الجمعة، 12 ديسمبر، 2008

فنجان قهوة...............


فنجان القهوة فى بلدى ثقافة ,,وزمان ايام الزمن الجميل كانت القعدة فى جروبى ولا كازينو الشجرة بالدنيا ومافيها

ولا القعدة فى قهاوى وسط البلد وقهاوى المثقفيين,,وكلمة عايزاك فى موضوع مهم ويكون الرد عدى عليه ناخود القهوة سوا ......... ليه القهوة مش الشاى,,عن القهوة عندنا ثقافة

القهوجى " يعنى اللى غاوى القهوة مش دوءدوء اللى فى قهوة المعلم حمودة" اللى غاوى قهوة مثقف بطبعه ,,مش المثقف اللى هو بنضارة وكتاب ومابيستحماش ده لاء مش قصدى ده انا اقصد التانى اللى غاوى مزيكا وعنده هم شاغل باله ودماغه طول الوقت,,مش هم شخصى لاء هم جماعى بلده والمواطنين امثاله بكرة ولادنا نهر النيل وتلويثه الناس الغلبانة اللى يادوب بتعرف تلاقى قوت يومها بالعافية هم الجيل اللى طالع حتى لو ماعندوش عيال ولا حتة فى حياته علاقة لكن هو برده شايل الهم ,,السرقة والنهب والتهليب مين راح مين جه مين بيموت فى فلسطين والعراق,,لبنان وسوريا على فين القهوجى مش عايش بره الزمن ,,ايه الجديد فى المزيكا ,واخر اخبار المسرح ,وايه رأيك فى اخر فيلم شفته؟واخر كتاب ماسكه فى ايده وبيقرا وهو بيشرب فنجان قهوته على ضوء خفيف يادوب متسلط على الكتاب وفى الخلفية تلاقى صوت "سيناترا ولا لوتشيلو,,او حتى مزيكا من غير صوت" وساعتها القهوة ليها طعم تانى..............ز

او تلاقيه ماسك قلمه ورقته وقاعد يقول "بسم الله الرحمن الرحيم,,نقطة ومن اول السطر.........." ويخط اول خط فى كتابة " مذكراته,روايته الاولى اللى بيحاول يجسد فيها معناة بيشوفها كل دقيقة فى الحياة,يكتب جواب للمحبوبة وهو عارف انها مش هتقراه,,كارت معايدة بمناسبة عيد ميلاد ابن اخوه اللى هو اهم حاجة فى حياته,,..........." المهم انه مش هيبدأ كتابة من غير فنجان القهوة...........

او تلاقيه بعد الوجبة المتينة من الفول والطعمية فى السيدة زينب ولا الرفاعى بيدور على اقرب قهوة ويحبس بيها عشان يستطعو الاكلة التمام..........

او تلاقيه واخد ريشته والوانه ومتفق مع اصحابه يتجمعو فى مكان ويبدأوا يحضرو لوح المعرض اللى جاى اللى هيكون عبارة عن فن تشكيلى وتصميم حلى , ونحت على الخشب ,,, وبعد هدة يوم طوي هيروحوا يشربو القهوة مع بعض.....


هتلاقى جدتى ساعة المغربية معاها السبرتاية وقاعدة جنب شباك قضتها وبتعمل ليها ولجارتها فنجانيين قهوة ويفضفضو لبعض عن الراجل وعياله وعيال العيال ومرات الواد وجوز البنت ,,احلى قاعدة نم ستات ...........


هتلاقى شلة البنات متجمعيين بعد الشوبينج وحابيين يحكو حكاوى بنات بعد اللف يوم طويل ,,على ريحة القهوة .......

هتلاقيها واقفة قدام كنكة القهوة حزينة شريدة بتفتكر احلى الاوقات ,كنا بناكل كذا,وبنشرب القهوة مظبوطة واخر مرة حكينا ورتبنا امتى هيجى ويشرب القهوة مع بابا,,ويجى بابا ويقولها سكى على القهوة وخليها شربات...............


هتلاقينى ....قاعدة ,بعد يوم طويل مطمنة فى على "أية وحفيدى وهبة و باقى الشلة." ومولعة الدفاية وجنبى زووم وصوت فيروز مالى المكان وروايه محفوظ فى ايدى قاعدة قصاد الشباك بتنفس هوا ربنا الجميل ,, وفى ايدى فنجان القهوة......................

هناك تعليق واحد:

Soooo يقول...

تصدقي مابصتش لموضوع القهوة بالتعمق ده
عندك حق فعلا
القهوة ليها مكانها وكيانها
وبرضه بدليل ان القهوة اللي بيتقعد فيها .. اسمها قهوة .. وبالانجليزي اسمها كافيه
ايه اللي جاب الشاي بقى ؟؟؟


مدونتك فيها فكره حلوه
هاروح اكمل قرايه




سلاموووووووووووووز