الأحد، 15 مارس 2009

ماحنا مش عايشين فى الدنيا لوحدنا


"احنا مش عايشين فى الدنيا لوحدنا"

- الجملة دى كلنا بنسمعها او بنقولها فى مواقف مختلفة ولاغراض مختلفة فى الاخر النتيجة واحدة وهى اننا فعلا مش عايشين فى الدنيا لوحدنا ، طول ماحنا ماشيين فى طريقنا بنقابل ناس وبنتفاعل معاهم وبيتفاعلو معانا وبنتعلم منهم كل يوم حاجة جديدة وبنعلمهم حاجة جديدة وكتير بنعرف منهم حاجات عننا احنا وهما كمان بيعرفو عن نفسهم حاجات ماكنوش عارفيين انها فيهم اصلا..

فمثلا : فى حاجات مش هتعرفها عن نفسك ولا هيكشفلك عنها غير السواقة فى الشارع زى مثلا انت هادى عصبى مؤدب ولا عندك مايكفيك من قاموس شتايم وقلة ادب بتحترم القانون ولا مالكش فيه بتحترم الناس اللى ماشية على رجليها ولا يالا فى داهية كلب وراح صبور ولا اندفاعى واللى يقف قدام فنية يبقى قضى على عمره


كمان فى حاجات مش هنعرفها غيرلما نحب : مثلا هل انا غيورة ولا مش فارق معايا ، طب هو انا زنانة ولا دمى خفيف على قلب الناس اللى حواليا ،عصبية وبأفش على اى حاجة ولا عاقلة كدة وبوزن الامور ، مين سابق التانى العقل ولا القلب ،، بعرف اضحى بمعنى الكلمة ولا الاناية عندى هى الاصل ، بهتم بنفسى بس عشانه ولا انا اصلا بنى ادمة مهتمة بنفسها لنفسها الطبيعى،،وفية ولا خاينة ، عينى زايغة ولا الاخلاص يعرف تريقى كويس ، كدابة ولا الصدق مرافقنى مهما كانت الظروف ، رومانسية كدة ورقيقة فى مشاعرى ولا امى كان نفسها تخلف جراح فاجيت انا...


اما الشغل فده بالناس اللى فيه هما اكبر معمل تحاليل ممكن يكشفلنا بجد عن نوعية شخصيتنا وعن فعلا احنا بنعرف وبنخافه ولا لاء منافقين ولا المبادىء عندنا زى الميه والهواء مانقدرش نعيش منغيرها او ممكن نموت عشان الحفاظ على المبدأ" طبعا المبادىء والقناعات الشخصية بتاعتنا بتبان فى كل لحظة فى حياتنا بس فى الشغل اكبر دوامة احتكاك خارجية بنمر بيها فى حياتنا هى اكتر حاجة ممكن تبينلنا احنا ايه " عندنا طموح ولا اتخلقنا عشان نكون موظفين شؤن طلبة ولا فى ديوان الوزارة،،بنعرف نشتغل فى مجموعة ولا الظهرو الفردى هو غايتنا،،بنعرف نقول الحقيقة ولا عاش الملك مات الملك ، بنعرف نعمل خطط خمسية ولا الخمسية عندنا معناها الخمس دقايق اللى جاية....


أما اهلنا بقى فدول موال كبير لأن القرد فى عين امه غزال ،، والاب عمره ماهيشوف انه الواد ده يستحق بنته ، والاخ دايما اخته عيلة فى نظره مهما كبرت والاخ عادة بيخنق على اخته ومابيرداش يلاعبها معاه عشان هو ولد وهى بنت " دى الاغلبية"

فى دايما عندنا رسايل عن نفسنا مشوشة من ناحية اهلنا مش سهل اننا نكتشف نسفنا قوى معاهم لكن برده بنتفجأ ان يوم مابيجى الابن يتجوز اخته بتبقى اهم حاجة فى حياته لانه ماشى وسايبها وبيبان انه الطفل الصغير لو جاب جون التمرين ابوه بيشجعه جدا جدا وان البنت لو غلطت بيتقالها غلطى فا مش غزال ولا حاجة لما بتيجى المدرسة تشتكى منهم ،، بس فى اخر اليوم بنعرف الناس غالية عندنا قد ايه وفعلا احنا باريين باهلنا ولا بنمثل ولاما يجى عيد الام بنحس بوجدها وقد ايه بنحبها ولا مش عادى ماكل الناس عندهم امهات ،، بنصل رحمنا مع القاريب ولا مجرد مجاملات اجتماعية وعيد كبير وعيد صغير وشم نسيم وكده فل قوى ، بنعرف منهم مدى صحة المثل الشعبى العظيم " اللى مالوش خير فى اهله مالوش خير فى حد" ،،، بس اللى انا عارفاه انه ماحدش هيشجعنى ويتمنالى الخير حتى لو من وجهة نظرهم انه خير قد أهلنا ممكن نختلف نتخانق نزعل حتى من بعض لكن فى الاخر بنتعلم منهم ازاى نعمل اسرة سعيدة سواء عشان اسرتنا سعيدة فبنقلدها او بنتعلم من اخطأهم لو هى اسرة يعنى سعيدة بس نص نص ،،فى الحالتين بتعلم يعنى ايه اسرة من اهلنا ....


نخش بقى يامعلم عالصحاب،، وعند الصاحب حدث ولا حرج بصراحة انا بعترف انى شخص متحيز جدا للصداقة وبعتبرها قضية مهمة من قضايا حياتى ،، عشان كدة اللى ممكن نعرفه عن نفسنا من صحابنا او من خلال وجودنا فى علاقة صداقة حقيقية او حتى وهمية مش ممكن نتعلمه من اى حد فى الدنيا تانى ،، اول حاجة ممكن نعرفها عن نفسنا اصلا اذا كنا اصدقاء جادعان ولا لاء،،يهمنا الانسان زى ماهو ولا بنهتم بالشكل والاماكن اللى بنخرج فيها معاهم وخلاص ،عيز تعرف اذاكنت واطى او خاين جميل او عشرة او ندل شوف مقلبت كام صاحب فى حياتك شوف كنت صاحب لكام حد وبقيت صاحب لكام حد ،،صحبنا بيقلو ولا بيزيدو ،تعرف اذاكنت اجتماعى ولا انطوائى،بنعرف اذاكنا انانيين ولا اللى فى جبنا مش لينا ،نعرف قيمة صديق لما يبعنا واحد تانى ، نترحم على ايام واحد لما يعمل معانا واحد تانى دقة نقص، نتعلم الصراحة والثقة ، تعرف عيوبك ومميزاتك الحقيقية من صاحبك لانه عمره مايغشك عشان مالوش مصلحة فى ده وعشان مصلحتك مصلحته، هتعرف انت لانهى درجة طيب او اهبل اوغلبان ، صحبك تتعلم منه اذا كنت انسان طبيعى على حريته ولا مصطنع ولا متكلف طلب صغير يطلبه منك صاحبك وعلى اساس ردك عليه تعرف حاجات عن نفسك عمرك ماكنت هتعرفها عن نفسك الااذا اتحطيت فى الموقف ده مع صاحب ........


ده بقى غير البواب والسفرجى وبياع اللبن وبياع الجرايد واللى بيعمل الشاى فى الشغل والوايتر فى المطعم وحارس الامن بتاع اى حتة وصبى المكوجى والميكانيكى واللى بتقطع منه تذاكر السيما واللى بيقعد واللى بيبعلك مناديل فى الاشارة واللى بيغسلك ازاز العربية فى محطة البنزين والحلاق او الكوافيرة وسواق الاتوبيس بتاع الشركة او سواق التاكسى او الغلبان اللى وقف فى اشارة المرور مش فاهم اى حاجة اصلا،او امين الشرطة اللى يستاهل ضرب النبوت"ادينى عرفت عن نفسى ان بكره امناء الشرطة" او المذيعة الخفة اللى طلعة فى التليفزيون ولا اممثل اللى بياخد ملايين فى الفيلم ولا فستان هيفاوهبى وكليب نانسى عجرم ،، النفسنة اوالرضابالحال كلها احاديث وكلام عن ناس ومن ناس بنقابلهم طول النهار او بنرغى عنهم اومعاهم فى قعدات القهواى اخر اليوم ،،، وبعدها تطلع بيتكو تاخود حمامك اوماتخدوش تصلى اوتنام خفيف برده كله يقولك انت ايه ،،تبص فى المرايا تتباهى بالكويس اللى عرفته عن نفسك طول النهار وتتخانق مع نفسك وتحاول تدارى الوحش اللى عرفته عن نفسك وتقول ماهم مش فاهمنى ولا عارفينى كويس ،،تقلع قناعك او تفضل لابسة وتزوده طبقة جديدة ،،اللى يريحك بس المهم خلينا عارفيين اننا مهما لابسنا اقنعة أحنا مش عايشين فى الدنيا لوحدنا .....هنتأفش هنتأفش ............

ليست هناك تعليقات: