الاثنين، 21 ديسمبر، 2009

من غير عنوان


مش دايما بيكون عندى عنوان للى عايزة اكتبه ....

مش دايما الحروف جاهزة على طرف لسانى ....

مش دايما الصورة بتكون ساهلة فى لقطتها ....

مش دايما الوردة ليها ريحة ممكن تشمها وقت ماتحب ...

مش دايما احساسك صح.....

مش دايما الاحساس بالصدق ده اللى يطلع بيه طلقائى من القلب ....

عشان كدة فى شىء اسمه الجنون

عشان كدة فى شىء اسمه الكدب

عشان كدة فى شىء اسمه الزييف

عشان كدة فى شىء اسمه الغلط

عشان كدة فى كتير نقول للى تعبان اصرخ

اشتم اضرب بعلو الصوت

اخلع عن جسمك لبسه واطلقه لحرية الغابة

شم الهوا من غير قيود ومن غير دخان

خليك معنى جوة لوحة رسام

خليك حر خلي عنيك مفتوحة

ميزة لوحة الرسام انها حرة مش مخنوقة لانها احساس الوان طبيعة افكار مش محبوسة جوة قفص العيب والممنوع

خليك انسان غابة لسة معرفش لبس احدث المركات خليك نبات مغطيه لون طبيعى مالوش يد فى صنعه

خليك حيوان يخاف على ذريته وبيته حاضن وليفته وواثق فيها مهما غابت راجعة تانى

اوعى تكون صياد بيضيع جمال الطبيعة وهو قاعد مستنى الفريسة تقع فى الشباك

خليكى بنت حرة تخلع عنها تقل الحياة ولبسها تجرى وسط الاخضر تسرق من الطبيعة نقائها والكون جماله ومن الشمس عفتها

خليك وليف شايف حبيبته بقلبه مش بعنيه لما تشوف جمال صنع الكون فيها تحبه وتحترمه ماتعتبروش عار عليك انك تمحيه ، تشوف فيها الحرية من غير ماتجرى تداريها وتطفى جمالها بفروع الشجر اللى نتنها الزمن ،، احضنها وخبيها عن العالم والناس عشان عايزها تداريك جواها وتخبيك من خبث وغدر الكون عيش معاها الامان واصنع معاها الحلم ........

خليك بطل لوحة رسام حر طليق عاشق حياته ملكه طير طاير فى العالى ايد الصياد عمرها ماتصطاده مايقف غير على الوليف الطيب

خليك بطل لوحة رسام عاشق للحرية والجمال بيشوف بقلبه ويحس بعنيه حياته جواه وافكاره غطاه فى عز البرد شجاعته من حريته وجرائته من طهر قلبه ورجولته من عفته بتجرى فى دمه روح حوا مجنونة طاهرة غزالة رماح الصيادين ماطلوهاش

خليك صياد قلوب لاحقيقة والطهر والنبل والحرية حس وحب وطير وعيش فوق الجبال دايما عالى دب رجلك على ارض ملكك سماك وارضك بحرك وشطك الكون بيتك وحوا وليفتك .. احمى بيتك من اعداءه وحاسب انك تكون عدو بيتك الاول ..........

خليك حر حرية بطل الرسام فى لوحته ......

ليست هناك تعليقات: