الخميس، 6 مارس، 2008

لما قلت عايزة اكون حرة......قالولى اتجوزى


يوم عيد الحب اللى فات كنت متفقة مع الشلة بتاعتى انهم يخرجونى لأنى حالت النفسية كانت مؤسفة اخر حاجة ,,لكن اللى حصل ان صديقاتى العزيزات باعومنى وقضيت عيد الحب مع اصدقائى الذكور خولى وألبير قلتلهم عارفين نفسى فى ؟ قالولى خير مأنت اصلك أحلامك كتير ومالهاش علاقة ببعض" قصدهم مجنونة" قلتلهم عاوزة اروح وسط البلد فرد خولى وقاللى هتبقى زحمة قوى دلوقتى البلد واقفة يابنتى قلتلهم عارفين بجد نفسى امشى فيها من الساعة 2 بالليل لحد ماتشرق على الشمس وانا على كبرى قصر النيل وأكون ماشية ومعايا المولقاط بتاعى " الكاميرا بتاعتى" فرد عليه خولى برده وقاللى لما تجوزى.....
بصراحة الكلمة فضلت ترن فى ودنى كتير قوى يعنى عشان اكون حرة لازم اتجوز , عشان أعمل حاجة بسيطة زى دى لازم اكعملها وانا مقيدة بسلاسل زوج ؟!!! فجأة حسيت انى بتكلم مع واحد طالع من فيلم أبيض وأسود بكل قيم ومعتقدات الزمن ده واهما ان المخرج الوحيد عشان تعرف تتنفس يعنى تكون فى بيت جوزها طب ايه اللى خالاهوم واثقين ان البنت لما تتجوز هتقدر تعمل اللى نفسها فى ؟ منين جابو الثقة دى ؟؟!!يعنى عشان افرح لازم اتجوز,,عشان احب لازم اتجوز,,عشان اعيش وسط اطفال لازم اتجوز,,عشان اكون مرأة كاملة لازم اتجوز,,عشان اكون ست ناجحة لازم اتجوز,,عشان اكون حرة لازم اتجوز....................................
تفكير عقيم طب منين هاكون كل دة وانا اسيرة لبنى أدم واحد يايكون كويس ويايكون زفت ما هو على رأى المثل " الجواز عامل زى البطيخة لاتكون قارعة لاتكون حلوة" طب انا بقى منين اضمن ان بطختى حلوة مش احنا عندنا مثل تانى بيقول " اللى تحسبه موسى يطلع فرعون" ولا ده ماينطبقش على الجواز وان الجوز لازم يكون زى الفل
ليه دايما مأجلين كل حاجة لحد ماتحصل حاجة تانية ,البنت تأجل الكعب العالى لحد ماتتجوز, الموهوب يأجل موهبته لحد مايخلص دراسته وياخد الشهادة,,,, وهلما جر ,,كله بيتأجل لحين اشعار أخر ليه مابنعرفش نعمل كل عمل فى وقته الحقيقى والطبيعى يعنى حاسس انك عايز تعيش لحظة جنون عيش لحظة جنون من غير ماتستنى اللى حواليك , عايز تخرج اخرج , عايز تحب حب,,عايز تعيش لحظة صدق عيشها كفايانا تأجيل بقى كم من العمر ضاع بسبب التأجيل ده كام لحظة حلوة ضاعت بسبب كلمة لما وانا كام ضاع منى بسبب الكلمة دى من كل اللى حوليه ...لما فكرت بينى وبين نافسى قررت انى لازم ماستناش على انا عاوزاه لما ,,خدتنى الجلالة بقى لكن طلعت طلعت ونزلت على مافيش مش هاقدر اغير حاجة وهااضطر استنى لما .....بس مش لما اتجوز لاء لما اقدر اكون قد انى اقول لاء واعمل اللى انا عاوزاه وقت ماعوزو وهو اصلا عاوزة ايه ده انا غلبانة فى طلباتى والله بقى عشان اروح مكان لازم اتجوز,,امال لو حبيت اسافر مثلا ايه بقى لازم اكون جرة ورايا سبع عيال,,الله الغنى هاعمل اللى انا عاوزاه غصب عنك ياخولى ومن غير جواز وبكرة تشوف وانت عارف جنانى .....

ليست هناك تعليقات: