الثلاثاء، 1 ديسمبر، 2009

الرجل السندريلا ................


كلنا عارفيين حدوتة سندريلا كلما سمعناها و احنا صغيرين ، ومن كتر ماحفظانها بقى اى واحدة من الاصحاب لما تيجى تروح فى وقت فى محدد يتريقو عليها ويقولو " سندريلا " ، كلنا كبرنا وفى دماغنا سندريلا يعنى " بنت " بس عمرها ماكانت تتخيل ابدا انه يكون فيه الراجل السندريلا ...

اشهر حاجة فى سندريلا انها كانت لازم تجرى قبل الساعة 12 عشان الامير مايكشفش سرها وتتحول قصاده من البنوتة الجميلة للبنوتة الغلبانة اللى لبسها على قده ،، سندريلا ال 12 لازم تمشى من قدام الامير ، حتى وهى فى حضنه وبترقص معاه وعايشة اسعد لحظة فى حياتها ، وحياته كان لازم تجرى وتسيب كل ده وراها وماتفكرش غير ان السحر هيروح مفعوله الساعة 12 ....

بس ايه قصة صاحبنا السندريلا ده ،،، الناس لما بتكون مختلفة عن بعضها فى حاجات اساسية ده يمكن بيخليهم مايتواصلوش مع بعض بشكل مرضى لكل الاطراف دايما بيكون هناك حاجة نقصة حاجة مش مظبوطة ...

وده اللى حاولنا كلنا نقنع صاحبنا بيه ، ياما قلنالو الحدوتة مش نافعة انتا عامل زى سندريلا وهى طير ماينفعش تظبط الطير على ساعتك وانت ساعتك مظبوطة زى السندريلا ، لدرجة انك وانت معانا بنتسنكح فى اى حتة قبل ال 12 بتكون خالع وسايبنا ، وهى كائن ليلى بحت هتحبها امتى من 6-9 هى سيما يابنى .. انت الساعة والدقايق بتعملها الف حساب وبتحسب للحساب حساب ، وهى على ماتفرج دقة الساعة فى حياتها اكبر سجان عدو لدود ،، كلنا عارفينها من زمان ومش جديدة علينا هى صحبتنا من قبلك وصحبتى انا الانتيم انا عارفاها حساسة كتير وعايشة اللحظة بلحظتها والوقت بالنسبلها شىء معدوم ، منطلقة طايرة حرة جريئة مجنونة ماينفعش تسيطر عليها ، حرام تخنوقها معاك ، بتحبها!!!!!!!! عارفيين .. تقدر عليها !!!!!!!!!ا شاكيين

الحب بيغير ، الحب هيخلينا نعدى كل الشطوط وانا معاها هاحاول اطير

بس هترجع قبل الساعة 12،،الطيران مالوش معاد ، اجمل مافى الطير حريته وانطلاقه

انا مش خنيق قوى كدة

عارفيين .. سندريلا ماكنتش خنيقة ، سندريلا كانت مجبورة وماباليد حيلة ، وانت مش بأيدك انت انسان له طبيعة فطرة اتخلق عليها هتعمل ايه يامسكين !!!

دى حب عمرى مش هسيبه يضيع عشان معاد ازمان ، الحب شألة واحدة ياتتاخد كلها ياتتساب كلها

بس كمان فى الحب الظلم حرام ومشنقة الحب هى قلة الاهتمام ، الحب طفل لو مش هتقدر على رعايته ماتخلفهوش

الحب طفل والاطفال بيغيرو معالم الحياة لما بيجو ،، زماتنسوش ان سندريلا صحيح جريت الساعة 12 بس سابت حتة منها ودى اللى وصلت الامير لحقيقتها وحقيقتها ماغيرتش احساسه بيها وقبلها زى ماهى ولما عرفها عن قرب لما قلبه حبها بجد اختفت الحواجز واختفى الوقت ، وسندريلا مابقاش لازم ترجع قبل الساعة 12 !!!!

صحيح انا دلوقتى سندريلا بس عندى ظروفى وحواجزى الللى لما تزول مش هضطر اسيبها واجرى الساعة 12

نتمنالكو السعادة ،،، ولوانى اشك فى انك فى يوم من الايام هتبطل تبقى سندريلا ، لو كانو زمان كملو الحدوتة انا متأكدة ان سنريلا فضلت تجرى منه كله يوم لما الساعة تدق 12وهتسيبه لوحده يبكى على ذكراها ويأنس وحدته من بعدها ،،، اسألنى انا ..................

هناك تعليق واحد:

candy يقول...

جميلة جدا :)