السبت، 6 ديسمبر، 2008

وها قد اتى العيد..............


فى زمنا لما كنا صغيرين وكنا نسمع بكرة العيد ,كانت الكلمة بالنسبة لنا منتهى السعادة

بكرة العيد ,,يعنى لبس جديد

بكرة العيد ,,يعنى الفطار فى بيت جدو واللعب مع الصبيان والبنات

بكرة العيد,,يعنى عدية من بابا وماما وتاتا وجدو الخلان والاعمام والجيران وكل الناس الحلوة دية

بكرة العيد,,يعنى وقت الاجازة الطويلة اللى كلها خروج وفسح ولعب ومركب بشارع فى النيل

بكرة العيد,,يعنى بومب وصواريخ وفرقعة فى الجووبالالين حمرا وصفرا وزرقا

بكرة العيد ,,يعنى الكحك والبسكوت فى " الصغير" ,,,

بكرة العيد,,,يعنى خروف يمءمء طول الليل ويندبح الصبح

ويجى العيد ........الله اكبر الله اكبر الله اكبر ,,لا آله الا الله ,,,الله اكبر الله اكبر الله اكبر ولله الحمد ,,تكبيرات وذكر اسم الله للصبح ,,وده بيكون احلى صبح

يجى العيد ,,وبعد الصلة تتجمع الصحبة الحلوى ونفوت نعيد على الكل اللى نعرفه واللى مانعرفه...


ده العيد فى بلدنا الحلوة الجميلة مصر اللمة والضحكة الحلوة ,,تجميعة العيلة على فطار اول يوم العيد ,,الفتة واللحمة الضانى وصنية الرقاق بالشربة من ايد جدتى,,,لمة ستات فى المطبخ ساعة صبحية ,,,لمة الرجالة على القهوة بعد الصلة فى الفجرية,,ولعب العيال على باسطة السلم والضحك جايب اخر الميدان......................


لكن................العيد كلمة بقى ليها معانى تانية خالص

العيد بقى معناه حالة طوارىء فى الشوارع وانتظار لحادثة تحرش جماعية من شوية شباب لشوية بنات ماتفهمش اصلا جم منين ولا رايحين فين

كلمة عيد بقى معناه ,,شرب وتهييس ولف فى الشوارع بالعربيات والجرى والتدوير على اى حاجةا تضيع الدماغ وهو اسمه عيد........

كلمة عيد للاسف اصبحت باب رعب لكل بيت فى مصر من نزول اولاده وبناته للشارع ,,وياترى السنة دى هتكون حادثة التحرش فين فى انهو حى ولا شارع ,,وسط البلد ولا المهندسين ولا مدينة نصر ولا ...ولا ....ولا .... بس الاكيد انها مش هتكون مصر الجديدة :):):):) الحصن الحصين


بجد بتمنى ان العيد ده يمر بأمان وسلام ويكون عيد بجد يعنى فرحة ولمة وفسحة حلوة ,منخافش اننا نخرج ونفرح نحس بأمان واهلنا كمان يحسو علينا بامان ...

المفروض ان العيد مناسبة دينية روحانية ,,مش عارفة ازاى بنصلى العيد ونحرص قوى على صلاة العيد وبعدين نعمل تصرفات بعيدة تماما عن اللى عملناه فى الصلاة ,,ماينفعش


يارب اسعد ايامنا واجعله عيد مبارك علينا كلنا واجعل بركته تهل علينا بالمان والسعادة والخير..وترجع تانى كلمة عيد يبقى كلها فرحة وسعادة ولمة وضحكة حلوة هادية صافية......................

وكل سنة واحنا كلنا طيبين وبخير يارب " عيد مبارك"

هناك تعليقان (2):

altwati يقول...

مسكين الخروف
مستسلم جدا
مدونتك جميلة
ومليئة بما يستحق القراءة
كل سنة وأنت طيبة

cema يقول...

اشكرك جدا على تعليقك ,,اه مستسلم بس السؤال هل مسنسلم لانه عارف مصيره ولا مستسلم لانه مش مدى خوانة :)
كل سنة وانت طيب