليه كان مكتوب على ؛ كل حاجة فى كتبى وعلى ملازم المحاضرات :)  شغفى بيها فى الوقت دة كان كبير قوى فالبتالى فكرت ادرسها بعد ماخرجت من عنق الزجاجة الكابوس المصرى المعروف بأسم الثانوية العامة ، حاولت أدخل معهد السينما كدراسة زى اى انسان عادى فى اى مجتمع بيحترم الانسان أمتحان قدرات عادى ويتتقبل يا لاء ز

- عملت كدة بكل ثقة واندفاع وحماس شباب صغيريين سحبت ملف التقديم وانطلقت وسط حرب كبيرة من لاء ، ليه قسم التصوير دة مابيخدش بنات ، طب ماتجربى سيناريوة احسن ، لحد ماجالى رد مهم من مخرج بحبه ( اعمل ايه عشان ادخل المعهد ؟ كان رده غيرى النظام ) " بعد ٢٠١١ كان نفسى اقبله واقوله ان النظام مترصخ اكتر بكتير ماكننا متخيليين " ..

ماتقبلش فى المعهد ودخلت كلية آداب جامعة القاهرة ، علم الاجتماع كان افضل خيار لية فى الفترة دى ، فضل شغفى بالسينما موجود وأتحولت علاقتى بالسينما والافلام لصاحب وبقت ملاذى الوحيد والصديق المقرب حبيت خان وحسيت بحبه لية فى كل فيلم وشخصيات مجدى احمد على عشقى لشاهين وكشف الكاشف لية عن حاجات كتير ، السينما المكان الضلمة والشاشة الكبيرة الللى بستخبة وراها واكتشفت ان دى كانت اول علاقتى بالخذلان ، خذلت نفسى فى حلمها وحبها ومنذ هذا الوقت توالت علية مراحل الخذلان لما انشغلت بالناس اللى حولية عن نفسى و عن احلامى تكاسلت فى كل حاجة ، سبت احلامى تعدى من بين أيدية ووقفت اتفرج عليها ، أديت طاقتى واحلامى وافكارى لاكتر انسانة خذلتنى فى الحياة بعد نفسى ، توهت وأتخبط بين جدران كنت بمشى مابنها عافرت والمعافرة مش فى مكنها ، حاربت حروب مش بتعتى معارك ماتخصنيش كسبتها بس المكسب مكنش لية ..

- جريت اسخبيت فى الاوضة الضلمة ورا شاشة العرض اتفرج على حلمى وهو طايرو بيتحقق فى ناس تانية ..

قدت قدرتى على تحويل الشغف لأكثر من كونه حلم أو أمنية سرقتنى الحياة وأمتلكنى الكسل وفى الحالة دى مش هقدر الوم غيرى انا على تهاونى مع نفسى فى البدايات وقسوتى عليها فى النهاية ..

على حسن اقاويل متخصصى التنمية البشرية لاذال عندى وقت ولم تنتهى الحياة طالما النفس داخل خارج ،لكن روحى العاجزة المسنة "انها اتنتهت وانها اكتفت بنجرد رؤية الحلم بيتجسد على الشاشة الفضية بعيون الاخريين .. 

40 سنة جواز

ابويا وامى انهاردة كملو 40 سنة جواز ..
اللى هو شىء مرعب بالنسبة لى ، يعنى انا بنت ماينفعش تقولى انا اصاحبك يومين تالاتة ولا بحبك وقشطة كدة شوية وتمشى لأى سبب علق اصل معلش يعنى تفتكر فى ناس ممكن يكونو عاشو 40 سنة مع بعض ماحصلش بينهم اى حاجة ممكن تكون حصلت لجناب حضرة معالى سيتك وعدوها مثلا !!
تفتكر البنت اللى اتربت فى بيت قدر يتحدى ظروف الكوكب لمدة 40 سنة ممكن تكون عملة ازاى !! مدى قوة احتمالها ومثابرتها ! مدى ايمانها بقوة الحب وانه قادر يصنع معجزات طيب خلينى احكى شوية عن الاتنين اللى بحتفل بيهم انهاردة ..
- من أكتر من 40 سنة قصة حب اتولدت بين اتنين قررو سوا انهم هيبقى سكن لبعض بيت وعيلة هيعيشو لبعض كيان واحد عاشو ومروا سوا بمشاكل ووجع دماغ بين الاهل وبين طبيعة عمل ابويا ظابط فى الجيش فى الاستنذاف بعدها حرب اكتوبر بعدها ظابط شرطة مهندس طلع عينه خدمة للبلد دى  سهر ليل نهار اولاد بيجو بيعيشو مع ام فى بيت عيلة بكل وجع دماغه واهمها عدم الخصوصية اللى ممكن يقتلنى انا شخصيا بمعافرة فى الحياة بستشفها لأن الام كانت حريصة تبعد الاطفال عن اللى ممكن يكون بيحصل ورا الكواليس ، لحد استقلالية ببيت فى منطقة بعيد عن اى عمار بس اهو بيت هادى مستقل اخيرا بعمر بقى بدأ ..
لحد ماوصلت ان بعد كل العمر دة هو لسة قادر يضحكها وهى لسة قادرة تطبخله الاكلة الحلوة .
هما مختلفين فى قدرتهم واسلووبهم فى التعبير عن بعض تماما بس كل واحد بيعبر بأسلوبه وكل واحد خلاص فهم التانى وبيستوعب اللى بيعمله ..
البيت دة اللى تتربه فيه بنت ماتستناش منها انها تكون حاجة تانية غير دة .. هى مش هتفهم غير التفاهم وتقبل الاختلاف وتحمل المسؤلية والحب والتضحية والضحك :) ، ماتفتكرش انها هتستحمل خذلان وانهزام بسهولة ماتفتكرش انها عادى هتقبل بأقل من ال forever لان دة اللى هى بتفهمه اه مافيش ضمانات فى الحياة بس اتعلمت ان شكل حياة معين هيوصل لصورة حياة تتعاش بسلاسة .. ماتعلمتش الانهزام والانسحاب من قلب المعركة هى الحياة واحدة وهنعديها سوا كل حاجة هتتعدى بس نكون سوا فى قلب العاصفة سوا نقدر ، سوا اقوى ..
انا ابويا وامى مثال حى بس مش كدة ووخلاص انا كمان ورثت جينات القوة دى والثبات واللانهاية الآبدية  والعمر والحب القادر على المعجزات حرفيا عندى جينات القوة والحب والمثابرة ماتفتكرش انى هقدر اضعف وانهزم واستسلم بسهولة للأسف مش من طباعى ولا من طباع البيت اللى انا لسة عايشة فى حضنه ، الحب مش وهم الحب موجود محتاج بس ايمان بيه وبقوته وسلتطه علينا وعلى حياتنا ، الحب هو الطاقة اللى بيها هتكمل هتوصل هتتنفس ، ابويا وامى معملوش دة عن قصد واكيد مكنوش متخيليين ان ممكن يوصلى كل اللى عاشه هما عايشين الحياة بعفوية جدا وصدق وعشان كدة انا قدرت احس الحب دة قدرت استوعب الجينات دى جوايا ومش هعرف اعيش غير كدة مأمنة بالحب وبطاقته ..

قاعدة بنات

- اااه انا اتهد حيلى
- وانا هموت على سيجارة وفنجان قهوة
- وانت جعت قوى
- ارحمينا طفاسة
-تعبتكم معايا يا بنات
- بس ياهبلة انتى
-اياكش يطمر 😂
-لسانك عايز قطعه 😃
- هتوحشنى لمتنا والله ..
-هو الهانم مسافرة  !!دة انتى هتتجوزى يا عبيطة وهنفرح ونرقص وهنخربها 💃💃
- اه وبعدين نوحشك ايه دة انتى هتبقى مكنة 😂😂 ..
- دة اللى هو ازاى انشاءالله ؟
- ايوة بكرة بعد مايفرحلهم كام يوم يبدأ بقى نزول القهوة والبلاى ستاشين واحنا بقى ساعتها نيجى وتبقى ليلة خمرا ونساء 😃😃
- والله فكرة بنجوزك عشان نمكن عندك 😂
- ايه ياعروسة سرحتى ف ايه ؟!
-شكلها خايفة لنعملها بجد 😃😃
- انتى بتهرجى صح بس انا دلوقتى بجد خفت ..
- من ايه يا كأيبة ؟!
- تفتكرو الراجل ايه اللى يخليه يسيب مراته ويسهر مع اصحابه !؟ ماهو معاهم طول الوقت ؟!
- زهق - اكيد برضة قاعدة الصحاب مختلفة زى ماحنا معاكى كدة دلوقتى - برضة التغيير مطلوب بدل ماتملو من بعض ..
- ماهو زهق وملل دة اللى مخوفنى ..
- ليه ؟!
- هيزهق منى خايفة ابقى زوجة مملة ومعرفش اسعده ..
- هو انتى دلوقتى او من ساعة معرفتو بعض حستيه زهق منك او انك مملة فى اى حاجة !!
- مش قصدى ملل قعدتنا ولا خروج ولا كلام عادى ، افهمه قصدى ..
- اوبباااااا العروسة شكلها مكسووووووف ايه يا قطة مالك !؟؟
- منغير ماتريقو انتو عارفين ان معنديش تجارب معرفش حاجة معرفش المفروض يحصل ايه اعمل ايه مطلوب مننى ايه ؟!
- طب وليه متسأليش نفسك انتى عايزة ايه !!
- ايوة سألت بس معرفش انا معرفش حاجة كان نفسى ابقى زي البنات اللى جربه قبل الجواز ماحسش انى هموت بكسوفى ولا احس انى لاخمة كدة ..
- اااه كنتى عايزة تبقى العروسة الخبرة 😃😃😃
- بس يا بقرة انتى مش شايفة انها بتتكلم جد  
- كملى ..
- كان نفسى ابقى عارفة فهمة ، انا معرفش اى حاجة عن النوم مع حد يعنى اصلا مش متخيلة دة هيحصل ازاى ، اصلا هقلع كدة !! ياهلوى دة انا قلبى هيقف .. واكيد لو فضلت كدة هيزهق ايه اللى هيخليه يقعد.مع واحدة زيي مالهاش فى حاجة ولا فاهمة ولاحتى عايزة تعرف ..
- ياريتنى بجد جربت بس ..
- منغير بس .. انتى فاكرة انك لو كنتى جربتى كنتى هتبقى مطمنة دلوقتى ولا فاهمة ولا هتبقى البت اللونة بقة الخبرة اللى بتلاعب اللى معاها عالشناكل !!
- ايوة على الاقل ..
- بقولك ايه هى مش كدة ..
- اسمعى م الخبرة 😃
- كلمة كمان هسبلك قومى هاتى حاجة نشربها بدل مانتى قاعدة كدة القعدة شكلها مطول ..
- حبيبى اسمعينى ؛ مش هقولك انك لو كنتى عملتيها قبل كدة ان دة كان هيطمنك ولا هيخليها اسهل ، وحالة الكسوف والخجل دى حلوة فشخ وممكن تكون موجودة عند اى حد اه مش بنفس النسبة بس وجودها مطلوب بالعكس دى بتعكس روحك.. اقولك انا بتخيل الموضوع دة ازاى او بحسه ايه ؟
- ايه ؟
- انعكاس لطباعك
- ازاى ؟
- طبعك وشخصيتك تصرفاتك طول اليوم بتنعكس هنا فى اللحظة دى ، يعنى لو شخص انانى او شخص غير مهتم ، خجول زيادة ، منفتح ، محب للمغامرة والتجديد جرىء عفوى عنيف غضبان كداب نصاب 😃 مغرور ..
- قال مش بيحبنا 💃💃
- هاهاهاهاهاها فصالانك ياشيخة ، هاتى الازازة دى ..
- كملى سيبك من الفصيلة دى.
- طب بزمتك مش ألشة حلوة ..
- اتوكسى ؛ استنى بنسمع اختك الخبرة قولى ياخبرة
- اوكسمبالله كلمة كمان وهقتلكم ..
-كملى بقى ..
- فهمتى قصدى عرفتى يعنى ايه طباعك بتبان او بتنعكس لو انتى حاباه ومش عايزاه يزهق دة هيبان اعكسى فكرتك ورغبتك فى تصرفك .. بس فيه حاجة قبل كل دة .
-ايه؟
- انتى بتحتاجى منه ايه فى يومك العادى؟
يسأل عليه ، يكلمنى ، يجبلى جيلى كولا كل مرة وهو جاى يقابلنى 😃 منغير تريقة ..
- يعنى فيه حاجات بتحتجيها منه انه يعملها ، عشان بتبسطك بتديكى احساس حلو بنفسك
- اه
- خلى الاحساس عندك ديما ، اتبسطى احساس اول مرة دة احساس ليه طعم تانى زى اول مرة كلمك اول مرة قالك بحبك اول مرة مسك ايدك او اول نظرة طلعت من عينكم لبعض كان فيها حب او كانت بتقول بحب .. عبرى بعنيكى بأيديكى اللحظة دى مفتوحلك فيها انك تعبرى بكل حاجة فيكى كلام سكوت لمسة حركة استخدمى روحك كأنك بترقصى على اكتر اغنية حبتيها وحتى لو كنتى مجربة كل مرة ليها احساس مختلف اى علاقة ليها خصوصيتها جدا ممكن ماتكنش الاولى بس ليها خصوصيتها اللى تخليها الاولى احساس تحسيه لاول مرة وفى علاقات بيبقى فيها كل الاحاسيس اللى مش حلوة فيها كسوف عشان كان فيها استغلال او كانت بردة مافيهاش شغف ولا اهتمام مدروسة اتنين عايزين يطلعو حاجة وخلاص انانية توجع الاحاسيس دى كلها مش دايما حلو انك تمرى بيها فى حياتك خصوصا لو بين اشخاص ارواحهم مش متقابلة ..
انتى بتحبى وهتنجوزى اللى بتحبيه وهيكون اول راجل تترمى فى حضنه وتعيش معاه حياة بكل تفاصيلها انتى هتعيشى اللحظة اللى هعتبرى فيها عن نفسك بكامل حريتك حرفيا هتعملى اللى انتى عايزاه ..
- اه بس اوعى تعوريه 😃😃
- يخربيت فصلانك 😂😂😂😂
- ايه دة هو فيها تعاوييير 😯😯 ؟؟!! هترعبونى ليه !؟
- يانيلة احنا بنلصمها الله يهدك 😃
- حبيبى ماتخفيش فيه حاجت بسيطة كدة حوادث عادية ممكن تحصل بس بيبقى دمها خفيف وبتبقى زكرى كدة هتضحكو عليها بعدين 😃 ، ماتخفيش الخوف بيعطل ..
- طب انتى اول مرة حسيتة بايه ؟!
- احم مم بصرف النظر عن تفاصيل اللى الكلبة اللى اتعدلتلى فى القاعدة در هتموت وتعرفها 😃 بس اول مرة تقنيا كنت مش فاهمة اى حاجة مش مستوعبة اصلا انى متجردة كدة من كل حاجة قدام واحد فى اللحظة دى بقى بتتأكدى هو غريب عنك ولا لاء ، كنت خجلانة ومش فاهمة ايه اللى بيحصل متأهبة بتفرج انت يتعمل ايه ، طبعا انا معملتش حاجة بجنيه هو الى كان بيتحرك انا كنت ... بكتشف كأنى بتعرف عليه من اول وجديد بس محستوش غريب عننى نفس الحنية والحب والاهتمام وواخد باله منى كان موجود ..
- هاااااااه وايه كمان 😇😇
- اه يا زبالة حد يمشى البت دى من هنا 😃😃
- وانتى متنحة كدة ليه مالك 😃😃
- لاء بربط الاحداث بس ..
- طيب انتى قلتى اول مرة تقنيا يعنى ايه !؟
- يعنى دى كانت اول مرة فى الحياة مدة يحصل دة ، ب أيا كان التفاصيل حلوة وحشة حاسة مش حاسة بس كنت ولا الهوا بلاص بقى تماما ..
- طب وبعدين اللى بعد.كدة ؟!
- ال بعد كدة كان زيه لحد الحدوتة الكبيرة اللى اختلفت فى كل حاجة طبعا كانت مختلفة فى دة كمان الحب الكبير المميز الروح والشغف والطيران والضحك الدم الخفيف هزار خي رومانسية طيش انطلاق مرح فرحة متعة دة اللى بيحصل لما بتبقى حدوتة الحب عاملة كدة زى ماقصة حبك ماشية فى العموم هتمشى فى اللحظة الحميمة بس العفوية هى المفتاح ..
- طبعا فى تفاصيل تانية هقولهالك بعيد عن جوز العرر دول 😂😂 عشان الفصلان بس اللى عايزة اقولهولك انك بتعيشى احلى لحظة ماتتكسفيش انها اول مرة ماتبصيش لحد زيي انه الموضوع بالنسباله هيبقى اسهل مافيش حد شبه التانى قلبك وروحك هما اللى هيدلوكى خليكى حرة انته واحد ماتستعجليش براحتك وخدى وقتك حبه بعض قوى هتلاقيها جت لوحدها الكسوف الرهيب هيبقى شوية خجل كدة يدوها اصلا طعم يحلوكى اكتر مانتى حلوة .. وعلى قد مابتحبيه عل  قد ماهتروحيله وحدة وحدة هتكتشفى الحاجات الجديدة المستخبية هتشوفيه على طبيعته وهو هيشوفك زى مانتى منغير مكياج تفاصيل هتبقى عايزة تكتشفيها اكتر فاهتقربى اكتر ، انتى حلوة من جوة ومن برة .
- اه ومن فوق ومن تحت بس محتاجة تكبر شوية 😃😃😃😃😃
- بصراحة اه 😃
- كلاااااااااب 😃😃😃😃
- الحب هو السر الحياة انتو هتبقو حياة لبعض ندى الفجر الى  بينزل على ورق الشجر يزيده حلاوة وخضار ، الربيع اللى بيلمس الورود تزهر وتفتح مية المطر فى الشتا اللى بتسقى عطش الارض موجة البحر اللى بتحضنا فى الصيف ونجرى ونتشقلب فيها غمضى عيونك وارقصى واتميلى بجسمك وحسى الحركة واللحن اللى هتعزفوه سوا .
- اه بس الله يباركلك اصوات نشاز لاء مش عايزين فضايح 😃😃
انتو قلالات الآدب
-بعد.كل دة !! دى البنية نفسها راح وهى بتحاول تبسطهالك .
- بقولك ايه ابسطهالها انا م الاخر فكك من كلام الرومانسية دى مايأكلش عيش دى عايشة ف لالاند كلهم ف الاخر بيقلبه ابراهيم جوز يسرية فانلة بحملات وكرش وطاقية ونضارة يايسرية 😃😃😃😃😃
- يالاهوووووويييي 😃😃
- مبروك ياعروسة تعالو نقوم نرقص
- ييالا بقى 👰💃💃💃 ويبتاع النعناع يامنعنع يامنعنع 😃😃😍😍😍

11:11

امنية ال 11:11 ؛ شفتها كتير عل السوشيال ميديا انت امنيتى فى 11:11 ، اعدت ادور ايه الموضوع فالكلام كله كان ان الارقام المسلسلة اللى بتيجى عن طريق الصدفة بما انها مميزة فاعتبروها لحظة مميزة نتمنى فيها امنية وان الامانى فى الغالب يعنى هتتحقق ، من باب الامل التفاؤل بهجة .
انهاردة جيت عينة بالصدفة عالساعة وهى 11:11 ابتسمت وفكرت يعنى ايه امنية ؟ وايه اللى ممكن يحصل  فايخليها تتحقق ؟ الحظ الفال الحلو الشطارة !!
ملقتش معنى يتناسب مع عقلى للأمنية الا انها الحاجة اللى اول ماغمض عيونى اشوفها ، الحاجة اللى اول ماتيجى فى بالى ابتسم تلقاءيا .
وفضل سؤال تتحقق ازاى هو اللى بفكر فيه ماهو لو هتيجى بانى اعمل خطواط معينة تبقى مش أمنية بقت خطة من خطط الحياة ! بس برضه فى ناس ممكن تتمنى حاجة وتحصل منغير ماتعمل حاجة !!
وبعدين فكرت انه لاء فى رابط بيربط الأمنية بأحساس وتترجم فى تصرفات لا إرادية بتحصل بتوصلنا فى الاخر ان الامنية تتحقق..
صحيح انا كنت وصلت فى المرحلة الأخيرة انى مش هتمنى او مش هعيش بأمل ولا بيأس انا هعيش اللحظة زى ماهى واقع باللى موجود فيه واللى مش موجود ، بس لما بدأت اراقب حاجات معينة لقيت ان اللى ممكن اكون اتمنيته من سنة بيحصل منه جزء كبير دلوقتى وانا مش حاسة !! اكتشفت ان فى خلال سنة اتصرفت مع نفسى بكل الأشكال اللى وصلتنى للحظة دى ..
الأمنية عشان تتحقق محتاجة حاجة واحدة انى اكون مصدقة فيها بجد حباها عايزاها فعلا متأكدة من تفاصيلها ، وان من حقى يكونلى حلم احلم بيه واتمناه واتملى بيه بروحى وعقلى وعيونى ، الحلم مش مخيف الأمنية اللى بتمناها هتتحقق اياكان الوقت اللى بتمناها فيه مش هشغل دماغى هتتحقق ازاى لانى هحققها هلاقى روحى بتسوقنى لطريق تتويجها انا بس محتاجة انى اقرا العلامات كويس اخد بالى من التفاصيل الصغيرة عشان جواها معانى كتير والعلامات دى هى اللى هتقولى اكمل المشوار ولا لاء ..
لما لقط لقطة 11:11 انهاردة انا ماتمنتش حاجة معينة بس ابتسمت ابتسامة متفألة راضية مطمنة حسيت انى اتبسط لما شفت الرقم معزتش حاجة بس البسمة كانت كافية ..
بسمة على خد حزين ولمعة فى عين زعلانة لو لحظة بسيطة حتى لو دقيقة واحدة ممكن يدونى حياة وبسمة عيونك حياة ديم العيون لامعة والشفايف مبتسمة :)
-اتمنلكم الهنا :)