رعد وبرق بقى وامطار وحاجة كدة مرعبة كأنك دخلت فيلم رعب ثلاثى الابعاد كمان ...
هو اينعم انا اصلا فى مشكلة انى صعبة ان ماكنتش مستحيلة الفهم لكن مع المختلف انا احسن شوية من المتشابه يمكن لانى بالنسباله لغز يحب يدعبس فى كدة لحد مايفكو او مثلا يطلع من الناس المتفتحة اللى بتقبل بالتغير ومؤمنة باحترام الاخر بقى والجو ده يا سلاااااااااام هنا او يطلع حد رزل ومالوش فى المختلف وقفيل خلاص فل نقطع نت اولها ونبقى عارفيين ان مافيش نصيب او يطلع بقى من نوع الناس اللى بتحب تلعب بالناس مشاعرهم عواطفهم يطلعو يلعبو بيك كورة شراب ،، برضة اشطة ماحنا لازم نتعلم ...
لكن بقى لو طلع شبهى هنطأش فى بعض فى كل حاجة يعنى مثلا لو احنا الاتنين بنموت فى البيبسى هنتخانق على آخر بوء فى الأزازة او على آخر حتة شيكولاتة او هتنخانق مين يقعد جنب الشباك ولما نيجى نسافر هتخانق مين اللى هيسوق وهكذا وده فى الحاجات الكبيرة اومل بقى فى الصغيرة اللى هى زى مثلا لو احنا الاتنين غاويين قاعدة الاهل هتخانق فى العيد نروح لمين الاول ، ولو احنا الاتنين مهملين جدا مين هياخود باله من القطة مين هيدفع فاتورة النور ولو احنا الاتنين بنلبس نضارة مش هنشوف الرصيف اللى وسط ميدان مصطفى محمود ولو احنا الاتنين بنحب عمرو دياب مش هيبقى فى سى ديهات لعبد الحليم ......
باختصار انا موافقة جدا ان فى الاختلاف بنلاقى الانجذاب بنعرف نقرب بنحب فكرة اننا هنحاول ونجاهد اننا نوصل للى قصادنا نفهمه نحسه نستخدم معاه كل حواسنا عشان نعرف نطلع مننا ومنه افضل طريقة للتعامل وبرضة يفضل جوة كل واحد فينا الحتة بتاعتة الخاصة بيه اللى مش من حق حد يقرب عليها اللى منها بنعرف نشحن كل طاقتنا عشان نوصل لبعض ، لكن لو احنا زى بعض هنخسر بعض مش هايكون فى هناك المتعة بتاعة انك تحاول تتعب عشان توصل لدماغ اللى قصادك ولا اللى قصادك هيحط فى اعتابره انك عملت حاجة عشان توصله ، لما بنتشابه فى حاجات ونيجى نعاتب بعض على غلاطتنات بنلاقى نفسنا بنقول لبعض" بص لنفسك قبل ماتتكلم" ساعتها بنتوجع بس مابنعرفش نداوى لأننا احنا الاتنين على راسنا نفس البطحة ......
ليست هناك تعليقات:
إرسال تعليق