الأربعاء، 11 مارس 2009

لحظة بعمر ،، وعمر يساوى لحظة




مرة قلت ان اللحظة بقرب صديق تساوى عمر ،، وان العمر بقرب حبيب يساوى لحظة
الحقيقة ماحدش فهم الفرق والتعليقات اللى قابلتها كلها كانت بتقول ان الصداقة مهمة برده وليها اهميتها وكأنى قلت عكس كدة ، مع ان العبارة انا اقصد بيها ان قد ايه الصداقة مهمة جدا ،، خلينى اوضح المعنى اكتر وياريت تفكرو معايا ...

اللحظة جنب صديق بعمر ،، يعنى ايه؟ يعنى الدقيقة اللى هتقعدها مع صديق هتتعلم فيها كتير على حسب اللحظة دى فيها ايه،، يعنى لو مثلا لحظة الم هيعلمك انه لازم تتخطى المك واحزانك وتكمل لان الدنيا ماشية مش هتستناك ،،
لو لحظة ضعف هيقويك ،،
لو لحظة هبوط هاياخود بأيديك ويشدك لفوق ومش هيسيبك تقع ،،
لو فيك عيب عمره ماهيخلى استمرار علاقتو مرهون بأنك تغير عيبك لان " صحبك على عيبه"
لو اتخليت عنه او انشغلت هيعذرك ويفهم ظروفك ومش هيعتبك
عتاب الصديق يبنى ويقوى علاقة الصداقة اكتر من انه يضعفها
صدقيك ممكن يكون مصدر لمعلومات هيجاوبك على اى سؤال " طبعا فى حدود معلوماته مش قصدى الفتى " او على الاقل هيحاول يعرفك تجيب المعلومة منين يقولك هسألك ، يعنى دايما هيبقى عايز يجاوبك على سؤالك...
وجعك وجعو ،، راحتك راحتو ومافيش بين الاصدقاء جملة " اللى أيدو فى الميه مش زى اللى أيدو فى النار "
صحبك عندو الجدعنة ،، الرجولة،، يشيل عنك وقت ازمتك ،، عمرو مايعيرك ولا يكلم نفسه كلام سلبى عليك
صحبك مش هيتخلى عنك قصاد اقرب فرصة تجيلو دايما هيدور ليك معاه على الفرص
صبحك يشتريك لو حبيبك باعك،، يداويك لو حبيبك جرحك،، يفتكرك ويقدرك لو اهلك هانوك او نسيوك
صحبك يشجعك ويرفع معنوياتك ويحترم دماغك وعمره مايهبط عزيمتك خوف من انه يخسرك مثلا او تنشغل عنه او حتى يكونلك صاحب غيره ،،كل اللى يهمه هو مصلحتك وانك تكون احسن حال
اللحظة جنب صديق حقيقى هتعلمنى كتير قوى ممكن اتعلمه فى وقت اطول ،، عشان كدة اللحظة جنب الصديق ممكن قوى تكون بعمر بحاله .............

اما العمر اللى ممكن اقضيه جنب حبيب فهى بلحظة ،،دى معناها معروف عند معظم الناس وموجود فى الاغانى والافلام بس برده عندى ليها معنى مختلف ...........
الساعة بتفوت دقيقة وانا جنبه من حلاوتها ، من كتر السعادة بننسى الوقت ،، من كتر ما انا حاباه طول ماهو بيتكلم انا مش سامعاه انا بس بتفرج عليه وبركز فى كل حركة هو بيعملها ، كل رمشة عين بيرمشها عشان كدة فى ثانية بلاقى معاه اليوم خلص ،،مش بس كدة ,,انت ممكن تفضل تحبه عمرك كله ولاما فجأة تبص فى النتيجة تلاقى انكو عديتو اكتر من 20 سنة مع بعض ولا حاسيتو بيها غير وانتو بتجوزو ولادكو ، فجأة تلاقى نفسك بتقول هو العمر ده كلو فات امتى
وفى الحالتين لو حبك كان حلو او لو قصة حبك كانت مش ولابود برده هتلاقى نفسك بتقول ان عمرك اتسرق منك عشان حد مايستهلش ،،العمر بيفوت فى خناقات بتقتل الوقت او مشاحنات او شوية عكوسات كدة تعطل العلاقة شوية بس لما بتتحل برده فجأة تلاقى نفسك هو احنا امتى اتصلاحنا !!!!!
وممكن جدا يكون حبيبك بياخود منك اكتر مابيديك وساعتها بتحس ان الوقت بيعدى هو اتملى منك وانت فضيت..
فجأة العمر الحلو اللى قضيته فى حب حبيبك عدى لحظة ويبقى نفسك فى عمر زيادة على عمروكو لانكو حاسيين انكو لسة فى حاجات ماخدوتهاش من بعض وفى حاجات مادتوهاش لبعض ،،،فالعمر بيعدى فى لحظة " حلوة"

ده الفرق بين اللحظو اللى بتسوى العمر كله ،،وبين العمر اللى يادوب لحظة تتعاش ...

ليست هناك تعليقات: